Рада беларускай інтэлігенцыі, якую ўзначальвае заснавальнік Беларускага гуманітарнага ліцэю Ўладзімер Колас, апублікавала на сайце «Радыё Рацыя» зварот у сувязі з выбарчай кампаніяй.
Як заяўляе Рада, прэзыдэнцкая кампанія 2020 году «зноў выявіла схільнасьць першай асобы ў краіне ставіцца да сваіх апанэнтаў як да асабістых ворагаў і ўжываць супраць іх дзяржаўныя сродкі масавай інфармацыі, судовую сыстэму і сілавыя структуры». Гэта, мяркуе Рада, трактуецца як узурпацыя ўлады, супярэчыць Канстытуцыі і міжнароднаму праву.
«Каб прадухіліць небясьпечнае разгортваньне падзеяў і вярнуць сытуацыю ў нармальнае легітымнае рэчышча, мы патрабуем спыніць цяперашнюю выбарчую кампанію, вызваліць усіх незаконна затрыманых грамадзянаў і правесьці выбары адпаведна заканадаўству і дэмакратычным нормам праз тры месяцы», — гаворыцца ў заяве.
Таксама Рада выказвае шкадаваньне з той нагоды, што ў сёлетнюю выбарчую кампанію ня сталі асноўнымі кандыдатамі тыя, хто «разумеў важнасьць нацыянальных каштоўнасьцяў для захаваньня незалежнасьці», а на першы плян «выйшлі тыя, хто ігнаруе беларускую мову ў сваіх кампаніях».
У склад Рады ўваходзяць Алена Анісім, Зінаіда Бандарэнка, Лявон Баршчэўскі, Радзім Гарэцкі, Уладзімер Халіп і іншыя.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
