Лінкі ўнівэрсальнага доступу

ЦВК адмовілася публікаваць на сваім сайце вынікі галасаваньня на кожным выбарчым участку 


Ігар Барысаў

Старшыня Беларускай сацыял-дэмакратычнай партыі (Грамада) Ігар Барысаў атрымаў адказ з Цэнтарвыбаркаму на прапанову дзеля падвышэньня празрыстасьці падліку галасоў.

Як патлумачыў Свабодзе палітык, БСДП (Грамада) прапанавала ўвесьці ў практыку пры правядзеньні значных выбарчых кампаній публікацыю вынікаў галасаваньня з кожнага ўчастку.

«Заклікаем Цэнтарвыбаркам разьмяшчаць на сваім афіцыйным сайце адпаведную інфармацыю, як гэта робіцца ў нашых бліжэйшых суседзяў на сайтах ЦВК Украіны, Расеі, Латвіі, Літвы, Польшчы.
Наяўнасьць такіх зьвестак падвысіць давер грамадзкасьці да вынікаў выбараў, пацьвердзіць статус Беларусі як IT-краіны».

Каб гэта не вымагала выдаткаў з боку дзяржаўнага бюджэту, для распрацоўкі плятформы з вынікамі галасаваньня па кожным выбарчым участку БСДП бралася сваім коштам прыцягнуць адпаведных спэцыялістаў.

Аднак Цэнтарвыбаркам адмовіўся ад гэтай ідэі. Гэта вынікае з тэксту ліста, які Ігар Барысаў атрымаў напярэдадні.

«У сувязі з Вашым электронным зваротам у ЦВК з прапановай разьмяшчаць на афіцыйным сайце інфармацыю аб выніках галасаваньня на кожным участку паведамляем: у камісію не падаюцца пратаколы ўчастковых камісій аб выніках падліку галасоў, у сувязі з чым інфармацыя па ўчастках не публікуецца», — гаворыцца ў паведамленьні Цэнтарвыбаркаму.

У адпаведнасьці з артыкулам 13 Выбарчага кодэксу Рэспублікі Беларусь, падрыхтоўка і правядзеньне выбараў у краіне адбываюцца «адкрыта і галосна».

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG