Лінкі ўнівэрсальнага доступу

Фэльчарка з Гомля адказала Ярмошынай пра «каранавірусны плявок»


Алена Давыдава

Фэльчарка «хуткай» з Гомля Алена Давыдава падавала дакумэнты на рэгістрацыю ініцыятыўнай групы да прэзыдэнцкіх выбараў. Сёньня на паседжаньні Цэнтральнай выбарчай камісіі стала вядома, што яе групу не зарэгістравалі.

Старшыня ЦВК Лідзія Ярмошына заявіла ці то жартам, ці то ўсур’ёз, што прыхільнікі Мікалая Статкевіча хацелі заразіць сябраў ЦВК каранавірусам.

«Прыйшла жанчына, якая хворая на каранавірус. Патрабавала асабістага прыёму. Напэўна, хацела плюнуць у маю прыёмную. А калі яе пасадзілі на карантын, ведаеце каго называла кантактам першага ўзроўню? Нашага галоўнага юрыста. Відавочна, каб вывесьці з працаздольнага стану ўвесь апарат. Гэта непрыстойна і подла», — сказала падчас паседжаньня Ярмошына.

Алена Давыдава, якая раней заяўляла пра «каранавірусны ціск» на яе, пракамэнтавала словы Ярмошынай Свабодзе.

«Гэта поўная хлусьня. Я Ярмошыну ў вочы ня бачыла. Наконт асабістага стаўленьня да гэтага чалавека я выкажу меркаваньне большасьці беларусаў — меркаваньне вельмі нэгатыўнае, мякка кажучы. І што я прыехала з каранавірусам на паседжаньне — мне ніхто на той момант пра каранавірус не казаў, гэта чарговая хлусьня. Яе словы пацьвярджаюць тое, што яна пастаянна хлусіць», — сказала Алена Давыдава.

Як сказала Свабодзе жонка Мікалая Статкевіча Марына Адамовіч, на момант, калі Давыдава падавала заяву на рэгістрацыю ініцыятыўнай групы (14 траўня), станоўчага выніку тэсту на COVID-19 у яе не было (пра станоўчы вынік ёй па тэлефоне сказалі вечарам 15 траўня), і нават пры гэтым заяву яна падавала ў масцы. На паседжаньні 19 траўня Давыдавай не было.

Адамовіч дадае, што «кандыдаты пратэсту» ня мелі шчыльных кантактаў з Давыдавай — яна іх заразіць не магла, у адрозьненьне ад чальцоў ЦВК, якія на паседжаньні 19 траўня не насілі масак.

Сама Давыдава ўпэўнена, што мела «жалезную» ініцыятыўную групу, чальцы якой пацьвердзілі на камэру, што яны не адмаўляюцца ад удзелу, што яны сапраўды добраахвотна ўвайшлі ў склад ініцыятыўнай групы.

«Яны проста нас баяцца. Канечне, сьмешна, што яны баяцца фэльчарку з хуткай дапамогі і іншых людзей, за якімі няма АМАП, міліцыі, войска, але яны баяцца — нас, простых людзей», — пракамэнтавала фэльчарка. На паседжаньнях 15 і 19 траўня ЦВК адмовіў у рэгістрацыі 20 ініцыятыўным групам «кандыдатаў пратэсту» Статкевіча.

Прэзыдэнцкія выбары — 2020 у Беларусі. Што важна ведаць

УЖЫВУЮ Выбары-2020. Як праходзіць прэзыдэнцкая кампанія падчас пандэміі

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак. Кандыдат у прэзыдэнты на выбарах-2010 Мікола Статкевіч зьбіраўся зарэгістраваць тры дзясяткі «кандыдатаў пратэсту», каб мець магчымасьць зьбіраць людзей на вуліцах, але ня ўдзельнічаць ў саміх выбарах. Яго і амаль усіх ягоных паплечнікаў не дапусьцілі да збору подпісаў — зарэгістравалі толькі групу Ўладзімера Няпомняшчых.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.

Гэтыя 15 чалавек будуць зьбіраць подпісы, каб стаць кандыдатамі ў прэзыдэнты. Хто яны

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG