Сёньня

Найбольш хвалюе прэзыдэнта Саюзу беларускіх гэбрайскіх арганізацыяў і абшчынаў Леаніда Левіна той факт, што аніякія дзяржаўныя ворганы – ані пракуратура, ані Камітэт у справах рэлігіяў і нацыянальнасьцяў, ані Дзяржаўны камітэт друку, – а таксама Беларускі экзархат Маскоўскае патрыярхіі Праваслаўнае царквы аніяк не адрэагавалі на зьяўленьне антысэміцкай энцыкляпэдыі – кнігі “Вайна па законах нізасьці”. Нават на зварот у Генэральную пракуратуру пра факт распальваньня міжнацыянальнае варожасьці дасюль няма афіцыйнага адказу…

Леанід Левін паведаміў, што прадстаўнікі гэбрайскіх арганізацыяў мелі шмат сустрэчаў з нагоды выхаду гэтае кнігі і ў адміністрацыі “прэзыдэнта”, і ў МЗС, і ў Камітэце ў справах рэлігіяў, сустракаліся нават з мітрапалітам Філарэтам, але справа далей выказваньня словаў паразуменьня ў прыватнай гутарцы не пайшла.

Гаворыць Леанід Левін:

“Кніга друкавалася ў дзяржаўнай друкарні, і прайшло ўжо столькі часу, але мы не пачулі аніводнай афіцыйнай заявы ані па радыё, ані па тэлевізіі, ані ў друку. Нас хвалюе маўчаньне тых людзей, якія мусяць адрэагаваць афіцыйна”, – гаварыў Леанід Левін.

Гэбрайскія арганізацыі падалі апэляцыю ў гарадзкі суд на нядаўняе рашэньне суду Савецкага раёну, які палічыў цемрашальскую кнігу з антысэміцкімі фальшыўкамі “зьвесткамі навуковага характару”. Нэгатыўная рэакцыя на зьяўленьне гэтае кнігі паступіла ўжо з Еўрапейскага гэбрайскага кангрэсу, з ЗША, Ізраіля. Беларускія гэбраі зьбіраюць подпісы пад лістамі пратэсту. Бо калі не дамагчыся асуджэньня выдаўцоў кнігі “Вайна па законах нізасьці”, як лічыць Леанід Левін, заўтра могуць выйсьці ксэнафобскія выданьні пра татараў, палякаў і беларусаў…

Гаворыць намесьнік прэзыдэнта Саюзу гэбрайскіх арганізацыяў і абшчынаў Якаў Басін:

“Відаць, ёсьць дастаткова моцныя колы, якія зацікаўленыя ў тым, каб разыграць гэбрайскую карту і, можа быць, знайсьці нейкага нутранога ворага, каб адхіліць увагу ад тых сацыяльных праблемаў, якія існуюць. Адкінуты ўсякі сорам, цынічна й нахабна гавораць аб гэбраях, якія быццам бы перамаглі Расею і далі клятву да канца стагодзьдзя захапіць сьвет… Калі дзяржава ня можа й ня хоча абараніць гэбрайскую мяншыню – значыць, гэта камусьці выгодна. Антысэмітызм заўсёды быў сродкам, а ня мэтаю… Калі дзяржава не пакарае выдаўцоў гэтае кнігі за хлусьню, значыць, яна будзе адказная за тое, што прынясе гэтая кніга!”, – гаварыў Якаў Басін.

Спадар Басін сумняецца, што гэбрайскім арганізацыям урэшце ўдасца дамагчыся перамогі над выдаўцамі антысэміцкай энцыкляпэдыі ў судовым працэсе. І гэта будзе азначаць пазбаўленьне ад ілюзіяў, што дзяржава можа абараніць ад хлусьні й зьнявагі.

Валер Каліноўскі, Менск