Украіна забараніла ўезд мужчынам – грамадзянам Расеі ўзростам ад 16 да 60 гадоў

Мяжа Расеі і Ўкраіны

Украіна на час дзеяньня ваеннага становiшча забараніла ўезд у краіну мужчынам –​ грамадзянам Расеі ва ўзросьце ад 16 да 60 гадоў. Пра гэта заявіў кіраўнік памежнай службы Ўкраіны Пятро Цыгікал.

Паводле яго, уезд ва Ўкраіну для іх дазволены толькі з гуманітарнымі мэтамі — у прыватнасьці, для ўдзелу ў пахаваньні.​

ГЛЯДЗІЦЕ ТАКСАМА: Украіна не пусьціла на сваю тэрыторыю 8 беларусаў, але агульнай забароны няма, — Памежная служба Ўкраіны

Напярэдадні стала вядома аб тым, што Ўкраіна ўвяла забарону на ўезд у анэксаваны Крым для замежных грамадзянаў.

За тры дні ўкраінскія памежнікі не прапусьцілі 85 расейцаў пасьля авіярэйсаў зь Менску.

ГЛЯДЗІЦЕ ТАКСАМА: Чаму ў Кіеў не пусьцілі расейцаў, якія ляцелі «Белавіяй»? Тлумачыць амбасадар Украіны ў Беларусі

У 10 абласьцях Украіны абвешчана ваеннае становішча, якое працягнецца з 26 лістапада да 26 сьнежня. Ваеннае становішча было ўведзена ў сувязі з захопам 25 лістапада вайскоўцамі Расеі трох украінскіх вайсковых караблёў у Керчанскай пратоцы.

ГЛЯДЗІЦЕ ТАКСАМА: Памежны камітэт Беларусі: інфармацыі пра масавыя вяртаньні грамадзян Расеі няма

ГЛЯДЗІЦЕ ТАКСАМА: Украіна забараніла ўезд расейцам-мужчынам. «Белавія» і Беларуская чыгунка прадаюць ім квіткі без абмежаваньняў

Што трэба ведаць пра канфлікт Украіны і Расеі ў Азоўскім моры

Расея 25 лістапада заблякавала выхад украінскіх караблёў, якія плылі да Марыюпалю праз Керчанскі праліў, каб трапіць у Азоўскае мора. Тры ўкраінскія караблі і больш за 20 украінскіх маракоў захопленыя расейскімі вайскоўцамі.

  • Раніцай 25 лістапада расейскі сухагруз перагарадзіў Керчанскую пратоку перад трыма ўкраінскімі суднамі, якія ажыцьцяўлялі плянавы пераход з порту Адэсы ў порт Марыюпаль Азоўскага мора. Пазьней расейскі пагранічны карабель пратараніў буксір Вайскова-марскіх сіл Узброеных сіл Украіны.
  • Расейскія вайсковыя караблі з дапамогай авіяцыі і спэцназу атакавалі і захапілі пашкоджаны ўкраінскі буксір і два малыя браняваныя артылерыйскія катэры. Шэсьць украінскіх маракоў былі параненыя, двое зь іх у цяжкім стане.
  • Паводле Расеі, украінскія караблі спрабавалі прайсьці празь Керчанскую пратоку незаконна. Украіна адкідае гэтае абвінавачваньне, спасылаючыся на міжнародныя і міжурадавыя пагадненьні.
  • Ці праўда, што ўкраінскія караблі парушылі расейскую мяжу ў Азоўскім моры?
  • Ва Ўкраіне абʼявілі ваеннае становішча з 28 лістапада да 27 сьнежня. Узброеныя сілы Ўкраіны прыведзеныя ў поўную баявую гатоўнасьць.

    Дзе ва Ўкраіне ўвялі ваеннае становішча

  • Канфлікт у Азоўскім моры паміж Украінай і РФ узьнік пасьля ўвядзеньня ў эксплюатацыю моста ў анэксаваны Крым. Украіна заяўляе, што Расея на падставе праверак затрымлівае дзясяткі суднаў, якія ідуць ва ўкраінскія азоўскія парты. Паводле Масквы, праверкі ўкраінскіх суднаў законныя.
  • Рада Бясьпекі ААН склікала 26 лістапада экстранае паседжаньне ў сувязі з рэзкім абвастрэньнем сытуацыі ў Керчанскім праліве, шэраг эўрапейскіх краінаў асудзілі дзеяньні Расеі ў Азоўскім моры.
  • Суд Сімферопаля на два месяцы арыштаваў 24 украінскіх маракоў, захопленых расейскімі сілавікамі. Украінская пракуратура прызнала іх ваеннапалоннымі.
  • Украіна на час дзеяньня ваеннага становiшча забараніла ўезд у краіну мужчынам –​ грамадзянам Расеі ва ўзросьце ад 16 да 60 гадоў.
  • У верасьні 2019 году адбыўся абмен палоннымі паміж Расеяй і Ўкраінай, падчас якога захопленыя маракі вярнуліся ва Ўкраіну.