Дзень расейскага ўварваньня ва Ўкраіну зьмяніў усё, таму Бэрлін мяняе палітыку ў сфэры бясьпекі, цытуе Бэрбак DW.
Вайна Расеі супраць Украіны зьяўляецца пераломным гістарычным момантам, упэўнена кіраўніца МЗС Нямеччыны Анналена Бэрбак. Прыняўшы рашэньне ўварвацца ва Ўкраіну, прэзыдэнт РФ Уладзімір Пуцін «разбурыў усё, што пабудавалі некалькі пакаленьняў у Эўропе і Расеі», — заявіла яна ў інтэрвію нямецкай газэце Rheinische Post, апублікаваным у аўторак, 3 траўня. Паводле слоў Бэрбак, яе пакаленьню «пашчасьціла вырасьці ў міры».
«Пасьля 24 лютага, дня, які зьмяніў усё, мы павінны перабудаваць нашу палітыку. Вось чаму мы ў Нямеччыне перафармулюем нашу нацыянальную стратэгію ў сфэры бясьпекі», — сказала Бэрбак. Яна падкрэсьліла неабходнасьць мець магчымасьць абараняць эўрапейскі лад і сьветапогляд.
«Мы павінны зноў павялічыць інвэстыцыі ва ўласную абарону — як палітык партыі „зялёных“ я не магла сабе ўявіць, што буду актыўна выкарыстоўваць гэты тэрмін», — дадала яна.
Бэрбак таксама адзначыла, што Нямеччына не выбірала такога сцэнару, але павінна быць гатова да новай рэальнасьці, «не выкідваючы пры гэтым за борт усё астатняе», паколькі ў паняцьце бясьпекі ўваходзяць ня толькі абарона і дыпляматыя. «Гуманітарная дапамога, стабілізацыя і прадухіленьне канфліктаў будуць заставацца ў цэнтры ўвагі», — дадала яна.
«Пуцін учыніў найцяжэйшыя ваенныя злачынствы»
Адначасова міністарка замежных спраў Нямеччыны выказала ўпэўненасьць, што прэзыдэнт РФ павінен быць адданы міжнароднаму суду, бо «самым жорсткім чынам парушыў міжнароднае заканадаўства і міжнароднае гуманітарнае права».
«Нельга бамбаваць маці, бацькоў, дзяцей, старых і хворых людзей. Той, хто гэта робіць, учыняе найцяжэйшыя ваенныя злачынствы. Гэтыя злачынствы павінны быць пакараныя. У гэтым мы ў даўгу перад ахвярамі», — сказала яна.
Акрамя таго, Бэрбак адзначыла, што Бэрлін сур’ёзна ставіцца да пагроз Масквы, якая дапускае нанясеньне ядзернага ўдару, паколькі падрыхтоўка да горшых сцэнараў уваходзіць у задачы ўраду.
«Бразганьне Расеяй ядзернай зброяй у цяперашняй сытуацыі безадказнае, нават калі ўлічыць, што мы і ў мінулым ужо чулі аналягічныя заявы прэзыдэнта Пуціна». Пры гэтым немагчыма прымяніць ядзерную зброю, не прыносячы пры гэтым шкоды самому сабе, «і пра гэта вядома расейскаму прэзыдэнту», дадала Бербок.
Уладзімір Пуцін і іншыя расейскія афіцыйныя асобы неаднаразова дапускалі магчымасьць нанясеньня ядзернага ўдару ў вайне супраць Украіны. Гэты крок Масквы не выключаюць і ў ЗША. У прыватнасьці, у красавіку дырэктар ЦРУ і экс-амбасадар ЗША ў РФ Уільям Бэрнс заявіў, што яго ведамства «вельмі ўважліва» ставіцца да гэтай магчымасьці, падкрэсьліўшы, аднак, што ЗША пакуль ня бачылі ніякіх прыкмет таго, што Расея рыхтуецца зрабіць такі крок.
«З улікам роспачы прэзыдэнта Пуціна і расейскага кіраўніцтва, з улікам няўдач, зь якімі яны сутыкнуліся ў ваенных адносінах, ніхто з нас ня можа легкадумна ставіцца да пагрозы, якую ўяўляе патэнцыяльнае прымяненьне тактычнай ядзернай зброі або ядзернай зброі малой магутнасьці», — адзначыў ён.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
