Лінкі ўнівэрсальнага доступу

Навошта ўлады ўтойваюць зьвесткі аб прыбытках кандыдатаў у дэпутаты


Ілюстрацыйнае фота

Падобна, што ўлады наўмысна ўтойваюць зьвесткі аб прыбытках кандыдатаў у дэпутаты мясцовых саветаў. Складаецца ўражаньне, што ў камісіях разумеюць: лічбы прыбыткаў праўладных кандыдатаў выклікаюць раздражненьне ў звычайных выбарнікаў.

Пра тое, як гэта робіцца на Берасьцейшчыне і Гарадзеншчыне, расказваюць карэспандэнты Свабоды.

Гарадзеншчына: дэклярацыі аб даходах кандыдатаў у дэпутаты зьніклі з сайтаў газэт і выбарчых камісій

Назіральнікі і апазыцыйныя кандыдаты схільныя лічыць, што гэта робіцца невыпадкова. Прыбыткі многіх кандыдатаў могуць настроіць супраць іх выбарнікаў.

Выбарчы пікет у Горадні
Выбарчы пікет у Горадні

«На сайт вывешваць інфармацыю мы не абавязаныя. І ўсё»

Напачатку зьвесткі пра даходы кандыдатаў — як у раённыя, так і ў абласныя саветы — былі апублікаваныя ў раённых газэтах. Гэтая ж інфармацыя была зьмешчана і на сайтах — і раённых газэт, і акруговых камісій. Але адразу пасьля публікацый яна з сайтаў пазьнікала.

Сакратар Гарадзенскай абласной выбарчай камісіі Андрэй Кухто заявіў Свабодзе, што на сайце абласной камісіі зьвестак аб прыбытках кандыдатаў у дэпутаты не было.

«На паседжаньні абласной выбарчай камісіі 22 сьнежня было прынята рашэньне №11 — „вызначыць, што зьвесткі аб даходах і маёмасьці кандыдатаў у дэпутаты накіроўваюцца ў друк для апублікаваньня разам з паведамленьнем аб рэгістрацыі кандыдата ў дэпутаты“. На сайт вывешваць інфармацыю мы не абавязаныя», — сказаў Кухто.

Ён дадаў, што сайты могуць самі вырашаць, публікаваць ці не зьвесткі пра даходы і маёмасьць кандыдатаў, забароны не было. Але на сайце абласной камісіі іх вырашылі не публікаваць. Маўляў, хто хоча даведацца — знойдзе газэту.

«Паміж выбарчымі камісіямі і выбарнікамі адсутнічае важнае зьвяно — свабодная прэса…»

Праваабаронца Віктар Сазонаў, які вядзе назіраньне за выбарчай кампаніяй, кажа, што зь юрыдычнага пункту гледжаньня кандыдаты ў дэпутаты адказнасьці за публікацыю не нясуць. Яны павінны толькі запоўніць дэклярацыю і прадставіць яе ў выбарчую камісію. Далей дзейнічаюць іншыя мэханізмы.

Віктар Сазонаў, архіўнае фота
Віктар Сазонаў, архіўнае фота

Паводле Сазонава, дэклярацыі большасьці кандыдатаў, якія балятуюцца ў народныя абраньнікі ў асноўным па безальтэрнатыўных акругах, глядзеліся вельмі нясьціпла на тле таго, якія даходы маюць збольшага выбарнікі. Месячны заробак некаторых чыноўнікаў складае ад тысячы даляраў да двух, а іх падначаленыя ў той самы час атрымліваюць 200–250 даляраў. І гэта, на думку Сазонава, некаму разанула вока, нават нягледзячы на тое, што гэта афіцыйна заробленыя грошы.

«Камісіі спраўдзілі зьвесткі пра кандыдатаў і апублікавалі іх на старонках газэт. Але далей у ланцужку ад камісій да выбарнікаў адсутнічае адно вельмі важнае зьвяно — свабодная прэса. Амаль уся інфармацыя ад выбарчых камісій, як правіла, публікуецца ў афіцыйных СМІ. А афіцыйныя журналісты непатрэбных пытаньняў не задаюць», — кажа Сазонаў.

Ня варта спадзявацца, што выбарнікі нечага не разумеюць

Кандыдат у дэпутаты Смаргонскага райсавету Алесь Дзергачоў зьнікненьне дэклярацый з сайтаў газэт і акруговых камісій успрыняў іранічна. Мабыць, таму, што ён адзіны кандыдат у раёне, які будзе змагацца за мандат дэпутата на альтэрнатыўнай аснове. Усе астатнія акругі безальтэрнатыўныя.

Алесь Дзергачоў
Алесь Дзергачоў

«Дзіўна, што нехта спадзяецца на тое, што выбарнікі нічога не разумеюць, не заўважаць, не пацікавяцца. Я стаю на пікетах амаль штодня і бачу, хто чым цікавіцца, пра што гаворыць. Большасьць выбарнікаў добра арыентуюцца ў тым, як адбываюцца выбары, як ад іх хаваюць інфармацыю…» — перакананы Дзергачоў.

Дзергачоў заўважае, што, праглядаючы сьпіс кандыдатаў у безальтэрнатыўных акругах, найчасьцей сустракаў такія пасады прэтэндэнтаў: дырэктар, старшыня, начальнік. Пераважная большасьць кандыдатаў — гэта людзі з высокімі дзяржаўнымі пасадамі.

«Магу сказаць, што ва ўсім раёне самы нізкі прыбытак сярод кандыдатаў у дэпутаты ў мяне. Зразумела, што я пэнсіянэр, а там людзі, якія яшчэ працуюць. Але ўражвае, наколькі іх заробкі, прыбыткі адрозьніваюцца ад таго, што маюць звычайныя выбарнікі. Гэта не магло не застацца незаўважаным», — перакананы Дзергачоў.

Берасьцейшчына: зьвесткі пра маёмасьць кандыдатаў — пад грыфам «сакрэтна»

Выбарчыя камісіі на Берасьцейшчыне адмаўляюцца дадаткова прадстаўляць зьвесткі аб прыбытках кандыдатаў у дэпутаты. Згодна з заканадаўствам камісіі вызначаюць, якім чынам будзе агучана інфармацыя пра маёмасьць кандыдатаў: або праз публікацыі ў мясцовай прэсе, або ў інфармацыйных улётках. Але на запыты журналістаў ці кандыдатаў аб прадстаўленьні такой інфармацыі ў мясцовых выбарчых камісіях гучаць адмовы.

На звароты ў выбарчыя камісіі Івацэвіцкага, Бярозаўскага, Камянецкага і Пружанскага раёнаў з просьбай агучыць інфармацыю пра гадавы прыбытак кандыдатаў праваабаронцам адмовілі. Камісіі вырашылі, што зьвесткі пра маёмасьць ахвотных стаць дэпутатамі будуць апублікаваныя толькі ў інфармацыйных улётках, якія разьмесьцяць непасрэдна на выбарчых участках.

Сяржук Русецкі
Сяржук Русецкі

«У Бярозаўскім раёне выбарчыя камісіі прымаюць рашэньне пра тое, каб не публікаваць у мясцовай прэсе інфармацыю пра прыбыткі кандыдатаў, ужо ня першы раз. З аднаго боку, гэта нібы і не парушэньне, бо, паводле Выбарчага кодэксу, камісіі могуць самастойна вырашаць такія пытаньні. Але, зь іншага боку, старшыня Цэнтральнай выбарчай камісіі кажа, што выбары павінны быць максымальна празрыстыя і адкрытыя. Аднак камісіі вырашаюць на месцах па-свойму», — кажа Сяржук Русецкі, праваабаронца зь «Вясны».

Са слоў Леаніда Дубаносава, жыхара гораду Мікашэвічы Лунінецкага раёну, у мясцовай прэсе ня быў апублікаваны нават сьпіс асобаў, якія зарэгістраваліся ў якасьці кандыдатаў у дэпутаты.

«Не было ў нашай раёнцы дакладных зьвестак пра прыбыткі кандыдатаў. Калі не памыляюся, то нават на ўлётках, што разьвешваюцца на выбарчых участках, таксама няма інфармацыі такога кшталту», — кажа кандыдат у дэпутаты, сябра Беларускай сацыял-дэмакратычнай партыі (Грамада) Леанід Дубаносаў.

А вось у Берасьці інфармацыі пра маёмасьць кандыдатаў у дэпутаты на інфармацыйных улётках наагул ня будзе. Тут камісія пастанавіла апублікаваць зьвесткі толькі ў мясцовай дзяржаўнай газэце.

Ігар Маслоўскі
Ігар Маслоўскі

«Падаецца, што камісіі прынялі рашэньне пра тое, каб інфармацыя аб прыбытках кандыдатаў была надрукавана толькі і выключна ў дзяржаўных газэтах. А вось ва ўлётках такой інфармацыі ня будзе. Гэта прывядзе да таго, што яшчэ меней людзей даведаюцца пра маёмасьць. Я быў на паседжаньні камісіі, і калі нічога не пераблытаў, то так выглядае сытуацыя», — кажа Ігар Маслоўскі, старшыня Берасьцейскай абласной філіі Беларускай сацыял-дэмакратычнай партыі (Грамада).

Многія лічаць,што абмежаваньне інфармацыі пра маёмасьць кандыдатаў абумоўлена галоўным чынам тым, што многія кандыдаты ў дэпутаты — кіраўнікі дзяржаўных устаноў. А выбарнікі, якія праглядаюць інфармацыю пра кандыдатаў, зьвяртаюць увагу найперш на маёмасьць і заробкі кіраўнікоў. Многіх такая інфармацыя можа абураць.

«На мой погляд, цяпер назіраецца значны разрыў у заробках звычайных жыхароў і кіраўніцтва, начальства, якое ў тым ліку і балятуецца на выбарах. Таму ўлады імкнуцца прыхаваць гэтую інфармацыю. Справа ў тым, што заробкі начальства істотна перавышаюць заробкі жыхароў мястэчак і гарадоў вобласьці», — лічыць Ігар Маслоўскі.

Ваша меркаваньне

Паказаць камэнтары

XS
SM
MD
LG