Лінкі ўнівэрсальнага доступу

Напярэдадні «Сьвята незалежнасьці» ў Менску будзе сьнег, але 25 сакавіка — у 100-ю гадавіну абвяшчэньня незалежнасьці Беларускай Народнай Рэспублікі — у Менск прыйдзе вясновае надвор’е, прагназуюць сыноптыкі.

24 сакавіка па Беларусі прагназуюць +5..+8°С, слабы вецер, воблачнае з праясьненьнямі надвор’е без ападкаў. У Менску плянуецца мітынг-канцэрт КХП БНФ у Кіеўскім сквэры, дзе выступіць Зьміцер Вайцюшкевіч і іншыя сьпевакі, абяцаюць +2..+4°С.

Ноч на 25 сакавіка будзе ў Беларусі халоднай — ад —1 да —8°С, удзень — +2..+9°С, на захадзе да +11°С, умераны вецер і адсутнасьць ападкаў. Але менавіта 25-га, як піша «Минск-новости», у Менск прыйдзе «сапраўдная фэналягічная вясна».

У Менску ўдзень 25 сакавіка прагназуюць хмарнае надвор’е, +4..+6°С, паўднёва-заходні вецер у 6–8 м/с з парывамі да 11 м/с, ціск у 759 мм рт.сл. і вільготнасьць у 60%.

Хадзіць па газонах, ня ныць, натхняць адзін аднаго — усе пытаньні пра Дзень Волі каля Опэрнага

На канцэрце 25 сакавіка ў Менску маюць выступіць гурты Akute, Dzieciuki, «Мутнаевока» і «Разьбітае сэрца пацана», сьпевакі Ігар Варашкевіч, Кася Камоцкая, Пятро Клюеў і Юры Стыльскі, музычная праграма «Сьпеўнага сходу» і выступ актораў «Свабоднага тэатру», бліжэй да сьвята будуць анансаваныя таксама іншыя выступоўцы. Дачка Лявона Вольскага Адэля Вольская засьпявае песьні бацькі.

Лявон Вольскі мае сьпяваць 25 сакавіка ў Беластоку (канцэрт там быў заплянаваны яшчэ мінулым летам, арганізатары вырашылі яго не пераносіць), але таксама выступіць на менскім канцэрце праз тэлемост.

У іншых гарадах на імпрэзах 25 сакавіка выступяць гурты :B:N:, Handmade, N.R.M., Re1ikt і іншыя.

Бывала горш, ды й рыхтаваліся да горшага

Калі прагноз спраўдзіцца, гэта будзе далёка ня самы цёплы і далёка ня самы халодны дзень 25 сакавіка ў Менску: за апошнія дзесяць год бывала і +16°С, і –2°С, некалькі шэсьцяў на Дзень Волі праходзілі пад сьнегам.

Ранейшыя доўгатэрміновыя прагнозы замежных мэтэаролягаў былі менш аптымістычныя: каля +2°С і лёгкі сьнег. Але арганізатары сьвята тады казалі, што гатовыя і да такога: сцэна будзе крытая і мае фармавацца мае пад умовы надвор’я, ставіць яе будуць надзейныя спэцыялісты.

***

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG