Людзі, якія прыйшлі ў суд Ленінскага раёну Берасьця, дзе пачаўся суд над праціўнікамі будаўніцтва акумулятарнага заводу Дзьмітрыем Бекалюком і Алегам Ярмоленкам, зладзілі флэшмоб з старадаўняй карцінай, дзе зь няправеднага судзьдзі здымаюць скуру, паведамляе «Брестская газета».
У судзе Ленінскага раёну Берасьця пачаўся разгляд адміністрацыйных спраў супраць праціўнікаў будаўніцтва акумулятарнага заводу берасьцейца Дзьмітрыя Бекалюка і жыхара вёскі Тэльмы Берасьцейскага раёну Алега Ярмоленкі. Іх вінавацяць у правядзеньні несанкцыянаванага масавага мерапрыемства. Такім мерапрыемствам палічылі зьбіраньне подпісаў ля гандлёвых цэнтраў за адстаўку кіраўнікоў мясцовай вэртыкалі.
У Адміністрацыю прэзыдэнта накіравалі больш за 2,5 тысяч подпісаў за адстаўку чыноўнікаў Берасьця
Дзьмітры Бекалюк хадайнічаў, каб у якасьці сьведак у суд выклікалі міліцыянтаў, якія вялі відэаздымкі затрыманьня, а таксама каб суд прагледзеў зробленыя імі відэазапісы. Аднак судзьдзя Сьвятаслаў Каліна гэтыя хадайніцтвы не задаволіў.
Пасьля судовага пасяджэньня прысутныя зладзілі флэшмоб. Яны разгарнулі плякаты з рэпрадукцыяй карціны нідэрляндзкага мастака Герарда Давіда «Суд Камбіса». Карціна нагадвала служкам Фэміды, што судзіць трэба справядліва.
Фатаздымкі з флэшмобу разышліся па сацсетках.
Таксама прысутныя склалі скаргі на імя старшыні суду з просьбай правесьці праверку дзеяньняў судзьдзі Каліны.
Разгляд спраў з удзелам адвакатаў працягнецца 11 ліпеня.
iPower хоча спагнаць з праціўнікаў акумулятарнага заводу 1200 даляраў на адвакатаў
У Берасьці забаранілі мітынг супраць будоўлі акумулятарнага заводу
Пратэсты супраць акумулятарнага заводу ў Берасьці трываюць ад пачатку 2018 году, калі людзі даведаліся пра будоўлю. Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі. Штонядзелі пратэстоўцы выходзяць на цэнтральную плошчу ў Берасьці.
Будаваць акумулятарны завод пад Берасьцем у канцы 2017 году пачала кампанія «АйПаўэр» Віктара Лемяшэўскага. Падрадчыкам выступае Аньхойская замежнаэканамічная будаўнічая карпарацыя (Кітай).
Завод будуецца каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназуе, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
27 сакавіка суд Маскоўскага раёну Берасьця адмовіў грамадзянам і грамадзкаму аб’яднаньню «Экадом» у задавальненьні пазову супраць ТАА «АйПаўэр» і Берасьцейскага аблвыканкаму.
Пазоўнікі прасілі спыніць будаўніцтва акумулятарнага заводу, пакуль ня будзе праведзена паўторнае грамадзкае абмеркаваньне актуальнай справаздачы па ацэнцы яго ўзьдзеяньня на навакольнае асяродзьдзе.
