Лінкі ўнівэрсальнага доступу

Дзе ў Беларусі праверыцца на каранавірус


Зранку 28 лютага стала вядома, што ў Беларусі зафіксавалі першы выпадак COVID-19: каранавірус выявілі ў студэнта БНТУ з Ірану. Што рабіць тым, хто падазрае, што таксама мог заразіцца?

На мяжы правераць

Цяпер у Беларусь пускаюць людзей нават з тых краінаў, дзе фіксавалі ўспышкі COVID-19 — і закрываць межы не зьбіраюцца, бо мяркуюць, што гэта толькі нашкодзіць. Але ў Нацыянальным аэрапорце пасажыраў правяраюць на чатырох санітарна-карантынных пунктах, таксама ўзмоцнены кантроль зладзілі на «наземных» межах — калі пабачаць сымптомы, правераць адразу на месцы.

Прыватныя клінікі не правяраюць

Ніводная прыватная клініка ў Беларусі пакуль не абвяшчала, што робіць аналізы на COVID-19. Свабода спраўдзіла: у найбольш папулярных прыватных клініках Менска кажуць, што ня робяць такіх аналізаў, але не выключаюць, што могуць пачаць рабіць калі-небудзь у будучыні.

У інфэкцыйную лякарню — толькі пасьля паездак у небясьпечныя раёны і першых сымптомаў

У Менскай гарадзкой клінічнай інфэкцыйнай лякарні кажуць, што проста кожнаму ахвочаму аналіз на каранавірус ня робяць. У гэтай лякарні робяць аналізы «толькі калі чалавек прыбыў з эндэмічных раёнаў і калі яго непакоіць кашаль, насмарк, тэмпэратура».

Іншым жа раяць зьвяртацца ў звычайную паліклініку. У самой Менскай інфэкцыйнай лякарні цяпер карантын.

Калі сымптомаў няма — выклікаць на дом лекара

Супрацоўніца Менскай клінічнай лякарні параіла зьвяртацца людзям, якія хочуць праверыцца на каранавірус «для ўласнага супакаеньня» (без сымптомаў, але пасьля кантактаў з магчыма хворымі), зьвяртацца ў звычайную паліклініку. Каб не кантактаваць лішні раз з наведнікамі паліклінікі — выклікаць тэрапэўта на дом, расказаўшы пра прычыны падазрэньняў на каранавірус.

Заставайцеся дома, калі вы пачуваецеся кепска, нават калі ў вас вельмі невыразныя сымптомы. Не кантактуйце зь іншымі людзьмі і не наведвайце публічных месцаў.

Калі сымптомы ёсьць — лепей «хуткую»

Пры самых нязначных праявах хваробы (тэмпература, кашаль, цяжка дыхаць) неадкладна зьвяртайцеся да дактароў — лепей выклікаць «хуткую дапамогу». Лекараў «хуткай» праінструктавалі пра каранавірус яшчэ некалькі тыдняў таму.

Якія наогул сымптомы?

Сымптомы COVID-19 падобныя да многіх іншых рэсьпіраторных захворваньняў, таму неабходны дадатковы скрынінг.​ Сама па сабе наяўнасьць сымптомаў накшталт кашлю, высокай тэмпэратуры і цяжкага дыханьня яшчэ ня значыць, што чалавек заразіўся менавіта каранавірусам. Але гэтыя сымптомы — нагода праверыцца, калі маглі быць кантакты з заражанымі менавіта COVID-19.

Што трэба ведаць пра новы каранавірус з Кітаю

  • УЖЫВУЮ Каранавірус у Беларусі і ў сьвеце. Як разьвіваюцца падзеі
  • Невядомы раней вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease).
  • Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
  • Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Проста чханьне — не сымптом каранавірусу.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг. ​

22 новыя адказы пра каранавірус ад Сусьветнай арганізацыі здароўя, мэдычных аўтарытэтаў і з найлепшай практыкі

Колькі чалавек з каранавірусам памерлі ў Беларусі

Пакуль вядома пра шэсьць выпадкаў сьмерці пацыентаў, інфікаваных новым каранавірусам (Мінздароўя, нагадаем, паведамляе пра 4 пацьверджаныя выпадкі).

  1. 73-гадовая пэнсыянэрка Аляксандра Чэпік, памерла ўвечары 30 сакавіка ў Віцебскім абласным клінічным спэцыялізаваным цэнтры (ВАКСЦ, былы чыгуначны шпіталь).​
  2. 75-гадовы актор Драматычнага тэатра імя Якуба Коласа Віктар Дашкевіч, памёр у ноч з 30 на 31 сакавіка ў ВАКСЦ.
  3. 70-гадовая настаўніца зь вёскі Новыя Доктаравічы (Менская вобласьць) Натальля А., памерла 1 красавіка ў Капыльскай цэнтральнай раённай бальніцы.
  4. 70-гадовы вайсковы пэнсіянэр Уладзімер Сідараў, памёр 2 красавіка ў ВАКСЦ.​
  5. 67-гадовая Вольга Дзеравянка, памерла 1 красавіка ў 2-й гарадзкой клінічнай лякарні Менску.
  6. 60-гадовы мянчук памёр у сталічным інфэкцыйным шпіталі 3 красавіка.

Пашырэньне каранавірусу ў сьвеце. Гадзіна за гадзінай

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG