Паводле слоў міністра, якія прыводзіць тэлерадыёкампанія LRT, пакуль няма дакладнай інфармацыі, што ПВК, якую ўзначальвае Яўген Прыгожын, «перабралася ў Беларусь», аднак выключаць такую імавернасьць нельга.
«Зьяўленьне аднаго чалавека — Прыгожына — у Беларусі не ўплывае на сытуацыю зь бясьпекай. На сытуацыю паўплывае зьяўленьне ягонай арміі, — лічыць кіраўнік зьнешнепалітычнага ведамства балтыйскай дзяржавы. — Ёсьць такая імавернасьць, што байцы „Вагнэра“ і база, дзе яны будуць трэніравацца, а магчыма, і рыхтавацца да апэрацый, зьявіцца побач зь Літвой, каля мяжы з NATO. Гэта адназначна зьмяніла б нашу сытуацыю зь бясьпекай».
У любым выпадку, зазначыў міністар, «небясьпеку для Літвы становіць сама нявызначанасьць сытуацыі ў Расеі».
«Я думаю, што самая вялікая небясьпека паходзіць ад таго, што Расея ясна паказала, што яна непрадказальная дзяржава, якая не кантралюе свае Ўзброеныя сілы. Найбольшая небясьпека пасьля гэтых выходных паходзіць ад фактару непрадказальнасьці», — падкрэсьліў кіраўнік літоўскага МЗС.
26 чэрвеня Дзяржаўная рада абароны Літвы заявіла пра неабходнасьць узмацніць бясьпеку ўсходніх межаў краіны і NATO. Прэзыдэнт Гітанас Наўседа ня выключыў замацаваньня вагнэраўцаў на тэрыторыі Беларусі. Удзельнікі пасяджэньня зьвярнулі ўвагу на рост «пагрозы незаконнай дзейнасьці на літоўска-беларускай мяжы, а таксама розных правакацый».
Дзяржаўная рада абароны даручыла структурам выведкі «аддаваць яшчэ больш увагі збору інфармацыі» ў Беларусі і Калінінградзкай вобласьці Расеі.
Наўседа заклікаў вярнуцца «да ўжо ўнесенай прапановы аб прымяненьні працэдуры індывідуалізаванай дадатковай праверкі» адносна грамадзян ня толькі РФ, але і Беларусі.
23 чэрвеня заснавальнік ПВК «Вагнэр» фактычна ініцыяваў працэс вайсковага перавароту ў РФ. У выніку дамоўленасьцяў, у тым ліку з Лукашэнкам, яго ўдалося спыніць. Пуцін дазволіў Прыгожыну «сысьці ў Беларусь». Ягонае знаходжаньне ў Беларусі 27 чэрвеня пацьвердзіў Лукашэнка.
Спроба ўзброенага мяцяжу ў Расеі. Асноўнае
- Увечары 23 чэрвеня кіраўнік ПВК «Вагнэр» Яўгеній Прыгожын заявіў, што міністэрства абароны РФ нанесла ракетныя ўдары па тылавых лягерах наймітаў і што «зло, якое нясе вайсковае кіраўніцтва краіны, будзе спынена».
- Міністэрства абароны Расеі назвала гэтыя словы «інфармацыйнай правакацыяй».
- Уначы Прыгожын паведаміў, што байцы «Вагнэра» ўвайшлі ў Расею з акупаваных раёнаў Ўкраіны.
- Раніцай 24 чэрвеня Прыгожын заявіў, што ПВК «Вагнэр» увайшла ў Растоў-на-Доне і ўзяла пад кантроль вайсковыя аб’екты Растова, у тым ліку аэрадром.
- Пазьней Прыгожын заявіў і пра ўзяцьце пад кантроль вайсковых абʼектаў у Варонежы.
- У Маскоўскай, Растоўскай і Варонескай вобласьцях РФ увялі надзвычайныя захады бясьпекі.
- У Расеі завялі крымінальную справу аб узброеным мяцяжы.
- Пуцін у ранішнім звароце заявіў, што «Расею мяцяжом спрабуюць штурхаць да паразы і капітуляцыі» і што «дзеяньні супраць мяцежнікаў будуць жорсткімі».
- Кіраўнік дэпартамэнту нацыянальнай бясьпекі ў складзе Аб’яднанага пераходнага кабінэту Валер Сахашчык у сувязі з падзеямі ў Расеі заклікаў беларусаў «выкарыстаць гістарычны шанец».
- Лідэрка дэмакратычных сілаў Беларусі Ціханоўская заклікала дыпляматаў і сілавікоў не выбіраць паміж Пуціным і Прыгожыным, а вайскоўцаў — выгнаць войскі Расеі зь Беларусі.
- Аб’яднаны пераходны кабінэт заявіў, што «дэнансуе палітычныя і ваенныя дамовы з Расеяй» і аб’яўляе аб выхадзе Беларусі з АДКБ, ЭАЭС і СНД.
- Полк Каліноўскага заклікаў грамадзянаў Беларусі рыхтавацца да «вызваленьня ад дыктатуры і акупацыі»
- Прэс-служба Аляксандра Лукашэнкі ўвечары 23 чэрвеня напісала, што той угаварыў заснавальніка ПВК «Вагнэр» Яўгенія Прыгожына спыніць прасоўваньне да Масквы.
- Пазьней Прыгожын заявіў аб завяршэньні марша і вяртаньні баевікоў у палявыя лягеры.
- Пазьней зьявілася навіна аб тым, што Прыгожын паедзе ў Беларусь, а крымінальную справу ў РФ супраць яго спыняць.
- 26 чэрвеня у Генпракуратуры Расеі паведамілі, што справу супраць Прыгожына не спынілі.
- 27 чэрвеня Аляксандар Лукашэнка пацьвердзіў прылёт у Беларусь кіраўніка ПВК «Вагнэр» Яўгенія Прыгожына. Найміты ПВК «Вагнэр», паводле Лукашэнкі, будуць працаваць у Беларусі інструктарамі, ім прапанавалі ў распараджэньне закінутую вайсковую частку.
- 2 ліпеня ПВК «Вагнэр» абвясьціла, што на месяц прыпыняе вэрбоўку ў свае шэрагі. Гэта патлумачылі часовым няўдзелам групоўкі ў вайне супраць Украіны і «пераездам у Рэспубліку Беларусь».
- У сярэдзіне ліпеня байцы ПВК сталі калёнамі прыбываць у лягер каля вёскі Цэль. Міністэрства абароны Беларусі абвясьціла пра сумесныя трэнаваньні на палігоне «Берасьцейскі».
- Былы лідэр прарасейскіх сэпаратыстаў на Данбасе Ігар Стралкоў-Гіркін у сваім тэлеграм-канале, спасылаючыся на аднаго з камандзіраў ПВК «Вагнэр», кіраўніка штабу з пазыўным «Маркс», паведаміў, што ў Беларусь прыбудзе да 10 тысяч байцоў «Вагнэру».
- Агулам у Беларусь прыехалі 12 калёнаў наймітаў. Там была і будаўнічая тэхніка.
- 23 жніўня, як паведаміла Расавіяцыя, Яўгеній Прыгожын загінуў у разьбітым самалёце пад Цьверру. Разам зь ім там быў адзін з камандзіраў ПВК «Вагнэр» Дзьмітрый Уткін.
