Лінкі ўнівэрсальнага доступу

Удзельніку выбарчай кампаніі Бабарыку знайшлі замену на чале «Белгазпрамбанку»


Былы старшыня Белгазпрамбанку Віктар Бабарыка

Рада дырэктараў «Белгазпрамбанку» прызначыла выканаўцам абавязкаў старшыні праўленьня замест Віктара Бабарыкі, які вырашыў балятавацца на пасаду прэзыдэнта, Кірыла Бадзея, паведамляе «Інтэрфакс».

Дагэтуль у якасьці намесьніка старшыні праўленьня «Белгазпрамбанку» Кірыл Бадзей быў куратарам раздробнага бізнэсу. Ён сын Георгія Бадзея, які ў сярэдзіне 1990-х быў міністрам эканомікі Беларусі, а пасьля стаў на чале Саюзу прадпрымальнікаў і наймальнікаў імя прафэсара Куняўскага.

12 траўня Віктар Бабарыка абвясьціў пра свой намер удзельнічаць у выбарнай кампаніі і звольніўся з пасады на ўласнае жаданьне.
Прадстаўнік расейскага «Газпрома» Сяргей Купрыянаў заявіў тады, што рашэньне Бабарыкі пакінуць «Белгазпрамбанк» было абсалютна нечаканым для акцыянэраў крэдытнай арганізацыі, яму не было відавочнай замены.

Віктар Бабарыка узначальваў «Белгазпрамбанк» ад 2000 году. «Газпром» і «Газпромбанк» маюць па 49,8% акцый гэтай фінансавай установы.

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі (на 13 лепеня) праваабаронцы налічылі больш за 700 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. 129 чалавек пакаралі адміністрацыйнымі арыштамі, 252 чалавекі аштрафавалі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG