Свабодзе пацьвердзілі сапраўднасьць ліста ад старшыні прафсаюзнага камітэту Беларускага мэталюргічнага заводу ў Жлобіне да старшыні праўладнай Фэдэрацыі прафсаюзаў Беларусі і кіраўніка выбарчага штабу Аляксандра Лукашэнкі Міхаіла Орды, які 11 жніўня апублікаваў Telegram-канал «Беларусь головного мозга».
Завод працуе, страйку няма, расказалі Свабодзе на заводзе. Днём раней у адным з цэхаў адбылася спроба страйку.
У лісьце старшыня прафсаюзнага камітэту БМЗ Аляксандар Каляда просіць Орду выразіць думку чальцоў прафсаюзу — яны «за справядлівыя выбары і сумленны падлік галасоў». Таксама Орду просяць паспрыяць у накіраваньні ў горад прадстаўнікоў пракуратуры для праўнай ацэнкі дзейнасьці асобных выбарчых камісіяў.
«Ёсьць участкі, на якіх адзін з кандыдатаў набраў 80% і больш, і гэта нерэальна, — гаворыцца ў лісьце. — Калі мы прасілі паказаць дакумэнты, нам адмаўлялі, а замест гэтага ў нашым горадзе затрымлівалі людзей і ўжывалі сілу супрацоўнікі РАУС і іншыя службы».
Раней прафсаюз, сказана ў лісьце, трымаў нэўтралітэт адносна выбараў, бо кожны чалец можа мець уласныя палітычныя погляды. Тое, што старшыня ФБП выказвае падтрымку аднаму з кандыдатаў, «нас абурае», пішуць Орду з БМЗ.
ГЛЯДЗІЦЕ ТАКСАМА: Кіраўніцтва заводу імя Казлова рыхтуе заяву ў адміністрацыю прэзыдэнта аб сытуацыі пасьля выбараў. АМАП затрымаў людзей каля заводу ГЛЯДЗІЦЕ ТАКСАМА: «Рэпрэсіі нацэленыя на рабочых». Прафсаюзны лідэр пра «перадстрайкавую» сытуацыю ў Наваполацку ГЛЯДЗІЦЕ ТАКСАМА: Кандыдат у прэзыдэнты ЗША Байдэн: «Народ Беларусі патрабуе, каб яго голас пачулі»Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.