Лінкі ўнівэрсальнага доступу

У настаўніцы менскай школы пацьвердзілі каранавірус


Ілюстрацыйнае фота. Мэдыкі транспартуюць хворага на каранавірус у машыну хуткай дапамогі ў адмысловай капсуле

Пра гэта стала вядома ад бацькоў вучняў. Ва ўпраўленьні адукацыі Свабодзе пацьвердзілі гэтую інфармацыю.

Каранавірус у Беларусі і ў сьвеце. Як разьвіваюцца падзеі >>

Гаворка ідзе пра сярэднюю школу № 61, што на вуліцы Кірылы Тураўскага, недалёка ад станцыі мэтро «Ўсход».

Каранавірус пацьвердзілі ў настаўніцы пачатковых клясаў. Цяпер яна чуецца добра.

Кантакты першага ўзроўню выяўленыя, цяпер яны на самаізаляцыі. Пра гэта Свабодзе сказала Людміла Барысенка, начальніца ўпраўленьня адукацыі Першамайскага раёну.

«У нас таксама ёсьць інфармацыя пра выпадак захворваньня ў 61-й школе, — сказала Людміла Барысенка. — У школе праводзяцца ўсе неабходныя мерапрыемствы, як у любой сытуацыі з эпідэміялягічнай нядобранадзейнасьцю».

Начальніца ўпраўленьня адукацыі таксама паведаміла, што вучні пачатковых клясаў у 61-й школе займаюцца ў асобным блёку.

Цяпер школьнікі на вакацыях. Ці адновяцца заняткі ў 61-й школе з 13 красавіка, вырашыць Міністэрства адукацыі. У кожным разе, бацькі маюць права напісаць заяву, каб іх дзіця не наведвала школу. Людміла Барысенка адзначыла, што прапрацоўваюцца варыянты, каб увесьці аддаленае навучаньне з элемэнтамі інфармацыйных тэхналёгій.

Паводле начальніцы ўпраўленьня адукацыі, у іншых школах Першамайскага раёну Менску выпадкаў COVID-19 не было зафіксавана.

Што трэба ведаць пра новы каранавірус, які выклікае COVID-19

  • УЖЫВУЮ Каранавірус у Беларусі і ў сьвеце. Як разьвіваюцца падзеі
  • Невядомы раней вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease).
  • Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
  • Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.

  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Проста чханьне — не сымптом каранавірусу.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг. ​


Найважнейшыя пытаньні і адказы пра каранавірус

Як зьмяняецца колькасьць хворых у Беларусі і суседніх краінах. Толькі графікі

Беларускія мэдыкі, якія загінулі падчас пандэміі COVID-19. СЬПІС ПАМЯЦІ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG