Лінкі ўнівэрсальнага доступу

У Добрушы афармляюць паперы на высылку чачэнскага спартоўца ў Расею

абноўлена

Статус чачэнскага спартоўца, затрыманага ўначы з 7 на 8 чэрвеня, застаецца невядомым. Мурад Амрыеў дагэтуль знаходзіцца ў Добрушы. Да яго прыехаў расейскі адвакат, але яго не пускаюць у РАУС. Свабода перадае зь месца падзеяў.

Пётр Заікін, расейскі адвакат Амрыева, паведаміў Свабодзе, што бачыў у будынку Амрыева праз вакно. Той быў у кайданках. Пасьпеў паведаміць, што ад часу затрыманьня, яму не прадставілі адваката.

«Я прывёз дакумэнты, якія мог бы выкарыстаць беларускі адвакат, — сказаў Заікін. — Знайсьці адваката мы пакуль ня можам. Усе пагаджаюцца, але калі даведаюцца, у чым сутнасьць праблемы, усе прымаюць рашэньне, што ім немэтазгодна працягваць працу».

Пётр Заікін
Пётр Заікін

Заікін прывёз дакумэнты аб вызваленьні, падпісаныя расейскім сьледчым. Дзяжурны іх прыняў і вярнуў адвакату пасьля азнаямленьня.

«Мой кліент знаходзіцца ў памяшканьні адзьдзелу міліцыі. Ён знаходзіцца тут з 12 гадзін ночы. Прычына затрыманьня — што ён нібыта знаходзіцца ў міжнародным вышуку. Пазаўчора ён быў вызвалены. Ён утрымліваўся ў ІЧУ Бранска і быў вызвалены. Яго паўторна затрымалі».

Пазьней адваката зь Беларусі ўдалося знайсьці. У РАУС Добрушу прыехала беларуская адвакатка. Яна падала хадатайніцтва, каб сустрэцца з Мурадам.Пакуль адвакатку не пускаюць да яго, спасылаючыся на тое, што разглядаюць заяву.

Разам з Заікіным у Добруш прыехала Анастасія Гарына, юрыст Камітэту супрацьдзеяньня катаваньням. Камітэт прадстаўляе інтарэсы Амрыева з расейскага боку.

Анастасія Гагрына
Анастасія Гагрына

У прэс-службе УУС Гомельскага аблвыканкаму Свабодзе паведамілі, што супрацоўнікі адзьдзелу па міграцыі і грамадзянстве афармляюць дакумэнты на «прымусовую высылку» Амрыева.

Паводле словаў Заікіна, дэпартацыя можа пагражаць жыцьцю чачэнскага спартоўца.

«Выдача Амрыева чачэнскім паліцыянтам можа для яго скончыцца вельмі трагічна ў літаральным сэнсе — гэта пытаньне жыцьця і сьмерці».

Бацькі Амрыева запісалі відэазварот з просьбай да ўладаў Беларусі не выдаваць сына Расеі.

Як раней паведамляла Свабода, Амрыева перасьледуюць чачэнскія паліцэйскія — як мяркуецца, праз кроўную помсту. Яго абвясьцілі ў вышук у пачатку 2017 году. 4 чэрвеня затрымалі ў Бранску. 6 чэрвеня яго адпусьцілі, а ўначы з 7 на 8 чэрвеня ён быў затрыманы на беларуска-украінскай мяжы. Пасьля яго даставілі ў РАУС Добрушу.

Па словах адваката Заікіна, калі Амрыева выпусьцяць, ён вернецца ў Расею.

«Я лічу, неабходна вярнуцца ў Расейскую Фэдэрацыю. Закрыць пытаньне зь яго незаконным перасьледам і на законных падставах зьехаць. Сесьці на самалёт або цягнік».

Свабода працягвае сачыць за сытуацыяй вакол Амрыева на месцы падзеяў.

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG