У беларускіх турыстаў, якія не змаглі ўляцець у Менск з Гоа транзытам праз Маскву, скончыліся страхоўкі, амаль няма грошай і мэдыкамэнтаў.
Каранавірус у Беларусі і ў сьвеце. Як разьвіваюцца падзеі >>
Яўген Новік, адзін з турыстаў, апублікаваў у Instagram відэа з просьбай аб дапамозе. На запісе бачна, што за мужчынам стаіць больш за 20 чалавек.
«На дадзены момант вярнуцца дадому самастойна немагчыма. Квіткі каштуюць не пад’ёмных сум, — распавядае мужчына. — І ёсьць верагоднасьць, што іх таксама анулююць перад самім вылетам. У нас сканчваюцца грошы і мэдыкамэнты. У нас скончыліся страхоўкі і тэрміны нашых віз мінаюць. З кожным днём сытуацыя ў Гоа пагаршаецца. Зачыняюцца крамы і банкі, уводзіцца камэнданцкая гадзіна.
Мы ўжо тут не адпачываем, мы ўжо тут, на жаль, выжываем. Мы просім эвакуіраваць нас у родную краіну. Мы грамадзяне Рэспублікі Беларусь. Мы хочам жыць і працаваць на радзіме».
Камэнтар пад відэа ў Instagram Новіка пакінуў міністар замежных спраў Беларусі Ўладзімер Макей. Ён перакананы, што цягам двух-трох дзён беларусы змогуць вярнуцца дадому.
«Займаемся ўшчыльную. На жаль, не можам дамагчыся прыняцьця выразнага і сыстэмнага рашэньня ад тых, з кім вы зьвязваліся. Паспрабуйце захоўваць спакой. Разумею, што гэта цяжка», – напісаў кіраўнік Макей.
На старонцы беларускага МЗС у Facebook з’явіўся зварот да беларусаў, якія не могуць трапіць на радзіму з Шры-Ланкі і Індыі.
Паводле яго, дыпляматы прапрацоўваюць магчымасьць эвакуацыі ўсіх беларускіх грамадзян з тэрыторыі Індыі і Шры-Ланкі ў Беларусь беларускімі авіябартамі. Для эвакуацыі грамадзяне Беларусі павінны зьвярнуцца ў амбасаду Беларусі ў Індыі па тэлефонах +919999466445; +918527415859; +919711520234.
Паводле МЗС, эвакуацыя беларусаў з Мальдываў і Нэпала адбудзецца пасьля вяртаньня турыстаў з Індыі і Шры-Ланкі.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
