Пра гэта паведаміў Радыё Свабодная Эўропа / Радыё Свабода прадстаўнік плятформы 14 кастрычніка.
Украінская Trophylab была прэзэнтаваная ў чэрвені як «агульная прастора для дасьледаваньняў варожай зброі». Яна надае аналітычныя матэрыялы аб трафэйнай зброі ўкраінскім і замежным структурам.
Аналітыкі кажуць, што высокі міжнародны інтарэс да плятформы можа істотна ўплываць на ВПК Расеі.
Анна Гарві, навуковы супрацоўнік Амэрыканскай рады замежнай палітыкі, заявіла Радыё Свабодная Эўропа / Радыё Свабода, што, акрамя заяўленай мэты плятформы — дапамагаць распрацоўваць контразахады супраць асобных расейскіх узбраеньняў, падобна, некаторыя кампаніі, якія выкарыстоўваюць Trophylab, будуць «рэканструяваць расейскія тэхналёгіі на падставе захопленых Украінай узораў».
Яна прагназуе, што такія копіі могуць стаць «беспасярэднімі канкурэнтамі расейскіх вытворцаў, якія прадаюць узбраеньне за мяжу».
Гарві таксама дадала, што замежныя арганізацыі, якія, магчыма, вывучалі патэнцыйныя закупкі зброі ў Расеі, цяпер могуць ацаніць, «як гэтыя сыстэмы рэальна працуюць на полі бою», а не спадзявацца на расейскія тэхнічныя характарыстыкі гэтых вырабаў.
У Trophylab захоўваюцца ўзоры больш як 200 захопленых адзінак узбраеньня, у тым ліку расейскай гіпэргукавай ракеты «Кінжал», танка Т-90М і паўночнакарэйскай балістычнай ракеты КН-23. Тыя, хто мае доступ, могуць падаць заяўку на атрыманьне ўзораў тэхнікі для фізычных выпрабаваньняў да «поўнага зьнішчэньня», калі гэта трэба.
Карыстальнікі заладоўваюць на партал вынікі дасьледаваньняў; там іх правяраюць на «адпаведнасьць патрабаваньням, унікальнасьць і навуковую каштоўнасьць», пасьля чаго адкрываюць для прагляду ўсім карыстальнікам плятформы.
Неўзабаве пасьля запуску плятформы Trophylab заявак на доступ ад украінскіх і замежных арганізацыяў было прыкладна пароўну, аднак да жніўня сытуацыя зьмянілася: паступіла каля 130 заявак з Украіны і больш за 300 — з-за мяжы.
Міністэрства абароны Ўкраіны тады не паведаміла, колькі заяўнікаў атрымалі доступ да плятформы. Прадстаўнік Trophylab адмовіўся ўдакладніць, колькі замежных дзяржаваў маюць такі доступ. Аднак, паводле зьвестак арганізацыі, на ўзроўні дзяржаўных ведамстваў доступ абмежаваны 28 дзяржавамі, якія падпісалі з Украінай пагадненьні ў сфэры бясьпекі й іншыя дамоўленасьці.
Узброеныя сілы розных краін ужо даўно абменьваюцца з хаўрусьнікамі на дзяржаўным узроўні зьвесткамі «тэхнічнай выведкі ўзбраеньняў»; гэта тычыцца і абодвух бакоў вайны ва Ўкраіне. Расея, з свайго боку, перадала Паўночнай Карэі захопленыя ўзоры вайсковай тэхнікі NATO, а таксама, як паведамляюць, адправіла сучасныя заходнія ўзбраеньні Тэгерану.
Аднак экспэрты адзначаюць, што падыход Trophylab — своеасаблівая «дэмакратызацыя», якая дазваляе невялікім стартапам выкарыстоўваць тыя ж дасьледчыя дадзеныя, што і міністэрствам абароны, можа істотна паскорыць распрацоўку ўзбраеньняў у краінах, якія маюць доступ да гэтай інфармацыі.
У ліпеньскім інтэрвію аўстралійскі генэрал-маёр у адстаўцы Гас Маклахлан адзначыў:
«TrophyLab упершыню робіць [дасьледаваньні захопленых узбраеньняў] шырока даступнымі для інавацыйных арганізацыяў, тэхналягічных кампаніяў і абароннай прамысловасьці ў цэлым — такога мы яшчэ ня бачылі».
