Каранавірус пацьверджаны ў 20 вайскоўцаў батальёну NATO ў Літве
Каранавірус пацьверджаны ў дзесяці вайскоўцаў міжнароднага батальёну NATO, дысьлякаванага ў Літве. Пра гэта паведамляе партал DELFI са спасылкай на прадстаўніка для сувязяў з грамадзкасьцю міжнароднага батальёну.
Як самому зрабіць антысэптык для рук
Рэцэпт Сусьветнай арганізацыі аховы здароўя: як зрабіць літр антысэптычнага гелю ў хатніх умовах. Усе інгрэдыенты даступныя ў аптэках альбо гаспадарчых крамах.
У Беларусі злавілі ўжо сем перакупнікаў мэдычных масак
За апошні час у Беларусі склалі сем пратаколаў па фактах незаконнага перапродажу мэдычных масак, перадае БелТА зьвесткі ГУБАЗіК. У асноўным перакупнікі бралі тавары ў аптэках і перапрадавалі ў інтэрнэце па завышаных цэнах. У іх канфіскавалі звыш 28 тысяч адзінак мэдычнай прадукцыі на суму (калі лічыць у легальных цэнах) каля 26 тысяч рублёў.
За такую незаконную прадпрымальніцкую дзейнасьць могуць аштрафаваць на суму да 2700 рублёў, а тавар канфіскаваць.
У Італіі ад COVID-19 вылечыўся 101-гадовы мужчына
Заражаны каранавірусам 101-гадовы мужчына ачуняў у Італіі. Пацыента выпісалі са шпіталя ў курортным горадзе Рыміні на Адрыятыцы, паведамляе ІТАР-ТАСС са спасылкай на адзін з італьянскіх тэлеканалаў.
Паводле тэлеканалу, пажылога мужчыну шпіталізавалі на мінулым тыдні. «Гэта надзея на будучыню для ўсіх нас», — прыводзіць тэлеканал словы прадстаўніка мясцовых уладаў Глёрыі Лізі.
На мінулым тыдні пасьля двух тыдняў хваробы зь лякарні Бэргама выпісалі месячнае немаўля.
У сеціве зьбіраюць грошы для дапамогі менскім бальніцам і мэдыкам
На плятформе Molamola абвясьцілі збор сродкаў на рэсьпіратары для для мэдыкаў ЛОР-аддзяленьня 3-й гарадзкой дзіцячай бальніцы Менску, галоўны ўрач якой першым у краіне падтрымаў сусьветную акцыю мэдыкаў «Заставайцеся дома».
Як адзначае ініцыятар збору Андрэй Стрыжак, «у выпадку выяўленьня ў аднаго з пацыентаў каранавірусу, лекары будуць вымушаныя сысьці на карантын на 14 дзён і цэлая зьмена лекараў ня зможа надаваць дапамогу малым». Таму мэта збору — 100 рэсьпіратараў клясу абароны ffp3 для лекараў дзіцячай бальніцы, якіх цяпер у мэдыкаў няма. Гэтага хопіць на 20-25 дзён працы ЛОР-аддзяленьня.
Таксама збор сродкаў для мэдыкаў ідзе на іншых плятформах:
↘ Тут зьбіраюць дапамогу для інфэкцыйнай бальніцы і шостай гарадзкой бальніцы Менску
↘ Каманда рэстарана Grillman зьбірае грошы на гарачае харчаваньне лекараў
↘ Праект «Імёны» зьбірае грошы на закупку ахоўных камплектаў для сацыяльных работнікаў, якія дапамагаюць старым, мэдсёстраў
Менская рэстарацыя закрылася і пачала гатаваць «ссабойкі» лекарам, зьбірае грошы на посуд
Рэстарацыя Grillman абвясьціла збор грошай на плятформе Molamola.by — кампанія завецца «Зьбяром ссабойку доктару». 12 тысяч рублёў патрэбныя, каб зрабіць 12 тысяч гарачых абедаў для менскіх лекараў, і грошы патрэбныя на аднаразовы посуд.
Сама рэстарацыя закрываецца ў сувязі з пандэміяй COVID-19. Пакуль мяркуецца, што закрыцьцё працягнецца два месяцы. Ад 26 сакавіка рэстарацыя вырашыла абслугоўваць Менскую гарадзкую клінічную лякарню гарачымі абедамі за ўласныя грошы.
Рэстарацыя піша, што сама ня зможа аплаціць ўсе выдаткі, бо працягвае плаціць супрацоўнікам заробкі, а таксама арэнду і за камунальныя паслугі. Камплект аднаразовага посуду каштуе 1,1 рубля па закупачных цэнах, таму на 12 тысячаў порцыяў лекарам рэстарацыя просіць 12 тысячаў рублёў дапамогі.
Астатнія 60 тысячаў рублёў рэстарацыя абяцае выдаткаваць з уласных сродкаў. Частку прадуктаў на праект ёй даюць «Віталюр», Bro Bakery, BakeZavod, «Велес Фуд», «Пятруха» і іншыя кампаніі.
«Мастацтва неўміручае. А эпідэміі скончацца...» Сьмельчакі і цяпер ходзяць на балет
У сталічных тэатрах народу істотна паменшала. Яшчэ нядаўна ў Купалаўскі на «Караля Ліра» ці «Рэвізора» квіткі раскуплівалі за 3 месяцы да спэктаклю. У Тэатар опэры і балету (прынамсі на балет) іх трэба было купляць таксама за два-тры месяцы.
25 сакавіка ў Вялікім тэатры опэры і балета паказвалі «Жызэль». У сярэдзіне дня з афіцыйнага сайту тэатру, дзе можна замовіць і аплаціць квіткі, вынікала, што амаль палова залі вольная.
Facebook запусьціў сыстэму інфармаваньня пра COVID-19
Сацыяльная сетка Facebook паведаміла пра шэраг захадаў у сувязі з пандэміяй новага каранавірусу. У кампаніі стварылі інфармацыйны цэнтар у пытаньнях каранавірусу, засяродзіліся на барацьбе з фэйкамі і правакацыямі, паабяцалі падтрымку экспэртаў і малых бізнэсаў, у некаторых краінах запусьцілі адмысловы «антывірусны» разьдзел на Facebook, банэр на Instagram і інфармавальнік у WhatsApp.
Інфармаваньне пра COVID-19 дае і Google, і Youtube, і «ЎКантакце», і іншыя папулярныя інтэрнэт-сэрвісы.
Канскі фэстывальны палац ператварылі ў прытулак для бяздомных. ФОТА
Кожны дзень там знаходзіцца ад 50 да 70 чалавек без даху над галавой. У залі фэстывальнага палацу стаяць ложкі, накрытыя коўдрамі, арганізаваныя ванныя пакоі, сталоўкі і месцы, дзе можна паглядзець тэлевізар.
Ёсьць нават адмысловыя клеткі для сабак — многія бяздомныя маюць сваіх хатніх
жывёлінаў. На ўваходзе ва ўсіх гасьцей мераюць тэмпэратуру, праводзяць эпідэміялягічныя інтэрвію.
Падчас каранавіруса, калі ўсе павінны «заставацца дома», бяздомныя знаходзяцца ў асаблівай сытуацыі. У часы абмежаваньняў іх караюць штрафамі за тое, што яны знаходзяцца на вуліцы, якія яны ня могуць заплаціць. Грамадзкія арганізацыі пратэстуюць супраць гэтага. Яны заклікаюць стварыць дадатковыя месцы ў гарадах, дзе маглі б жыць бяздомныя.
У Мэркель другі адмоўны тэст на каранавірус
Канцлерка Нямеччыны Ангела Мэркель атрымала вынік другога тэсту на COVID-19 — зноў адмоўны, паведаміў ейны прэс-сакратар. Ды кіраўніца Нямеччыны працягвае працаваць з дому ў самаізаляцыі, трэці тэст мае прайсьці на наступным тыдні.
У мінулую нядзелю Мэркель адправілася ў самаізаляцыю, бо кантактавала зь лекарам, у якога пазьней выявілі новы каранавірус.
«Спачатку я была легкадумная, як цяпер многія ў Беларусі». Аповед беларускі з Гішпаніі, дзе бушуе COVID-19
«Гэта вайна» — так беларуская журналістка і гід Вольга Ўлевіч, якая 8 гадоў жыве ў Каталёніі, апісвае сытуацыю з пандэміяй каранавірусу ў Гішпаніі. Вольга, як і ўсе жыхары гэтай дзяржавы, ужо 11 дзён жыве ў жорсткім карантыне.
Яна апавядае Свабодзе, як з ростам сьмяротнасьці ад COVID-19 у Гішапніі радыкальна зьмянілася стаўленьне да пагрозы каранавіруснай інфэкцыі, і раіць беларусам не баяцца страціць грошы ды як мага хутчэй ісьці на карантын ці самаізалявацца. У Гішпаніі на 25 сакавіка былі больш за 42 тысячы людзей, інфікаваных COVID-19, 3434 чалавекі памерлі, у тым ліку 738 за апошнія содні.
У Маскве на тыдзень зачыняць крамы, рэстараны і паркі
Мэр Масквы Сяргей Сабянін распарадзіўся зачыніць з 28 сакавіка па 5 красавіка ўсе рэстараны, кавярні, бары, сталовыя, а таксама буйныя паркі.
Іншыя абмежаванні:
- Спыняецца аказаньне паслуг, якія патрабуюць асабістай прысутнасьці (напрыклад, цырульняў).
- Будуць аказваць мэдыцынскія, сацыяльныя, банкаўскія і страхавыя паслугі, паслугі
ЖКГ і сувязі, пахавальныя. - Транспарт будзе працаваць.
- Дыстанцыйныя паслугі, дастаўка будзе працаваць. Рэлігійныя аб’екты не зачыняцца, але Сяргей Сабянін наведваць іх не рэкамэндуе.
- Пры гэтым ён падкрэсьліў, што ў непрацоўным тыдзень у Маскве працягнуць працаваць экстраныя службы, органы ўлады, транспарт, банкі і харчовыя крамы.
Храм Магілы Гасподняй у Ерусаліме закрылі праз пандэмію каранавірусу
Царкву, збудаваную на месцы, дзе, паводле паданьняў, быў пахаваны і ўваскос Езус Хрыстос, закрылі ў сувязі з распаўсюдам COVID-19, піша Reuters.
Рашэньне прынялі па выніках сустрэчы царкоўных лідэраў Ізраілю і мясцовай паліцыі. Закрыцьцё храму адбылося перад Вялікднем — ізраільскія рэлігійныя дзеячы не выключаюць, што калі сытуацыя з пандэміяй не палепшыцца, велікодныя ўрачыстасьці будуць праводзіць у іншых месцах і паводле новых эпідэміялягічных правілаў.
У Ізраілі, блізкім паводле колькасьці насельніцтва да Беларусі, на момант публікацыі зафіксавалі 2495 выпадкаў COVID-19, памерлі 5 пацыентаў, выпісаныя здаровымі 66. Колькасьць «актыўных выпадкаў» няспынна падвышаецца.
Як сьвяткаваць Вялікдзень падчас пандэміі. Ватыкан растлумачыў
У краінах, дзе абвешчаная пандэмія каранавірусу і дзе людзям забаронена зьбірацца, біскупы і сьвятары павінны сьвяткаваць абрады Вялікага тыдня бязь вернікаў.
Людзі могуць далучыцца да малітвы дома і ўдзельнічаць у абрадах дзякуючы
перадачам, рэкамэндаваных Ватыканам.
Набажэнства ў Вялікую суботу неабходна праводзіць толькі ў саборах і парафіяльных храмах. Сьвятарм забаранілі падаваць вернікам крыж для пацалунку і праводзіць абрад мыцьця ног.
Указ таксама загадвае, што ў месцах, дзе ўлады ўводзілі абмежаваньні для насельніцтва, сьвятары (па ўзгадненьні з біскупамі) могуць праводзіць набажэнства ў сваіх парафіях без удзелу вернікаў.
Абанэнтам А1 праз пандэмію каранавірусу далі бясплатны безьлімітны інтэрнэт
Ад 26 сакавіка да канца лета апэратар сотавай сувязі дасьць ім бясплатны безьлімітны доступ у інтэрнэт.
Доступ даюць на хуткасьці 512 кбіт/с — гэтага хопіць для чытаньня навінаў і прагляду фота, але наўрад ці для камфортнага прагляду відэа (хіба што ў якасьці 240p) або онлайн-гульняў.
Атрымаць гэтую паслугу могуць абанэнты з тарыфамі лінейкі «Камфорт» (у тым ліку архіўнымі), а таксама тарыфу «Стартавы». Каб падключыць бясплатны «анлім», трэба набраць USSD-код *135*7*1*2*1*1# і націснуць кнопку выкліку (для «Стартавага» і архіўных тарыфаў «Камфорт» код *135*7*4*1#). Таксама паслуга падключаецца праз мабільную праграму «Мой А1».
На іншых тарыфах таксама даюць бонусы — ад 200 Мб трафіку да «анліму» пры ўмове пераходу на актуальныя тарыфы.
Акрамя «анліму» на мабільны інтэрнэт абанэнтам (акрамя тарыфу «Стартавы») таксама даюць бясплатны доступ да відэасэрвісу VOKA — усёй бібліятэкі фільмаў і сэрыялаў, а таксама 30 папулярных тэлеканалаў.
«Некаторыя мэдыкі ня водзяць дзяцей ні ў школу, ні ў садок». Паразмаўлялі зь беларускімі лекарамі аб працы падчас пандэміі каранавірусу
Мэдыкі — адна з групаў рызыкі ў часе пандэміі каранавірусу. Свабода паразмаўляла зь беларускімі доктаркамі пра тое, што цяпер адбываецца ў мэдычных установах і ці патрэбны беларусам карантын.
Адзін кажа: «Вялікая імавернасьць, што наша міністэрства ня справіцца з гэтым». Другая — «У нас ёсьць маскі! Зробім выгляд, што яны дапамагаюць».
Расея з 27 сакавіка спыняе рэгулярныя і чартэрныя рэйсы за мяжу
Урад Расеі пастанавіў забараніць ад 27 сакавіка рэгулярныя і чартэрныя авіязносіны зь іншымі дзяржавамі. Адпаведнае даручэньне атрымала «Росавиация» па выніках паседжаньня каардынацыйнай рады барацьбы з каранавірусам.
Выключэньне зробяць толькі для рэйсаў, якімі вывозяць расейцаў з-за мяжы, а таксама для палётаў «на асаблівае распараджэньне ўраду».
Таксама вырашана, што пасажыры, якія прыбылі з краін, ахопленых пандэміяй, будуць праходзіць першапачатковае тэставаньне на наяўнасьць інфэкцыі непасрэдна ў аэрапорце. Для расейцаў, якія вяртаюцца з-за мяжы, прадугледжаны абавязковы двухтыднёвы карантын.
Як вірус дзеліць грамадзтва. Піша Юры Дракахруст
Сьцісла:
- У Чэхіі, дзе ўведзены карантын, я працую з дому, а пад маімі вокнамі віруе будоўля нейкага офісу
- Гэтыя будаўнікі ня могуць выконваць сваю працу онлайн
- Людзі вызначаюць сваю пазыцыю паводле балянсу паміж небясьпекай ад вірусу і ўласнымі магчымасьцямі эканамічнага выжываньня
- У ІТ-шніка і рабочага на канвэеры гэтыя балянсы розныя
- Калі нехта заклікае да «карантыну любой цаной», то вельмі часта рэч у тым, што для яго гэтая цана ня надта высокая
- Правільнае рашэньне для канкрэтнага грамадзтва ў дадзеным выпадку — гэта кампраміс паміж кепскім і кепскім, прычым кепскім для розных людзей у рознай ступені
На дзьверах 34-й паліклінікі ў Менску — шматлікія інструкцыі ў сувязі з COVID-19
У Расеі рыхтуюцца да выбуховага росту каранавірусу
Лекары ў Расеі рыхтуюцца да «выбуховага», «кшталту ядзернай рэакцыі» развіцьця сытуацыі з распаўсюдам каранавіруснай інфэкцыі. Пра гэта паведаміў галоўны інфэкцыяніст маскоўскага Міністэрства аховы здароўя Мікалай Малышаў.
Паводле яго, спачатку было арытмэтычнае даданьне колькасьці інфікаваных, цяпер яно ўжо геамэтрычнае - за апошнія суткі захваральнасьць каранавіруснай інфэкцыяй вырасла амаль у тры разы.
У сувязі з гэтым ва ўсіх рэгіёнах рыхтуюцца новыя стацыянары і ложкі, абсталяваныя адпаведна апошнім патрабаваньням, адзначыў ён.
«Вялікая колькасьць людзей будзе хварэць», — лічыць Мікалай Малышаў. Таму гаворка ідзе пра пастаноўку дыягназаў дыстанцыйна з дапамогай IT-тэхналёгій, расказаў ён. У сытуацыі выбуховага росту захваральнасьці прыярытэт у шпіталізацыі будзе аддавацца пацыентам з групаў рызыкі, дадаў экспэрт.