Лінкі ўнівэрсальнага доступу

У Вільні пройдзе «Балтыйскі шлях 2.0» на знак салідарнасьці зь Беларусьсю 


Палітоляг Віціс Юрконіс

Літоўскі палітоляг Віціс Юрконіс расказаў, што 27 ліпеня ў Вільні рыхтуецца акцыя «Балтыйскі шлях». Яе мэта — выказаць салідарнасьць зь беларусамі, якія падтрымліваюць дэмакратычную і свабодную Беларусь.

«Мяне абурае тое, што ўлада Беларусі, якая так выхвалялася тым, што дамаглася сувэрэнітэту, не сьвяткуе 30-годзьдзе незалежнасьці краіны», — адзначыў ён на сваёй старонцы ў Facebook.

У 1989 годзе жывы ланцуг аб’яднаў Вільню, Рыгу і Талін стаў сымбалем адзінства і сілаў літоўцаў, латышоў і эстонцаў у барацьбе за незалежнасьць.

«Сваёй імпрэзай мы хацелі б сымбалічна працягнуць руку ад Вільні, Рыгі і Таліну да Менску і такім чынам павіншаваць кожнага беларуса, якому важныя незалежнасьць і свабода», — падкрэсьліў Юрконіс.

Так жыхары краін Балтыі хочуць прадэманстраваць, што яны — за Беларусь, дзе няма палітвязьняў, дзе не рэпрэсуюць мірных грамадзян, не арыштоўваюць і ня штрафуюць незалежных журналістаў. Дзе людзі — вольныя, падсумаваў Віціс Юрконіс.

Збор удзельнікаў заплянаваны а 19.00 на плошчы Кудзіркі ў Вільні. Жывы ланцуг мяркуецца расьцягнуць ад Плошчы Незалежнасьці да Лукіскага пляцу.

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG