Прэзыдэнт Украіны Ўладзімір Зяленскі заявіў, што ў выніку мэтанакіраванага зьнішчэньня Расеяй украінскай электраэнэргетыкі безь сьвятла застаюцца 4,5 мільёна спажыўцоў у дзесяці абласьцях і ўкраінскай сталіцы.
«Перажыць расейскі энэргатэрор, прайсьці і такое выпрабаваньне — гэта наша нацыянальная задача, адна з асноўных пагроз. Сам факт, што Расея пачала тэрор супраць энэргетыкі, сьведчыць пра слабасьць ворага. Яны ня могуць перамагчы Ўкраіну на полі бою і таму намагаюцца вось так зламаць нашых людзей — прынізіць украінцаў, ударыць па духу нашага народу, па супраціву нашых людзей. Веру, што Расеі гэта ня ўдасца», — заявіў Уладзімір Зяленскі.
Паводле яго, на вечар 3 лістапада без электрычнасьці засталіся 4,5 мільёна украінцаў у Кіеве і яшчэ дзесяці абласьцях — Кіеўскай, Днепрапятроўскай, Жытомірскай, Запароскай, Сумскай, Кіраваградзкай, Харкаўскай, Чарнігаўскай, Хмяльніцкай і Чаркаскай.
У Кіеве на дарогах адключаныя сьвятлафоры. На складаных скрыжаваньнях аўтамабільны рух рэгулюе патрульная паліцыя.
Мэр Кіева Віталь Клічко паведаміў, што на раніцу 4 лістапада ў сталіцы 450 тысяч спажыўцоў застаюцца без электрычнасьці.
«Гэта ў паўтара раза больш, чым у папярэднія дні. Стабілізацыйныя адключэньні адбываюцца з прычыны перагрузкі цэнтральнага вузла энэргасыстэмы краіны», — адзначыў Віталь Клічко.
Расея з 10 кастрычніка мэтанакіравана наносіць удары па аб’ектах інфраструктуры, найперш па энэргетычных, якія забясьпечваюць спажыўцоў ня толькі электраэнэргіяй, але і цяплом.
Перад надыходам зімы гэта асабліва небясьпечна, калі ўсё больш грамадзян застаюцца без жытла, а тыя, хто з жытлом, — безь цяпла, сьвятла і вады.
Пад рызыкай сацыяльныя аб’екты і найперш — мэдычныя ўстановы. Толькі за два дні ў кастрычніку Расея зьнішчыла больш як 40% энэргетычнай генэрацыі Ўкраіны, і амаль 50 % — цеплавой. Але гэта пакуль не спыніла Расею. Кожны панядзелак ва Ўкраіне пачынаецца з масавых атак расейцаў на электрастанцыі, падстанцыі і ЦЭЦ.
У такіх умовах украінскія энэргетыкі спрабуюць зрабіць усё магчымае, каб аднавіць энэрга-, вода- і цеплазабесьпячэньне.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
