Пра гэта піша «Позірк» з спасылкай на LRT.
Адзначаецца, што гэта — «частка мераў па ўмацаваньні [мяжы], узгодненых у ліпені мінулага году».
«Працы зьяўляюцца часткай падрыхтоўкі да стварэньня лініі абароны Балтыйскага мора ўздоўж межаў з Расеяй і Беларусьсю. У рамках пляна масты абсталёўваюцца інжынэрнымі канструкцыямі для мацаваньня выбуховых рэчываў», — гаворыцца ў публікацыі.
«Масты і дарогі выбіраюцца з улікам разьмяшчэньня прыродных перашкод і іх стратэгічнай важнасьці для сыстэмы абароны Літвы», — прыводзіць партал паведамленьне Узброеных сілаў.
Заяўляецца, што літоўскія вайскоўцы «ўжо стварылі некалькі дзясяткаў пунктаў паблізу мяжы для захоўваньня процітанкавых і іншых загарод, таксама вядуцца работы па пасадцы дрэў для абароны ключавых дарог».
Акрамя гэтага, праводзіцца «паглыбленьне ірыгацыйных каналаў, якія будуць служыць траншэямі і дадатковымі супрацьтанкавымі загародамі».
27 сьнежня паведамлялася аб выхадзе Літвы з Канвэнцыі аб забароне супрацьпяхотных мін.
Міністэрства нацыянальнай абароны Літвы раней паведаміла, што Вільня пачне перамовы аб магчымасьці закупкі або вытворчасьці супрацьпяхотных мін.
У верасьні стала вядома, што літоўскія вайскоўцы завяршаюць умацаваньне падʼязных шляхоў да памежных пераходаў на мяжы зь Беларусьсю і Расеяй. На мяжы ўсталёўваюцца так званыя «зубы дракона», злучаныя адмысловымі тросамі.
Раней стала вядома, што літоўскія вайскоўцы ўсталявалі дадатковыя загароды ў закрытых пунктах пропуску на мяжы зь Беларусьсю і Расіяй.
«Устаноўленыя загароды — гэта толькі частка вялікай, цэласнай карціны. Мы пачнём з тактычнага ўзроўню — канкрэтных перашкод на мяжы, а затым абʼяднаем увесь інжынэрны сцэнар у адзіную канцэптуальную сыстэму», — заявіў камандуючы Узброенымі сіламі Літвы Раймундас Вайкшнарас.
Прынятыя меры накіраваныя на «зьніжэньне пагрозы сухапутнага ўварваньня і абмежаваньне магчымых дзеяньняў варожых дзяржаў на сушы», адзначалі Узброеныя сілы.
У студзені 2024 году кіраўнікі вайсковых ведамстваў краін Балтыі ўхвалілі канцэпцыю будаўніцтва абарончых збудаваньняў на межах з Расеяй і Беларусьсю, закліканых абмежаваць мабільнасьць войскаў праціўніка.
Літва, Латвія і Польшча бесьперапынна ўмацоўваюць межы зь Беларусьсю і Расіяй, баючыся вайсковага ўварваньня на сваю тэрыторыю, аналягічнага распачатай у лютым 2022 году агрэсіі супраць Украіны. У Менску гэтыя і іншыя абарончыя захады краін-суседзяў рэгулярна называюць «мілітарызацыяй» і «падрыхтоўкай да вайны».
Форум