«Праз тое, што ў нас ваенна-палітычная абстаноўка вакол Рэспублікі Беларусь, яна зьяўляецца нестабільнай, таму ў нас з 2022 году пераведзеныя 14 пунктаў назіраньня ў больш часты рэжым працы, і з пэрыядычнасьцю ў тры гадзіны адбываецца вымярэньне ў памежных раёнах. Гэта Берасьцейская і Гомельская вобласьці», — працытавала выданьне «Позірк» Аляксандра Трусава.
Паводле яго, вынікі дасьледаваньня магутнасьці дозы гама-выпраменьваньня перадаюцца ў рэспубліканскія органы дзяржаўнага кіраваньня.
«Што тычыцца своечасовай гатоўнасьці да рэагаваньня на магчымыя пагрозы ядзерных і радыяцыйных аварый, у нас штодня дзяжурныя зьмены праводзяць прагназаваньне розных аварый вакол Рэспублікі Беларусь з пункту гледжаньня трэніроўкі пэрсаналу і забесьпячэньня неабходнай інфармацыяй на выпадак аварый рэспубліканскіх органаў дзяржкіраваньня», — адзначыў прадстаўнік Белгідрамэта.
Паводле яго, цягам 2025 году радыяцыйная абстаноўка на тэрыторыі Беларусі, уключаючы рэгіёны, прылеглыя да Ўкраіны, заставалася стабільнай, магутнасьць дозы гама-выпраменьваньня «адпавядала ўстаноўленым шматгадовым значэньням».
- 24 лютага 2022 году Расея пачала поўнамаштабнае ўварваньне ва Ўкраіну, у тым ліку зь беларускай тэрыторыі.
- У першы дзень расейскія войскі захапілі Чарнобыльскую АЭС і зону адчужэньня.
- Пасьля ўварваньня Дзяржаўная інспэкцыя ядзернага рэгуляваньня Ўкраіны зафіксавала значнае павелічэньне ўзроўню гама-выпраменьваньня праз перамяшчэньне вайсковай тэхнікі.
- 31 сакавіка 2022 году расейская армія адступіла з той тэрыторыі.
У ноч на 14 лютага 2025 году расейскі дрон пацэліў у саркафаг, пабудаваны над разбураным аварыяй у 1986 годзе рэактарам. Ліквідацыя наступстваў атакі завяршылася летась 7 сакавіка.
1 кастрычніка 2025 году расейская армія атакавала падстанцыю ў Славуцічы, у выніку, паводле прэзыдэнта Ўкраіны Ўладзіміра Зяленскага, ЧАЭС была абясточаная цягам трох гадзін.
За 60 кілямэтраў ад мяжы зь Беларусьсю функцыянуе Ровенская АЭС.
Форум