Нагадаем, 26 красавіка некалькі сотняў чалавек сабраліся на плошчы Якуба Коласа, каб потым прайсьці па менскіх вуліцах жалобнай калёнай да помніка ахвярам Чарнобыльскай катастрофы. Амонаўцы ланцугом пайшлі на натоўп, каб сагнаць людзей з плошчы. У гэты момант лідэр АГП, каб ня быць затрыманым, пакінуў месца сходу. Пасьля гэтага людзі пайшлі калёнай па праспэкце Францыска Скарыны. Арганізатарам міліцыянты ўручылі позвы ў міліцыю, а потым суд пакараў арыштамі і штрафамі тых, хто ўдзельнічаў у шэсьці. Анатоля Лябедзьку таксама выклікалі ў міліцыю, але пасьля прагляду відэастужкі з запісам падзеяў адпусьцілі. На наступны дзень яму даслалі позву ў Савецкае РУЎС на 12 траўня. У міліцыі склалі пратакол за ўдзел у несанкцыянаваным сходзе.
Судзьдзя Руслан Казадаеў пагадзіўся з абвінавачваньнямі міліцыянтаў і пакараў апазыцыйнага палітыка штрафам у мільён девяцьсот тысячаў рублёў (гэта амаль 1 000 даляраў). Лідэр АГП Анатоль Лябедзька адразу пасьля вынясеньня прысуду паведаміў Радыё Свабода:
(Лябедзька: ) “На мой погляд тое, што адбываецца можна ахарактарызаваць адным словам – маразм. А, калі двума, то – маразм і агонія. Тое, што адбылася сёньня на судовым працэсе – гэта поўная дэпрафэсіяналізацыя, як супрацоўнікаў праваахоўчых органаў, так і судовай сыстэмы. Я б не хацеў, каб мы дажылі да такой сытуацыі, каб унізе нешта грукатала, а наверсе абсалютная цішыня. Каб людзі, якія кіруюць судовай сыстэмай, потым гаварылі: “Ну, прабачце, там ёсьць казладоевы, ці казадоевы ўнізе, вось яны і нясуць адказнасьць, а мы ні пры чым. Таму мы пройдзем па ўсяму гэтаму ланцужку і прымусім падпісацца пад прававой бязглузьдзіцай і Сукала, і прадстаўнікоў гарадзкога суду”.
Такім чынам, за ўдзел у “Чарнобыльскім шляху” апроч Анатоля Лябедзькі пакаралі чатырох чалавек – праваабаронцу Людмілу Гразнову штрафам у 2 000 даляраў, сябра АГП Андруся Козела арыштавалі на 7 сутак, намесьніка старшыні БНФ Алеся Міхалевіча – на 10 сутак, актывіста Маладога Фронту Зьміцера Дашкевіча – на 15 сутак. Апошні дагэтуль знаходзіцца за кратамі спэцпрыёмніка-разьмеркавальніка на Акрэсьціна.
