На пачатку пасяджэньня Лукашэнка заявіў, што яно праходзіць у пашыраным фармаце, разам са спэцыялістамі, якія вядуць «інфармацыйную вайну» супраць «нахабнай хлусьні».
Лукашэнка назваў прычыны, зь якіх пачалася вайна, піша БелТА.
«Прэзыдэнт Расеі Ўладзімір Пуцін неаднаразова адкрыта заклікаў паважаць расейскія інтарэсы ў сфэры бясьпекі. Гэтыя заклікі засталіся непачутымі».
Пры гэтым ён заявіў, што Беларусь і далей не плянуе ўдзельнічаць у баявых дзеяньнях ва Ўкраіне і нібыта можа «даказаць каму заўгодна». Лукашэнка называе падзеі «спэцапэрацыяй», як і расейская прапаганда, абмінаючы слова «вайна».
«Больш за тое, расейскае кіраўніцтва ніколі ня ставіла перад намі гэта пытаньне — аб нашым удзеле ва ўзброеным канфлікце. Мы і ў далейшым не зьбіраемся ўдзельнічаць у гэтай спэцаперацыі ва Ўкраіне. Няма такой неабходнасьці».
Нагадаем, што ўкраінскі бок сабраў доказы таго, што некалькі ракет былі выпушчаныя па Ўкраіне зь Беларусі. Гэта прызнаў і сам Лукашэнка.
Таксама на паседжаньні Савету бясьпекі заявілі, што «ў Беларусі прыведзены ў гатоўнасьць сродкі СПА, каб «не дапусьціць удараў у сьпіну расейскім войскам». Па словах Лукашэнкі, прыкрыць заходнюю мяжу могуць яшчэ пяць батальёнаў.
Лукашэнка аб рашэньні бамбаваць Украіну з тэрыторыі Беларусі:
«Натуральна, у спэцыяльнай ваеннай аперацыі на Данбасе меркавалася прымяненьне групоўкі войскаў, якая засталася на тэрыторыі Беларусі. І мяне інфармавалі пра гэта ў 5 гадзін раніцы 24 лютага. Перад прыняцьцем такога рашэньня наша выведка і расейцы знайшлі ў непасрэднай блізкасьці ад нашай мяжы некалькі ракетных дывізіёнаў, якія рыхтаваліся да нанясеньня ўдару па расейскіх войсках у раёнах засяроджваньня на беларускай тэрыторыі. Адначасова з рашэньнем аб правядзеньні апэрацыі Расеяй быў нанесены папераджальны ўдар па гэтых цяжкіх узбраеньнях, пазыцыях, каб прадухіліць свае страты і ўзьдзеяньне на Беларусь. Калі б гэтага не зрабілі, гэтыя ракеты прыляцелі б на Мазыр і Гомель».
Лукашэнка баіцца, што падзеі ва Ўкраіне могуць прыняць буйнейшы маштаб.
«Дай Бог, каб не перарос у плянэтарны. Ён пачаўся нават не ў 2014 годзе. Тады ён упершыню ўвайшоў у вострую ўзброеную фазу».
Напад Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
