Супрацоўнік агенцтва, якое ўваходзіць у структуру Міністэрства абароны Польшчы, арыштаваны па падазрэньні ў спробе шпіянажу на карысьць Расеі, паведамляе польскае Грамадзкае тэлебачаньне. Крыніцы тэлеканалу сьцьвярджаюць, што падазраваны працаваў у Агенцтве вайсковай маёмасьці, але там гэтую інфармацыю адмаўляюць.
Агенцтва ўнутранай бясьпекі затрымала яго ў мінулы чацьвер, пры вобшуку ў яго знайшлі фальшывыя дакумэнты і незарэгістраваную зброю і боепрыпасы, піша Gazeta Wyborcza.
Поўнае імя падазраванага не раскрываецца, пракуратура называе яго Пётр Ш. Па выстаўленых абвінавачаньнях яму пагражае ад трох да васьмі гадоў турмы.
Сёньня ж стала вядома, што спэцслужбы Баўгарыі выявілі, як адзін з супрацоўнікаў расейскай амбасады займаўся выведнай дзейнасьцю. Дыпляматычны імунітэт дазволіў яму пакінуць Баўгарыю.
