На сайце petitions.by зьявілася пэтыцыя, аўтары якой патрабуюць увесьці адміністрацыйную адказнасьць за распаўсюджваньне георгіеўскай стужкі ў Беларусі.
Пэтыцыю накіруюць у Савет міністраў і Палату прадстаўнікоў.
Аўтары пэтыцыі прапануюць забараніць георгіеўскую стужку і яе выявы для:
- вырабу і распаўсюду;
- публічнага выкарыстаньня, дэманстрацыі і нашэньня.
За парушэньне забароны просяць увесьці адміністрацыйную адказнасьць.
Пры гэтым у пэтыцыі прапануюць вызначыць пералік рэчаў, на якія забарона ня будзе распаўсюджвацца, а менавіта:
- дакумэнты;
- арыгіналы баявых сьцягоў;
- дзяржаўныя ўзнагароды;
- надмагільлі.
«Георгиевская ленточка» — ня Юраўская стужка
Летась у траўні Вярхоўная Рада Ўкраіны ўхваліла закон, які прадугледжвае штраф за выраб і прапагандысцкае выкарыстаньне «георгіеўскіх» стужак. Цяпер іх публічнае выкарыстаньне, дэманстрацыя або нашэньне караецца ва Ўкраіне штрафам у памеры ад 850 да 2550 грыўняў. Пры паўторным парушэньні закону пакараньне больш жорсткае — штраф да 5100 грыўняў або арышт на 15 сутак з канфіскацыяй прапагандысцкіх матэрыялаў. За выкарыстаньне георгіеўскай стужкі ва Ўкраіне аштрафавалі двух грамадзян Беларусі.
У Беларусі ўлады фактычна адмовіліся ад «георгіеўскай стужкі» з 2014 году і рэкамэндуюць яе не выкарыстоўваць. Наўзамен выкарыстоўваюць чырвона-зялёныя стужкі са стылізаванай кветкай яблыні.