Лінкі ўнівэрсальнага доступу

Другое дзіця памерла пасьля прышчэпкі «Эўпэнты». Экспэртыза: не празь яе


Ілюстрацыйнае фота

Пасьля трагедыі ў Ганцавіцкім раёне, дзе двухмесячны хлопчык памёр пасьля прышчэпкі, сям’я Кулаковых зь Менску вырашыла расказаць Tut.by пра сьмерць сваёй дачкі, якой таксама ўвялі карэйскую вакцыну «Эўпэнта».

Віталіна, другая дачка ў менскай сям’і Кулаковых, нарадзілася ў сьнежні 2017 году. У сакавіку 2018-га ёй увялі дзьве вакцыны — «Эўпэнта» і ІПВ. Паводле бацькоў, ніякай рэакцыі на вакцынацыю не было, усё спачатку ішло добра. Другасную вакцынацыю зрабілі 8 траўня. Дзяўчынку агледзеў пэдыятар, сказаў, што здаровая. Ёй зрабілі прышчэпку, яшчэ паўгадзіны яна была ў клініцы — ніякіх рэакцыяў не было, сям’я з дачкой зьехала.

Каля 20:30 дзіця паклалі спаць, самі бацькі паклаліся зь ёй а 23-й. Каля паловы на 6-ю раніцы маці прачнулася і пабачыла, што дачка ня рухаецца. Маці паспрабавала зрабіць штучнае дыханьне, але дачка ня дыхала. Жанчына выклікала хуткую дапамогу, сьледам за той прыехалі сьледчыя і міліцыянты.

Судовая мэдычная экспэртыза ў канцы чэрвеня прыйшла да высновы, што дзіця памерла праз сындром раптоўнай сьмерці. Паводле экспэртызы, што праводзілася каля 10-й раніцы, сьмерць надышла «каля 6–12 гадзінаў таму». Прыкметаў цяжкіх захворваньняў, хібаў разьвіцьця або цялесных пашкоджаньняў ня выявілі. У заключэньні згадваецца вакцынацыя «Эўпэнтай» і ІПВ, але адзначаецца, што ўскладненьняў пасьля вакцынацыі не было, сьмерць наступіла не празь яе.

Цяпер сям’я Кулаковых кажа, што спадзяецца на справядлівае расьсьледаваньне сваёй трагедыі.

Скандал з карэйскай вакцынай у Беларусі. Што важна ведаць

  • 13 жніўня ў Ганцавіцкім раёне двухмесячны хлопчык памёр пасьля прышчэпкі. 14 жніўня дзяўчынка такога ж узросту трапіла ў рэанімацыю пасьля плянавай прышчэпкі. Пазьней стала вядома, што ў траўні пасьля прышчэпкі «Эўпэнты» памерла чатырохмесячная дзяўчынка.
  • Вакцыны бароняць ад шматлікіх вірусаў. Пра некаторыя інфэкцыйныя хваробы забыліся толькі таму, што ёсьць прышчэпкі. Калі перастаць прышчапляцца, інфэкцыі досыць хутка вяртаюцца.
  • Аднак у мэдыцыне зрэдку, кажуць спэцыялісты, здараюцца такія трагедыі, як у Ганцавічах, калі мае месца індывідуальная рэакцыя, не зьвязаная зь якасьцю прэпарату.
  • На пэрыяд расьсьледаваньня выкарыстаньне ў Беларусі імунабіялягічных сродкаў «Эўпэнта» той сэрыі, прышчэпкі зь якой былі ўведзеныя пацярпелым дзецям, прыпынілі. Карэйскую вакцыну «Эўпэнта» Мінздароўя закупіла замест расейскай АКДС у 2017 годзе.
  • Часопіс «Ежедневник» апублікаваў расьсьледаваньне ў дзьвюх частках, у якім сьцьвярджае, што вакцына незарэгістраваная ў Беларусі і не праходзіла праверак у краіне. Цэнтар экспэртызаў і выпрабаваньняў у ахове здароўя пацьвердзіў гэта Свабодзе.
  • З нагоды публікацыяў «Ежедневника» Мінздароўя зьвярнулася ў пракуратуру. Сьледчы камітэт тым часам правярае парадак закупкі, якасьць і сэртыфікацыю вакцыны, як таго ў пэтыцыі патрабавалі дзьве тысячы беларусаў.
  • 10% лекавых сродкаў трапляюць у Беларусь без рэгістрацыі.
  • Мінздароўя палічыла дастатковым тое, што вакцына прайшла праверку якасьці Ўсясьветнай арганізацыяй здароўя. Аднак, згодна зь беларускім заканадаўствам, гэтага не дастаткова для выкарыстаньня яе ў краіне ў штатаных сытуацыях. 29 жніўня Мінздароўя патлумачыла выкарыстаньне вакцыны «надзвычайнай сытуацыяй».
  • Пасьля трагедыі ў Ганцавіцкім раёне і скандал з вакцынай сям’я зь Менску расказала пра сьмерць дачкі, якой таксама ўвялі карэйскую вакцыну «Эўпэнта».
  • Усё гэта адбываецца на тле карупцыйнай «справы лекараў», у якой падазраванымі ў хабарах на сотні тысячаў даляраў праходзяць кіраўнікі шматлікіх мэдычных установаў Беларусі і чыноўнікі Міндзароўя.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG