Лінкі ўнівэрсальнага доступу

«Лукашэнка дэманструе, што гатовы парваць з Расеяй»,— кіраўнік «Россотрудничества»


«Дзень шматнацыянальнай Расеі» ў менскім прадстаўніцтве «Россотрудничества»

Паводле кіраўніка «Россотрудничества» Яўгена Прымакова, рыторыка Аляксандра Лукашэнкі сьведчыць пра тое, што ён гатовы парваць з Расеяй.

«Заявы прэзыдэнта Беларусі Аляксандра Лукашэнкі лічу варожымі ў дачыненьні Расеі»,— напісаў Прымакоў у сваім телеграм-канале.

Ён спасылаецца на заявы Лукашэнкі падчас пасланьня народу і парлямэнту 4 жніўня з «намёкамі на расейскае ўмяшаньне ва ўнутраныя справы краіны мяжуюць з пагрозамі пра тое, што «запалáе аж да Ўладзівастоку». А затрыманньне расейскіх грамадзянаў і перадача іх дадзеных украінскім спэцслужбам дэманструе гатоўнасьць парваць з Расеяй.

Таксама Прымакоў адзначыў, што расейскаму боку даўно варта палічыць тыя сілы, сродкі, рэсурсы, якія з «братняй любоўю» ўкладаліся ў Беларусь: тарыфы, зьніжкі, крэдыты і г. д. Кіраўнік «Россотрудничества» лічыць, што гэта неабходна зрабіць, каб зразумець: даходзіла гэтая дапамога да жыхароў краіны або працавала ў асноўным на тое, каб ўпэўнена сябе адчувалі эліты.

«Россотрудничество» — фэдэральнае агенцтва ў справах СНД і суайчыннікаў, якія пражываюць за мяжой. Дзейнасьць яго ўстаноў скіраваная на рэалізацыю дзяржаўнай палітыкі міжнароднага гуманітарнага супрацоўніцтва, садзейнічаньне распаўсюду за мяжой уяўленьня аб сучаснай Расеі. Прадстаўніцтвы маюцца ў 80 краінах сьвету, у тым ліку ў Беларусі.

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG