Крэмль вырашыў заняць пазыцыю нэўтралітэту і не падтрымліваць ніводнага з кандыдатаў у прэзыдэнты Беларусі, у тым ліку цяперашняга прэзыдэнта Аляксандра Лукашэнку. Гэтак заявіў у інтэрвію ўкраінскаму парталу hromadske Валер Цапкала, які спрабаваў зарэгістравацца кандыдатам, а цяпер падтрымлівае Сьвятлану Ціханоўскую.
Паводле Цапкалы, расейскае кіраўніцтва прыняло такое рашэньне, бо «не хоча сварыцца з беларускім народам». Беларусы могуць разглядаць дзеяньні Крамля як антыбеларускую палітыку і спробы перашкодзіць ім рухацца наперад.
«А для Расеі ёсьць сур’ёзнае пытаньне: ці варта падтрымліваць Лукашэнку і пасварыцца зь беларускім народам на будучыню, бо няма гарантыі, што ён будзе пераабраны. Альбо наадварот, падтрымаць беларускі народ — таксама цяжка, бо шмат розных дамоўленасьцяў з Лукашэнкам, абавязаньняў», — сказаў Цапкала.
Цапкала сказаў, што на гэтых выбарах Масква заняла адзіную правільную пазыцыю ў такіх сытуацыях і не падтрымала ніводнага з кандыдатаў.
Раніцай 24 ліпеня стала вядома, што Валер Цапкала разам зь дзецьмі зьехаў зь Беларусі. Ён патлумачыў такое рашэньне тым, што яго сябры ў праваахоўных органах папярэдзілі, што рыхтуецца яго арышт. Ягоная жонка Вераніка засталася ў Беларусі і ўдзельнічае ў кампаніі Сьвятланы Ціханоўскай. 2 жніўня зьявілася паведамленьне, што Цапкала зьехаў з Масквы і цяпер знаходзіцца ў Кіеве.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў