Лінкі ўнівэрсальнага доступу

СМІ ЗША: спэцпракурор расьсьледуе дзеяньні прэзыдэнта Трампа


Спэцыяльны пракурор Робэрт Мюлер

Спэцыяльны пракурор Робэрт Мюлер расьсьледуе дзеяньні прэзыдэнта ЗША Дональда Трампа ў працэсе звальненьня ім Джэймса Коўмі з пасады дырэктара ФБР па падазрэньні ў перашкодзе прэзыдэнтам працы правасудзьдзя. Пра гэта са спасылкай на крыніцы ў праваахоўных органах паведаміла ў сераду ўвечары газэта The Washington Post.

Паводле іх, кіраўнікі некалькіх амэрыканскіх выведслужбаў дадуць паказаньні ў рамках гэтага расьсьледаваньня. Яно пачалося празь некалькі дзён пасьля звальненьня Джэймса Коўмі з пасады дырэктара ФБР.

Робэрт Мюлер, былы дырэктар ФБР, быў прызначаны на пасаду спэцыяльнага пракурора, які зьяўляецца куратарам расьсьледаваньня расейскага ўмяшаньня ў амэрыканскія выбары і кантактаў людзей з выбарчага штабу Дональда Трампа для таго, каб гарантаваць неўмяшаньне адміністрацыі Трампа ў ход сьледзтва. Пракурору былі дадзеныя самыя шырокія паўнамоцтвы, у тым ліку і права расьсьледаваць дзеяньні прэзыдэнта, калі зьяўляюцца абгрунтаваныя падазрэньні ў парушэньні кіраўніком выканаўчай галіны ўлады законнасьці.

Прадстаўнік прэзыдэнта Трампа назваў уцечку інфармацыі пра расьсьледаваньне «абуральнай, недаравальнай і незаконнай».

Вестка пра тое, што спэцыяльны пракурор расьсьледуе дзеяньні прэзыдэнта, не стала сэнсацыяй. Экспэрты чакалі такога кроку ад спэцыяльнага пракурора, асабліва пасьля выступу Джэймса Коўмі на слуханьнях у Сэнаце на мінулым тыдні, падчас якіх ён заявіў, што ягонае звальненьне было, як ён перакананы, выклікана незадаволенасьцю прэзыдэнтам Трампам ходам расейскага расьсьледаваньня.

XS
SM
MD
LG