Расейскія прапагандысцкія тэлеграм-каналы распаўсюдзілі відэазапіс з падрывам дарогі, якая вяла да помніку «Тры сястры», пастаўленага ў 1975 годзе на месцы, дзе сыходзяцца межы трох краін — Расеі, Беларусі і Ўкраіны.
У камэнтарах да гэтага відэазапісу дарогу да помніку, які быў сымбалем дружбы трох народаў, назвалі «танканебясьпечным кірункам», які ўкраінцы маглі нібыта выкарыстаць для атакі на расейскую тэрыторыю. Імаверна, што гэта зрабілі расейскія войскі пасьля рэйду добраахвотніцкага легіёну «Свабода Расеі» у Белгарадзкую вобласьць.
Прадстаўнікі міжнароднай валянтэрскай супольнасьці GeoConfirmed пацьвердзілі месца ўдару — участак побач з помнікам недалёка ад вёскі Сенькаўка Чарнігаўскай вобласьці. Аднак дакладна вызначыць маштабы разбурэньня дарогі па гэтым відэазапісе немагчыма.
Ва Ўкраіне паведамілі, што падрыў дарогі Чарнігаў – Бранск адбыўся 30 траўня па абедзе.
«Учора на Чарнігаўшчыне нарады Дзяржаўнай памежнай службы ў абед зафіксавалі выбух, які адбыўся ў кірунку стыку трох краін. Потым вызначылі, што расейскія акупанты падарвалі дарогу Чарнігаў – Бранск», – паведаміў выданьню «Українська правда» сьпікер Дзяржаўнай памежнай службы Ўкраіны Андрэй Дземчанка.
Улады Ўкраіны летась у траўні, на 78-ы дзень поўнамаштабнага ваеннага ўварваньня Расеі, заявілі, што пачалі дэмантаж помніка «Тры сястры» — яго зьнялі з уліку помнікаў мясцовага значэньня і накіравалі адпаведныя дакумэнты ў Міністэрства культуры і інфармацыйнай палітыкі. Але, як відаць на распаўсюджаным відэазапісе, помнік пакуль ня зьнесьлі. Магчыма, што ў той раён няма доступу праз штодзённыя абстрэлы памежжа Чарнігаўскай вобласьці.
Генэральны штаб Узброеных сіл Украіны раніцай 31 траўня паведаміў, што расейцы цягам мінулага дня з артылерыі і мінамётаў абстрэльваў населеныя пункты Хрэнаўка, Карповічы, Янжулаўка і Лявонаўка Чарнігаўскай вобласьці.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
