Паліцыя ў Бостане застрэліла падазраванага ў тэрарызьме
Паводле вэрсіі паліцыі, 26-гадовы Усаама Рахім напаў зь вялікім нажом на паліцэйскага і агента ФБР — нападнік быў застрэлены ў парадку самаабароны.
Паліцыя апісала Рахіма, як «вядомага падазраванага», які раней пагражаў супрацоўнікам праваахоўных органаў. За Рахімам сачылі ў межах справы аб тэрарызьме.
Паводле паліцыі, ёсьць відэаздымка, на якой бачна, як Рахім падыходзіць да праваахоўнікаў, у той час як яны імкнуцца ухіліцца ад кантакту. Пазьней паліцыя арыштавала іншага падазраванага па гэтай справе, Дэйвіда Ўокера.
Брат забітага Іман Ібрагім Рахім напісаў у Facebook’у, што Усаама быў забіты стрэлам у сьпіну падчас чаканьня аўтобуса, на якім ён зьбіраўся ехаць на працу.
Іман Рахім, мусульманскі дзеяч у Сан-Францыска, сказаў, што яго брат гаварыў па тэлефоне з бацькам, калі быў застрэлены.
Будзе праводзіцца расьсьледаваньне, каб вызначыць, у якой ступені страляніна з боку прадстаўнікоў праваахоўных органаў была апраўданая.