Лінкі ўнівэрсальнага доступу

Пачаўся суд паводле пазову турэцкага бізнэсоўца Ігдэджы супраць Цапкалы за «зьнявагу»


Сэдат Ігдэджы, архіўнае фота

У судзе Першамайскага раёну Менску 21 ліпеня пачалося папярэдняе судовае слуханьне аб грамадзянскім пазове кіраўніка асацыяцыі «Турэцкі капітал» Сэдата Ігдэджы супраць былога кіраўніка Парку высокіх тэхналёгіяў, экс-прэтэндэнта ў прэзыдэнты Валера Цапкалы.

На суд прыйшоў Ігдэджы, папрасіў дапусьціць на паседжаньне свайго адваката Алега Стоцкага. Судзьдзя зачытала хадайніцтва Цапкалы аб паўторным папярэднім судовым паседжаньні. Сам Цапкала не прыйшоў у суд, але паседжаньне вырашылі правесьці безь яго.

Ігдэджы падаў у суд на Цапкалу за тое, што ў відэатрансьляцыі 7 ліпеня Цапкала «паведаміў не адпаведныя рэчаіснасьці зьвесткі, якія зьневажаюць гонар, годнасьць і бізнэс-рэпутацыю».

«Валер Цапкала 7 ліпеня ў стрыме на Youtube-канале больш за 15 хвілін абражаў мяне і зь нянавісьцю адгукаўся пра мае кампаніі, прыніжаў маю краіну і мой народ. Абвінавачваў мяне ў шантажы, баязьлівасьці і паклёпе. Пагражаў помстай і заклікаў іншых людзей аб’ядноўвацца супраць мяне. З гэтай нагоды я сёньня падаў пазоў у суд», — тлумачыў Сэдат Ігдэджы.

Сэдат Ігдэджы патрабуе ў пазове выдаліць відэа «Прамое ўключэньне Валера Цапкалы» за 7 ліпеня з Youtube-каналу і разьмясьціць абвяржэньне, што відэа выдалена, «бо часткова зьмяшчала зьвесткі, якія не адпавядаюць рэчаіснасьці і зьневажаюць гонар, годнасьць і дзелавую рэпутацыю Сэдата Ігдэджы».

Раней Сэдат Ігдэджы падаў заяву ў Генэральную пракуратуру аб «фактах супрацьпраўнай дзейнасьці» тады яшчэ патэнцыйнага кандыдата ў прэзыдэнты Валера Цапкалы.

Будзе дапоўнена

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG