Жыхары Берасьця і Берасьцейскага раёну падавалі заяўкі на пікеты ў Менску супраць будаўніцтва ў Берасьцейскай вобласьці акумулятарнага заводу. Частку заявак Менгарвыканкам ужо адхіліў, піша БелаПАН.
Дзьве адхіленыя заяўкі тычыліся пікетаў на пляцоўцы каля адміністрацыі прэзыдэнта. Усяго падавалі 6 заявак — тры ля адміністрацыі, яшчэ тры — ля Дома ўраду на плошчы Незалежнасьці. Лёс астатніх чатырох заявак пакуль невядомы.
Напэўна, заяўкі адхілілі таму, што ў Беларусі забаронена ладзіць масавыя мерапрыемствы ў радыюсе 50 мэтраў ад будынкаў органаў дзяржаўнага кіраваньня.
Як расказаў праваабаронца Раман Кісьляк, пікетамі ў Менску берасейцы хацелі зьвярнуць увагу на будаўніцтва заводу «АйПаўэр», бо «берасьцейскія чыноўнікі спрабуюць замяць незадаволенасьць людзей супраць гэтай небясьпечнага вытворчасьці».
Раней у адміністрацыю прэзыдэнта накіравалі больш за 2,5 тысячы подпісаў за адстаўку чыноўнікаў Берасьця — як сьцьвярджаецца ў пэтыцыі, тыя «нядобрасумленна выконваюць свае прамыя службовыя абавязкі, ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду, якая чыніцца навакольнаму асяродзьдзю і здароўю людзей».
У Берасьці далёка не заўсёды дазваляюць мітынгі супраць будаўніцтва заводу. 29 красавіка прайшоў дазволены мітынг, але і да яго, і пасьля ладзіліся несанкцыянаваныя флэшмобы. Так, на мінулым тыдні праціўнікі будаўніцтва заводу «гулялі ў футбол» на плошчы Леніна ў цэнтры Берасьця. Мітынг, які плянаваўся 10 чэрвеня ў цэнтры Берасьця, забаранілі.
У Ленінскім судзе Берасьця ідзе суд над праціўнікамі заводу Дзьмітрыем Бекалюком і Алегам Ярмоленкам, якіх вінавацяць у арганізацыі несанкцыянаванага мерапрыемства. У час паседжаньня 6 ліпеня прысутныя масава паказвалі судзьдзю плякаты з карцінай нідэрляндзкага мастака Герарда Давіда «Суд Камбіса» («Зьдзіраньне скуры з прадажнага судзьдзі»).
«Ня хочам, каб нас патруцілі». 37 тысяч жыхароў Берасьця пратэстуюць супраць будаўніцтва новага заводу
Пратэсты супраць акумулятарнага заводу ў Берасьці ідуць ад пачатку 2018 году, калі людзі даведаліся пра будоўлю. Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі. Штонядзелі пратэстоўцы выходзяць на цэнтральную плошчу ў Берасьці.
Будаваць акумулятарны завод пад Берасьцем у канцы 2017 году пачала кампанія «АйПаўэр» Віктара Лемяшэўскага. Падрадчыкам выступае Аньхойская замежнаэканамічная будаўнічая карпарацыя (Кітай).
Завод будуецца каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназуе, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
27 сакавіка суд Маскоўскага раёну Берасьця адмовіў грамадзянам і грамадзкаму аб’яднаньню «Экадом» у задавальненьні пазову супраць ТАА «АйПаўэр» і Берасьцейскага аблвыканкаму.
Пазоўнікі прасілі спыніць будоўлю акумулятарнага заводу, пакуль ня будзе паўторнага грамадзкага абмеркаваньня актуальнай справаздачы пра ацэнку яго ўзьдзеяньня на навакольнае асяродзьдзе.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў