Лінкі ўнівэрсальнага доступу

Рада Бясьпекі ААН пашырыла санкцыі супраць КНДР


Ракетнае выпрабаваньне ў Паўночнай Карэі. 30 траўня 2017 году

Усе сябры Рады Бясьпекі ААН аднагалосна прынялі рэзалюцыю пра пашырэньне абмежавальных захадаў у дачыненьні да Паўночнай Карэі ў адказ на ядзерную і ракетную праграму, перадае Reuters.

Ва ўхвалены дакумэнт увайшлі 4 юрыдычных і 14 фізычных асобаў. На думку аўтараў рэзалюцыі, усе яны маюць дачыненьне да дзейнасьці ў інтарэсах КНДР за мяжой. Ім, у прыватнасьці, будзе забаронены ўезд у іншыя краіны, а іх фінансавыя рахункі за мяжой будуць замарожаныя.

Рэзалюцыя заклікае Пхэньян да неадкладнага спыненьня ракетных выпрабаваньняў і тэставаньня сваёй ядзернай сыстэмы. Таксама краіны-ўдзельніцы арганізацыі дамовіліся прыкладаць намаганьні да палітыка-дыпляматычнага ўрэгуляваньня напружанасьці на Карэйскім паўвостраве.

Ініцыятыва прыняцьця адпаведнага дакумэнта зыходзіла ад пастаяннага прадстаўніка ЗША пры ААН Нікі Хэйлі. Яна матывавала неабходнасьць увядзеньня новых санкцыяў у дачыненьні да Паўночнай Карэі бесьперапыннымі запускамі кіраўніцтвам краіны балістычных ракет, якія забароненыя рэзалюцыямі Рады Бясьпекі ААН.

XS
SM
MD
LG