Дзяржаўнае аб’яднаньне «Белкаапсаюз» разьвівае сеткі хуткага харчаваньня з нацыянальным калярытам — гэта «ЛепимСами», «Еда&Кофе», TASTY, «Гастролавка». Кожны зь сеткавых брэндаў арыентаваны на пэўны асартымэнт страў і кулінарных вырабаў, расказаў БелТА старшыня праўленьня арганізацыі Алег Мацкевіч.
Сетка «ЛепимСами» — гэта 11 кавярняў па ўсёй краіне, дзе прадаюць пяльмені, варэнікі, бліны, смажанкі, піцы.
Сетка з 43 кавярняў «Еда&Кофе» прапануе каву, дэсерты, стравы беларускай кухні.
Сетка TASTY з 8 устаноў арыентавана на моладзь, у ёй гатуюць гамбургеры, чызбургеры, бульбу фры, а таксама дранбургеры і бульбяную піцу — стравы з нацыянальным калярытам.
«Белкаапсаюз» таксама пачынае разьвіваць новы брэнд — «Гастролавка». Па словах Алега Мацкевіча, гэта сучасны аналяг савецкіх «Кулінарый» з абедзеннай зонай і пякарняй. Пакуль у Менскай вобласьці запусьцілі 3 такія аб’екты. У плянах — адкрыцьцё новых пунктаў грамадзкага харчаваньня.
Тры з чатырох новых сетак пунктаў харчаваньня «зь беларускім нацыянальным калярытам» названыя па-расейску, адна — па-ангельску.