Лінкі ўнівэрсальнага доступу

Па ўсёй Беларусі новыя затрыманьні актывістаў і блогераў 31 траўня

абноўлена

Машына міліцыі ў Горадні, 30 траўня

Праваабаронцы паведамляюць пра затрыманьні актывістаў апазыцыі, блогераў і прыхільнікаў Сяргея і Сьвятланы Ціханоўскіх у розных гарадах Беларусі. На сёньня ў розных гарадах Беларусі на 12:00 анансавалі пікеты па збору подпісаў у падтрымку альтэрнатыўных удзельнікаў прэзыдэнцкай кампаніі.

  • Як паведамляе тэлеграм-канал «Страна для жизни», раніцай 31 траўня затрымалі траіх сябраў ініцыятыўнай групы Святланы Ціханоўскай. Сярод затрыманых — Уладзімер Мароз з Кобрыні, Валер Рамановіч з Пінску, Аляксандар Мілюк з Мастоў. Першых даставілі ў мясцовы РАУС. Мілюку ўручылі позву і адвезьлі ў сьледчы камітэт у Горадні. Паведамляюць, што міліцыянты затрымалі іх у якасьці сьведак, але невядома ў якой справе. Як мяркуюць, гэта зьвязана са здарэньнем падчас пікету Сьвятланы Ціханоўскай 29 траўня ў Горадні, калі быў затрыманы яе муж блогер Сяргей Ціханоўскі.
  • Праваабаронцы «Вясны» з раніцы 31 траўня паведамляюць пра затрыманні актывістаў з усяе Беларусі.
  • «Вясьне» паведамілі, што ў Менску затрыманыя актывісты «Народнай грамады» Валянцін Троцкі, Вераніка Мішчанка.
  • Праваабаронцам паведамілі, што ў Горадні таксама затрымалі Валера Епіфанава. Пад хатай адной з каардынатарак ініцыятыўнай групы ў Шчучыне Ганны Раманцэвіч таксама дзяжурыць міліцэйская машына. Такая ж сытуацыя ў каардынатара выбарчага штабу Ціханоўскай для Гомля і Гомельскай вобласьці.
  • Раніцай 31 траўня на выезьдзе з Баранавічаў затрымалі актывістку Тамару Патоцкую. Прычына — «няпройдзены тэхнічны агляд». Яе павезьлі ў РАУС у суправаджэньні пяці міліцэйскіх машын з мігалкамі.
  • У Вялейскім РАУС з раніцы знаходзіўся актывіст Аляксей Сюдак. У Маладэчне затрыманы Алесь Абрамовіч. У Віцебску затрыманы падчас усталяваньня намёту для збору подпісаў Алег Баразна.
  • У Гомлі затрымалі блогера Івана Рамязоўскага. Ён — сірата, вядзе Yotube-канал «RealBelarus», нядаўна адбыў 15 содняў арышту за акцыю салідарнасьці зь Сяргеем Ціханоўскім 7 траўня ў Гомлі. «Яго схапілі міліцыянты, як толькі ён выйшаў з дому, павезьлі ў Навабеліцкае РАУС», — паведаміў Свабодзе блогер Арцём Шапараў, аўтар тэлеграм-каналу «Рэальная Беларусь». Учора Іван вёў стрым са збору подпісаў за Валера Цапкалу, сёньня зьбіраўся здымаць збор подпісаў у падтрымку Святланы Ціханоўскай.
  • У Гомлі каля 12.00 затрымалі Сьвятлану Нарыскіну, даставілі ў Цэнтральны РАУС. Паводле «Вясны», затрыманьне можа быць зьвязанае з акцыяй у падтрымку Ціханоўскага 7 траўня.
  • У Кобрыні затрымалі праціўніка будаўніцтва акумулятарнага заводу ў Берасьці Ўладзімера Мароза, паведамляе БелаПАН​. Супрацоўнікі міліцыі затрымалі Мароза каля 9-й раніцы каля дому, дзе ён жыве. Мароза даставілі ў Кобрыньскі РАУС. Праваабаронца Раман Кісьляк лічыць, што Мароза затрымалі, каб ён ня змог трапіць сёньня на плошчу Леніна ў Берасьці, дзе традыцыйна штонядзелі зьбіраюцца праціўнікі акумулятарнага заводу. Праваабаронца лічыць гэта працягам рэпрэсіяў.
  • 31 траўня раніцай на вуліцы Маякоўскага ў Менску людзі ў цывільным на мікрааўтобусе заблякавалі машыну жонкі Статкевіча Марыны Адамовіч. Міколу Статкевіча забралі «людзі ў цывільным». Ягонай жонцы пазьней паведамілі, што ён у цэнтры ізаляцыі правапарушальнікаў на завулку Акрэсьціна.
  • ​У Менску затрымалі лідэра «Маладога фронту» Дзяніса Ўрбановіча, няма сувязі з актывісткай Ірынай Цап.
  • У Менску супрацоўнікі ДАІ спрабавалі затрымаць мужчыну, які нібыта абразіў праваахоўніка. Жанчыны ўгаварылі адпусьціць яго. Пазьней мужчыну ўсё ж затрымалі «людзі ў цывільным» у двары. Паводле «Вясны», яго завуць Яўген Гормаш.
  • У Берасьці каля 16.40 затрыманы Анатоль Данількевіч — як піша «Вясна», за бел-чырвона-белы сьцяг.
  • Паводле «Эўрапейскай Беларусі», каля Камароўскага рынку ў Менску затрыманыя актывісты Андрэй Войніч, Максім Вінярскі і Віталь Трыгубаў. Апошні вёў жывую трансьляцыю перад затрыманьнем.
  • Увечары 30 траўня стала вядома, што затрыманага напярэдадні ў Горадні Сяргея Ціханоўскага і яшчэ 7 чалавек перавезьлі ў Менск. Яны знаходзяцца ў цэнтры ізаляцыі правапарушальнікаў на завулку Акрэсьціна. Яшчэ трох затрыманых адпусьцілі.

Затрыманьні Ціханоўскага і яго прыхільнікаў у Горадні. Што трэба ведаць

  • Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
  • У Горадні а 20-й гадзіне 29 траўня Сяргея Ціханоўскага затрымалі супрацоўнікі спэцназу падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
  • Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.

Пахвілінна. Як адбылося затрыманьне Ціханоўскага ў Горадні >>

  • У Twitter-акаўнце Ціханоўскага «Страна для жизни» зьявілася відэа, на якім бачна, як мужчына ў скураной куртцы, падчас мітусьні на пікеце ў Горадні, дапамагае легчы на зямлю чалавеку ў міліцэйскай форме.
  • Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся ў некалькіх мэтрах ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміў пра крымінальную справу за «гвалт супраць міліцыянтаў».
  • Ціханоўскага маюць трымаць за кратамі прынамсі да дня прэзыдэнцкіх выбараў.
  • Вядома пра наступных затрыманых у «справе Ціханоўскага»:
  1. Сяргей Ціханоўскі
  2. Яўген Разьнічэнка
  3. Зьміцер Фурманаў
  4. Уладзімер Навумік
  5. Вяргілій Ушак
  6. Аляксандар Арановіч
  7. Васіль Баброўскі
  8. Арцём Сакаў
  9. Уладзімер Кніга

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG