Лінкі ўнівэрсальнага доступу

Міжнародны крымінальны суд ААН пачаў расьсьледаваць заявы аб катаваньнях у Вэнэсуэле


Прэзыдэнт Вэнэсуэлы Нікаляс Мадура атрымлівае самурайскі меч у падарунак ад амэрыканскага актора Стывэна Сігала, які наведваў Вэнэсуэлу ў якасьці прадстаўніка Расеі. Каракас, 4 траўня 2021 году
Прэзыдэнт Вэнэсуэлы Нікаляс Мадура атрымлівае самурайскі меч у падарунак ад амэрыканскага актора Стывэна Сігала, які наведваў Вэнэсуэлу ў якасьці прадстаўніка Расеі. Каракас, 4 траўня 2021 году

Міжнародны крымінальны суд ААН пачынае афіцыйнае расьсьледаваньне паведамленьняў аб катаваньнях і пазасудовых пакараньнях, учыненых вэнэсуэльскімі сіламі бясьпекі пры прэзыдэнту Нікалясу Мадуру.

Пра гэта абвясьціў галоўны пракурор суду Карым Хан падчас свайго візыту ў Каракас.

Гэта першы выпадак, калі краіна Лацінскай Амэрыкі паддадзеная праверцы ў сувязі з магчымымі злачынствамі супраць чалавечнасьці, якая праводзіцца гэтым судом.

Хан заявіў у прысутнасьці Мадуры, што ведае пра палітычныя «лініі разлому» і «геапалітычны раскол», якія існуюць у Вэнэсуэле. Ён дадаў, што яго праца палягае ў тым, каб адстойваць прынцыпы законнасьці і вяршэнства права, а ня зводзіць рахункі, паведамляе «Голас Амэрыкі».

«Цяпер, калі мы пераходзім да новага этапу, я прашу ўсіх даць майму офісу прастору для працы», — сказаў Хан.

Цяперашняе расьсьледаваньне праводзіцца ўсьлед за працяглым папярэднім расьсьледаваньнем, якое пачалося ў 2018 годзе і было засяроджанае на паведамленьнях аб празьмерным ужываньні сілы, адвольных затрыманьнях і катаваньнях з боку сілавікоў пры здушэньні антыўрадавых пратэстаў у 2017 годзе.

Што трэба ведаць пра крызіс у Вэнэсуэле

  • 23 студзеня 2019 году на фоне канстытуцыйнага і эканамічнага крызісу ў Вэнэсуэле старшыня парлямэнту Хуан Гуайдо абвясьціў сябе часовым прэзыдэнтам і прынёс прысягу на мітынгу апазыцыі ў Каракасе. Апазыцыя не прызнала вынікаў прэзыдэнцкіх выбараў 2018 году, на якіх афіцыйна перамог дзейны прэзыдэнт Нікаляс Мадура.

Хто такі Хуан Гуайдо — новы лідэр апазыцыі Вэнэсуэлы, які абвясьціў сябе часовым прэзыдэнтам

  • Гуайдо прызналі законным прэзыдэнтам амаль усе краіны Лацінскай Амэрыкі (акрамя Балівіі і Кубы), ЗША, Аўстралія, Канада і Ізраіль. 31 студзеня «адзіным і законным часовым прэзыдэнтам» Вэнэсуэлы Гуайдо прызнаў Эўрапарлямэнт. Дзейнага прэзыдэнта Нікаляса Мадура лічаць легітымным Расея, Кітай, Куба і Мэксыка.
  • Беларускія ўлады заявілі, што «вэнэсуэльскі народ можа самастойна справіцца зь цяжкасьцямі, якія ўзьніклі, без ўмяшаньня звонку».
  • 26 сьнежня 2019 году легітымным прэзыдэнтам краіны Гуайдо прызнаў вайсковы аташэ Вэнэсуэлы ў Вашынгтоне палкоўнік Хасэ Луіс Сілва. Ён стаў першым высокапастаўленым вайскоўцам і дыпляматам рэспублікі, якія пайшлі на такі крок. Большая частка высокапастаўленых чыноўнікаў і вайскоўцаў захавалі ляяльнасьць Мадура. ​
  • 28 студзеня 2019 году ЗША ўвялі санкцыі супраць вэнэсуэльскай дзяржаўнай нафтавай кампаніі, каб узмацніць ціск на ўрад Мадура. Гуайдо заявіў, што бярэ кантроль над замежнымі актывамі Вэнэсуэлы, каб ня даць Мадура магчымасьці «спустошыць скарбонку».
  • У адказ Вярхоўны суд Вэнэсуэлы пачаў у дачыненьні да Гуайдо расьследваньне ў сувязі з «актамі гвалту, якія адбыліся ў краіне». Яму забаранілі выезд з Вэнэсуэлы і заблякавалі доступ да банкаўскіх рахункаў.
  • 29 студзеня Мадура заявіў у інтэрвію расейскім СМІ, што «гатовы сесьці за стол перамоваў з апазыцыяй». Аднак перамовы паміж ўрадам Вэнэсуэлы і апазыцыяй пачаліся толькі ў жніўні 2021 году, у Мэксыцы.
  • Эканамічны крызіс у Вэнэсуэле цягнецца з 2013 году, калі да ўлады прыйшоў Мадура. Па эканоміцы краіны моцна ўдарыла падзеньне цэнаў на нафту, але ўлады вінавацяць у праблемах ЗША. За першы прэзыдэнцкі тэрмін Мадура інфляцыя склала больш як 2 000 000 000% (перад дэнамінацыяй цэны вымяраліся ў мільёнах), валавы ўнутраны прадукт зьменшыўся на 45%, з краіны эмігравала 10% насельніцтва — каля 3 млн чалавек. Сярэдняя вага вэнэсуэльца праз праблемы з харчаваньнем зьменшылася на 11 кг.
  • Вэнэсуэльцы рэгулярна выходзілі на акцыі пратэсту, у якіх бралі ўдзел дзясяткі тысячаў, а часам і сотні тысячаў чалавек. Праходзілі ня толькі палітычныя пратэсты, але і галодныя бунты. У сутыкненьнях гінулі людзі, самым крывавым стаў 2017 год, калі былі зафіксаваныя сьмерці 164 чалавек.
  • У 2016 годзе парлямэнт запусьціў працэдуру імпічмэнту Мадура, але імпічмэнт заблякаваў Вярхоўны суд, які пазьней фармальна пазбавіў улады Нацыянальную асамблею. У 2017 годзе Мадура склікаў Канстытуцыйную асамблею як замену парлямэнту, але яе не прызнала вэнэсуэльская апазыцыя і большасьць краінаў сьвету.
  • У 2018 годзе Мадура афіцыйна перамог на датэрміновых прэзыдэнцкіх выбарах, інаўгурацыя на другі 6-гадовы тэрмін прайшла 10 студзеня. Вынікі не прызнала апазыцыя, якая байкатавала выбары і абвясьціла «маральную перамогу». Таксама вынікі выбараў не прызналі ЗША, Канада, Аўстралія і шэраг краінаў Лацінскай Амэрыкі.

Падрабязьней >>>

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG