Лінкі ўнівэрсальнага доступу

Кантрабандныя цыгарэты зь Беларусі знайшлі ў расейскім марскім порце


Ілюстрацыйнае фота

Буйную партыю кантрабандных цыгарэт зь Беларусі выявілі ў порце Новарасійску, што на поўдні Расеі, на беразе Чорнага мора.

Як расказвае «Інтэрфакс» са спасылкай на тамтэйшае памежнае ўпраўленьне ФСБ, кантрабандныя цыгарэты спрабавалі правезьці ў бочках нібыта з абразіўнай сумесьсю. 10,5 тысячы блёкаў цыгарэт зь беларускімі акцызнымі маркамі былі замаскаваныя абразіўнай сумесьсю зьверху.

Памежнікі ацанілі партыю, у якой было больш як два мільёны цыгарэт, у звыш 3 млн расейскіх рублёў — гэта больш за 101 тысячу беларускіх рублёў, або звыш 45 тысяч даляраў. Цыгарэты канфіскавалі.

Ці выявілі саміх кантрабандыстаў і ці пагражае ім суд, невядома. У лютым за кантрабанду цыгарэтаў на падобную суму (2,8 млн расейскіх рублёў) у суседнім Сочы 46-гадовага мужчыну, які прыехаў з Абхазіі, асудзілі на штраф у 400 тысяч расейскіх рублёў — каля 6 тысяч даляраў.

У сёлетнім студзені кантрабандныя беларускія цыгарэты выявілі ў амаль усіх рэгіёнах Расеі: і ў Смаленску, і ў Дагестане, і ў Чалябінску.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG