У нядзелю ўвечары ў трох акругах штату ўспыхнулі 14 буйных пажараў.
У выніку лясных пажараў у Каліфорніі зьнішчана ня менш за 1500 жылых і камэрцыйных будынкаў, паведаміў у панядзелак кіраўнік пажарнай службы штату.
Зьвестак аб загінулых у выніку пажараў няма, аднак мноства людзей атрымала раненьні, шмат хто прапаў бязь вестак. 14 буйных пажараў, што пачаліся ў нядзелю, бушуюць на тэрыторыі трох акругаў у вінаробных раёнах Каліфорніі. Дваццаць тысяч чалавек былі эвакуяваныя, у тым ліку некалькі сотняў пацыентаў мясцовых лякарняў, паведамляе «Голас Амэрыкі».
Каліфарнійскае кіраўніцтва лясной службы і пажарнай бясьпекі заявіла, што прычыны пажараў у цяперашні момант высьвятляюцца.
У акругах Напа, Сонома і Юба абвешчана надзвычайнае становішча.
