Сьцьвярджаецца, што штурм населенага пункту Сіроціна быў адбіты, а ў пасёлку Мяцёлкіна расейскія вайскоўцы дабіліся «частковага посьпеху, спрабуюць замацавацца».
Кіраўнік Чачні Рамзан Кадыраў заявіў у нядзелю аб узяцьці пасёлка Мяцёлкіна пад кантроль і вялікіх стратах украінскіх войскаў. Раней ён заяўляў аб узяцьці самога гораду Севераданецк, аднак там працягваюцца баі.
Севераданецк і суседні Лісічанск — апошнія буйныя населеныя пункты Луганскай вобласьці пад кантролем Украіны. Яны застаецца найболей напружаным месцам баявых дзеяньняў. Вулічныя баі ў Севераданейку працягваюцца ўжо некалькі тыдняў. Большая частка жылой забудовы цяяпер пад кантролем расейскіх вайскоўцаў, украінскія вайскоўцы ўтрымліваюць пазыцыі вакол заводу «Азот».
Расея перакідвае пад Севераданецк вялікія рэзэрвы зь іншых напрамкаў, каб паспрабаваць нарэшце цалкам захапіць горад, заявіў кіраўнік Луганскай абласной адміністрацыі Сяргей Гайдай.
У суботу сэпаратысты «ДНР», якія падтрымліваюцца Расеяй, і карэспандэнты расейскіх СМІ паведамляюць аб шматлікіх абстрэлах Данецку. Паводле сьцьвярджэньняў сэпаратыстаў, па горадзе было, апроч іншага, выпушчана каля 20 снарадаў з артылерыі, пастаўленай Украіне краінамі NATO. Незалежнага пацьверджаньня гэтага няма, украінскі бок абстрэлы не камэнтаваў. Паводле дадзеных сэпаратыстаў, у Данецку загінулі 5 мірных жыхароў, ёсьць параненыя.
Паводле дадзеных украінскіх уладаў, расейскія вайскоўцы ў суботу абстралялі газаперапрацоўчае прадпрыемства ў Харкаўскай вобласьці, узьнік маштабны пажар. Пра ахвяры не паведамляецца. У тэлеграм-каналах таксама зьявіліся фота слупа дыму, які падняўся пасьля яшчэ аднаго ўдару — як паведамляецца, у Днепрапятроўскай вобласьці. Аб тым, які аб’ект быў паражоны, пакуль няма інфармацыі.
Ёсьць паведамленьні і аб ракетных ударах па Мікалаеве.
Сёньня 115-ы дзень расейскага паўнамаштабнага ўварваньня ва Ўкраіну.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў.
- Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка даў інтэрвію расейскай прапагандыстцы Вользе Скабеевай, зь якога вынікала, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 1 жніўня Лукашэнка сказаў, што больш як палова тактычнай ядзернай зброі, якую заплянавана разьмясьціць на беларускай тэрыторыі, ужо «завезена і разгрупавана» па краіне. Ён ня раз заяўляў, што ўжыве ядзерную зброю ў выпадку агрэсіі супраць Беларусі.
- У чэрвені 2023 году ўкраінскія войскі пачалі контранаступальныя апэрацыі на ўсходзе і поўдні краіны. Расейскія войскі падрыхтавалі добра ўмацаваныя лініі абароны, таму прасоўваньне контранаступу ішло са значнымі стратамі.
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы правялі некалькі масавых абстрэлаў украінскіх гарадоў, у Дніпры, Кіеве, Харкаве і іншых месцах дзясяткі людзей загінулі і атрымалі раненьні. Украінскі бок у адказ абстраляў расейскі Белгарад, некалькі чалавек загінулі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў