Лінкі ўнівэрсальнага доступу

Затрыманьні каля Symbal.by — «масавая бойка» ці «несанкцыянаваны мітынг»? МУС ня можа патлумачыць


Затрыманьні каля крамы Symbal.by 23 чэрвеня

Прэсавы сакратар МУС Вольга Чамаданава не назвала колькасьць грамадзянаў, якіх затрымалі ўвечары 23 чэрвеня каля крамы Symbal.by​ па адрасе праспэкт Машэрава, 18.

«Вы кажаце 13? Не, іх меней», — сказала Вольга Чамаданава ў размове з карэспандэнтам Свабоды, але дакладнай колькасьці затрыманых не назвала. Паводле Вольгі Чамаданавай, адносна затрыманых яшчэ вядуцца адміністрацыйныя працэсы, і пакуль яны не завершацца, немагчыма сказаць, колькі людзей будзе прыцягнута да адказнасьці.

За што затрымалі людзей ля крамы?

Як цяпер вядома, на шэраг затрыманых у той вечар каля крамы Symbal.by склалі адміністрацыйныя пратаколы. Радыё Свабода пра гэта паведамілі Аляксандар Кузьняцоў, Рафік Кенгерлі і Аляксандар Райчонак.

Чаму ў гэтых пратаколах пазначана, што яны бралі ўдзел у несанкцыянаваным мітынгу і аказалі непадпарадкаваньне? — запытаў карэспандэнт Свабоды Вольгу Чамаданаву і ў якасьці прыкладу назваў прозьвішча аднаго з такіх затрыманых, Аляксандра Райчонка, на якога ў Савецкім РУУС міліцыянт Ягор Каралёў склаў пратакол паводле артыкулаў 23.34 і 23.4 КаАП.

Паводле праваабаронцаў «Вясны», такія пратаколы склалі ня менш як на 5 затрыманых. Праваабаронцы маюць дадзеныя пра затрыманьні яшчэ 3 чалавек, у тым ліку журналіста. Паводле пратаколу, кандыдат гістарычных навук Аляксандар Райчонак, які ня браў удзелу ў канфлікце, быў затрыманы амапаўцамі, а ў ягоным пратаколе пазначана, што ён выкрыкваў лёзунгі «Стоп-таракан» і «Сыходзь».

Вольга Чамаданава не ўзялася камэнтаваць канкрэтную сытуацыю з затрыманьнем Аляксандра Райчонка.

«Ня чула, што казаў гэты чалавек супрацоўніку міліцыі, калі яго апытвалі для складаньня пратаколу. Адміністрацыйны працэс яшчэ праводзіцца, там яшчэ некалькі чалавек, высьвятляюцца іншыя абставіны», — сказала прэсавы сакратар МУС.

Чаму ля крамы апынуўся аўтазак?

Чаму да крамы Symbal.by, дзе стаяла чарга, каб зайсьці ў краму і набыць у ёй тавары, выехаў аўтазак з АМАПам?

«Супрацоўнікі выбылі на месца не таму, што там людзі стаялі ў чарзе, а таму, што паступілі паведамленьні, іх было некалькі. Людзі званілі, расказвалі, што адбываецца бойка, прасілі дапамогі. Таму накіравалі туды групу ня ў складзе аднаго ўчастковага, а значна большую. І яны даставілі ў Савецкі РУУС усіх удзельнікаў канфлікту. Але там жа былі і грамадзяне, якія, магчыма, спынялі гэты канфлікт. Людзей даставілі для разбору. У выніку разбору гэтыя людзі былі апытаныя, і адносна некаторых быў пачаты адміністрацыйны працэс», — сказала Вольга Чамаданава.

Да камэнтару пра інцыдэнт, які Вольга Чамаданава разьмясьціла ў Telegram-канале МУС, далучаныя аўдыёзапісы.

3 тэлефанаваньняў пра канфлікт на ўезьдзе ў двор дома 18 па Машэрава. У адным паведамленьні мужчына кажа, што яго ўдарылі. У другім іншы мужчынскі голас скардзіцца, што яму пабілі аўтамабіль, зламалі нагамі два люстэркі. У трэцім паведамленьні жанчына, якая сказала, што жыве ў доме 18 па Машэрава, скардзіцца на тое, што пад яе вокнамі адбываецца «нейкі мітынг», людзі, майкі прадаюць, напісана «Лукашэнка клоўн», нешта такое, там крычаць».

Пры гэтым у ніводным з паведамленьняў не вялося пра масавую бойку каля крамы Symbal.by, а на відэастрымах было бачна, што мітынгу там таксама не адбывалася.

«Мушу камэнтаваць толькі факты. Былі паведамленьні, і супрацоўнікі міліцыі на іх адрэагавалі», — сказала Вольга Чамаданава.

Затрыманьні каля Symbal.by​

23 чэрвеня бізнэсовец Павал Белавус абвясьціў пра закрыцьцё менскай крамы Symbal.by з 29 чэрвеня пад ціскам уладных праверак. Раней прыпыніла сваю працу онлайн-крама.​

Пасьля абвесткі пра закрыцьцё крамы ля яе ўтварылася чарга зь некалькіх дзясяткаў пакупнікоў. У эфіры відэастрыму, які вялі прадстаўнікі Symbal.by, паміж кіроўцам аўтамабіля, якія выяжджаў з двара, і людзьмі ў чарзе адбыўся канфлікт. Паводле сузаснавальніка крамы Паўла Белавуса, за стырном машыны быў мясцовы жыхар.

У 19:40 да крамы падʼехаў аўтазак. Сузаснавальнік Symbal.by Мікіта Броўка ў жывым эфіры паведаміў пра затрыманьні пакупнікоў з чаргі і прыпыніў трансьляцыю.

«Выяжджаў аўтамабіль, а людзі, якая стаялі побач з крамай, не давалі яму праехаць, — паведаміла Радыё Свабода прадстаўніца МУС Натальля Ганусевіч. — У мэтах спыненьня супрацьпраўных дзеяньняў, якія выразіліся ў блякаваньні аўтамабіля, выехаў нарад міліцыі. Некаторыя асобы дастаўленыя для разьбіральніцтва».

У той жа час з розных відэа з сацыяльных сетак відаць, што супрацоўнікі АМАП затрымлівалі людзей з чаргі, якія не прысутнічалі падчас канфлікту. АМАП таксама даганяў людзей у дварах і зьмяшчаў у аўтазак. Сьведкі кажуць пра жорсткія затрыманьні.

Што адбываецца з Symbal.by

12 чэрвеня ў Менску супрацоўнікі ДАІ спынілі кур’ера Максіма Блізьнюковіча, які вёз у краму 419 маек з надпісам «Псіхо3%». Паводле Паўла Белавуса, такія майкі — дызайнэрская прадукцыя іх кампаніі. Усе дакумэнты на гэтыя тавары спраўныя, забралі тавар цалкам незаконна, мяркуе Белавус.

Паводле Белавуса, на гэтым тыдні кампанія атрымала ліст ад Менгарвыканкама з патрабаваньнем прыбраць цягам трох дзён з будынка шыльды крамы, а сёньня, 23 чэрвеня, прыйшоў прадстаўнік Міністэрства па надзвычайных сытуацыях разьбірацца па ананімнай скарзе, што «нібыта з памяшканьня ідуць непрыемныя пахі і жыхары скардзяцца, што апазыцыйная крама займаецца незразумелай вытворчасьцю».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG