Лінкі ўнівэрсальнага доступу

У Беларусі зьнік расейскі дысыдэнт, — заяўляюць праваабаронцы


Уладзімер Ягораў, актывіст «Яблока», падчас адзіночнага пікету ў горадзе Тарапец

Расейскі апазыцыйны палітык Ўладзімер Ягораў, які спрабаваў схавацца ад перасьледу на тэрыторыі Беларусі, зьнік 29 ліпеня, і дагэтуль ягонае месцазнаходжаньне невядомае.

Супрацоўнікі беларускага хостэлу, у якім жыў Уладзімер Ягораў, паведамілі праваабаронцам, што за ім прыйшлі «камітэтчыкі». «Гэта падобна да справы Мурада Амрыева», — кажа беларуская праваабаронца Наста Лойка.

Супраць Ягорава, які жыве ў горадзе Тарапец Цьвярской вобласьці Расеі і ўзначальваў мясцовае аддзяленьне партыі «Яблоко», была заведзеная крымінальная справа за пост «экстрэмісцкай скіраванасьці» у сацыяльнай сетцы.

«У Расеі цяпер хваля завядзеньня крымінальных спраў за рэпосты, якія нібыта ўтрымліваюць экстрэмізм, — апавядае праваабаронца арганізацыі Human Constanta Наста Лойка. — Шмат актывістаў трапілі пад яе. Супраць Уладзімера Ягорава, які займаўся расьсьледаваньнем карупцыйных спраў, было шмат спробаў перасьледу ў розных формах. У яго два разы спрабавалі падпаліць дом, сачылі за ягонымі пастамі ў сацсетках. І вось адзін з пастоў аднесьлі да „экстрэмізму“, завялі крымінальную справу».

Ад перасьледу палітык спрабаваў схавацца ва Ўкраіне, дзе папрасіў статусу ўцекача. Аднак нібыта супрацоўнікі СБУ вывезьлі яго на нэўтральную паласу паміж пунктамі пропуску Сянькоўка (Украіна), Новыя Юркавічы (Расея) і Весялоўка (Беларусь).

«Мяне, папраўдзе, нашмат больш турбуе тое, што зь ім адбылося ў Беларусі, — кажа Наста Лойка. — Супрацоўнікі хостэлу, у якім жыў Ягораў, паведамілі праваабаронцам, што за ім прыйшлі «камітэтчыкі» і пасьля гэтага ён зьнік. Паводле інфармацыі праваабаронцаў, 31 ліпеня Ўладзімера Ягорава асудзілі ў судзе Кастрычніцкага раёну Менску за «хуліганства» на двое сутак. Асудзілі яго нібыта ў ягоную адсутнасьць, вызначыць ягонае цяперашняе месцазнаходжаньне таксама не ўдаецца».

Наста Лойка
Наста Лойка

«Я, канечне, бачыла рознае. Як людзей у хуткім рэжыме судзілі і на роўным месцы давалі па 15 сутак за што заўгодна. Але такога, што чалавека судзяць у ягоную адсутнасьць, ён фізычна нідзе не зьяўляюцца, яго няма ані ў якіх ізалятарах і ўсе дзяржаўныя органы адхрышчваюцца і кажуць, што ў нас такога няма, з такім я сутыкаюся ўпершыню».

Наста Лойка кажа, што паводле міграцыйнага заканадаўства Ягораў мог знаходзіцца ў Беларусі без рэгістрацыі да 90 дзён. Нават калі б беларускія ўлады вырашылі правесьці працэдуру высылкі, то Дэпартамэнт па грамадзянстве і міграцыі мусіць гэта пацьвердзіць.

«Тут жа ані раённы АГІМ, ані прэс-служба МУСу не пацьвердзілі, што такое рашэньне было. І незразумела, дзе ён зараз знаходзіцца. Незразумела, чаму суд адбыўся безь яго. Я ўпэўненая, што гэты суд па надуманай прычыне і не зьвязаны з лаянкай і чымсьці падобным», — кажа Лойка.

Паводле яе, у Беларусі Ягораў чакаў афіцыйнага пацьверджаньня ад памежных службаў Украіны пра свой статус. У выпадку, калі яму ўезд ва Ўкраіну яму не забаронены афіцыйна, ён меркаваў выехаць туды.

«Але беларускія ўлады, як заўжды, усіх перайгралі, і я вельмі хвалююся за ягоны лёс. Ёсьць вялікая верагоднасьць, што ён некалькі гадоў можа правесьці ў расейскай турме проста на роўным месцы», — кажа Наста Лойка.

«Для мяне самае страшнае, што мы яго фізычна не знайшлі. Страшна ўявіць, што зь ім зараз можа адбывацца і дзе ён цяпер. Бо ягонаму расейскаму адвакату ў выпадку яго знаходжаньня ў Расеі павіннны былі паведаміць пра гэта. Але гэтага не адбылося яшчэ», — кажа праваабаронца.

Наста Лойка сьцьвярджае, што сытуацыя з Ўладзімерам Ягоравым вельмі падобная да справы Мурада Амрыева.

«Там вельмі падобная сытуацыя была, калі ў Добрушы было мала інфармацыі, не пускалі да яго адваката, ігнаравалі статус уцекача, не тлумачылі, што за працэдура. Толькі ў выніку нашых настойлівых запытаў мы даведаліся, што гэта працэдура высылкі, — тлумачыць Наста Лойка. — І я не выключаю, што ў сытуацыі Ягорава празь нейкі час таксама паведамяць пра працэдуру высылкі».

Уцякач з Чачні Мурад Амрыеў быў затрыманы 7 чэрвеня ў 17:24 у пункце пропуску «Весялоўка» Гомельскай памежнай групы на выезьдзе зь Беларусі ва Ўкраіну. Ён быў высланы зь Беларусі пад канвоем 9 чэрвеня на прадпісаньне Генпракуратуры. Паводле расейскіх СМІ, беларускія структуры «не атрымлівалі» прашэньня Амрыева аб палітычным прытулку, якое Амрыеў пісаў у дзень затрыманьня. У Генпракуратуры Беларусі заявілі, што перадача затрыманага 9 чэрвеня ня ёсьць экстрадыцыяй: перадачай займаліся органы ўнутраных спраў.

Ваша меркаваньне

Паказаць камэнтары

XS
SM
MD
LG