Лінкі ўнівэрсальнага доступу

Лукашэнка прыгадаў, што абяцаў перамагчы карупцыю яшчэ ў 1994 годзе


Газэта «Свабода», 1994 год

У час сустрэчы з працаўнікамі дрожджавага камбінату ў Слуцку 16 лютага Аляксандар Лукашэнка патлумачыў, чаму днём раней звольніў двух міністраў, піша БЕЛТА.

«Я не камэнтую свае рашэньні, але магу растлумачыць іх, — казаў Аляксандар Лукашэнка. — Вы мае выбарцы, і я абавязаны вам тлумачыць. Думаю, для вас няма нічога новага ад Лукашэнкі: зь першых прэзыдэнцкіх выбараў я выразна народу сказаў, што карупцыі ў Беларусі быць ня можа».

Лукашэнка дадаў, што летась нібыта папярэджваў міністраў, што калі на іхных прадпрыемствах выявяць карупцыю, то ён здыме іх з пасадаў.

15 лютага Лукашэнка звольніў міністра спорту і турызму і міністра лясной гаспадаркі (мабыць, упершыню ў гісторыі Беларусі звальненьне было з фармулёўкай «за непрыняцьце дзейсных захадаў у барацьбе з карупцыяй»). Першага «адкамандзіраваў» на неназваную пасаду ў Міністэрства надзвычайных сытуацый, другога проста зьняў з пасады. На наступны дзень пасьля звальненьняў КДБ абвясьціў пра выяўленьне хабару ў лясгасах і Палацы спорту.

«Ад мяне літасьці не чакайце, — рэзюмаваў Лукашэнка. — Не таму, што я крыважэрны, а таму, што карупцыя губіць усё».

Лукашэнка кажа пра барацьбу з карупцыяй амаль чвэрць стагодзьдзя. Вынікі не найлепшыя

Яшчэ да абраньня прэзыдэнтам Аляксандар Лукашэнка займаўся карупцыйнымі пытаньнямі. У канцы сьнежня 1993 году ён, тады дэпутат Вярхоўнага Савету і старшыня антыкарупцыйнай парлямэнцкай камісіі, зачытаў адмысловы даклад, які ў выніку прывёў да адстаўкі сьпікера Вярхоўнага Савету Станіслава Шушкевіча (таго абвінавацілі ў прысабечваньні скрыні цьвікоў).

Плякат Аляксандра Лукашэнкі да прэзыдэнцкіх выбараў 1994 году
Плякат Аляксандра Лукашэнкі да прэзыдэнцкіх выбараў 1994 году

Праз год Лукашэнка ўжо на пасадзе прэзыдэнта плакаў, як сьцьвярджала тагачасная прэса (гл. фота ўверсе), пасьля зачытваньня новага антыкарупцыйнага дакладу дэпутата БНФ Сяргея Антончыка, дзе ўжо абвінавачвалі ў карупцыі ягонае атачэньне. Але даклад у выніку забаранілі публікаваць у дзяржаўных СМІ, газэты выйшлі зь белымі палосамі.

Ці дае станоўчыя вынікі барацьба з карупцыяй у краіне?

За час прэзыдэнцтва Лукашэнкі было нямала гучных затрыманьняў, зьвязаных з карупцыяй, але Беларусь па-ранейшаму застаецца карумпаванай краінай. Рада Эўропы называла нездавальняльнымі цяперашнія высілкі беларускіх уладаў у барацьбе з карупцыяй.

Так, у рэйтынгу ўспрыманьня карупцыі Беларусь займала на 2017 год 79-е месца са 176 краінаў сьвету з такой жа колькасьцю балаў, як Бразылія (дзе праз карупцыйныя скандалы адбыўся ўжо другі імпічмэнт) і Кітай (дзе карупцыянэрам пагражае сьмяротнае пакараньне). У рэйтынгу вяршэнства права Беларусь заняла 65 месца са 113, у тым ліку праз карупцыю. Больш высокую — 38-ю — пазыцыю краіна займае ў рэйтынгу Doing Business, які ня ўлічвае карупцыі.

Сустрэча Аляксандра Лукашэнкі з выбарцамі, 1994 год
Сустрэча Аляксандра Лукашэнкі з выбарцамі, 1994 год

Кніга ​«Дзевяноста чацьверты» Сяргея Навумчыка, PDF >>

Ваша меркаваньне

Паказаць камэнтары

XS
SM
MD
LG