Лінкі ўнівэрсальнага доступу

Янукевіч сьледам за Севярынцам выйшаў з праймэрыз. БНФ рыхтуе новыя варыянты ўдзелу ў кампаніі

абноўлена

Аляксей Янукевіч падчас праймэрыз у Гарадку, 6 сакавіка 2020 году

Намесьнік старшыні Партыі БНФ Аляксей Янукевіч аб’явіў аб выхадзе з працэдуры выбараў адзінага кандыдата ад апазыцыі.

У камэнтары Свабодзе Аляксей Янукевіч паведаміў, што рашэньне было ўхваленае Партыяй БНФ. Яно зьвязана з тым, што разбурана адзінства ўнутры кааліцыі — спачатку недапушчэньнем удзелу ў праймэрыз Канапацкай, потым канфліктам паміж Севярынцам і Губарэвічам, выхадам Севярынца з кампаніі.

Янукевіч не выключае, што можа вярнуцца ў праймэрыз, умоўна кажучы, калі Севярынец і Губарэвіч дамовяцца, то бок калі першы вернецца ў кампанію, а другі патлумачыць, якім чынам на праймэрыз за яго галасавалі прадстаўнікі ўладаў.

«Але я не ўяўляю, як гэта можа здарыцца. Таму мы цяпер у БНФ будзем разглядаць варыянт стварэньня новай кааліцыі зь іншымі правацэнтрысцкімі сіламі, самастойнага ўдзелу ў выбарах або байкоту».

Губарэвіч: гэта «інфантыльныя паводзіны»

Яшчэ адзін удзельнік праймэрыз, лідэр руху «За свабоду» Юрась Губарэвіч раскрытыкаваў паплечнікаў на Facebook: «Шкада, што інфантыльныя паводзіны часткі лідараў апазіцыйных структураў чарговы раз паспрыяюць умацаваньню кіруючага рэжыму».

Паводле яго, «неспадзяваным шокам» для часткі лідэраў апазыцыі стаў «выхад за межы апазыцыйнай бурбалкі і сутыкненьне з рэальнымі („падазронымі“!) грамадзянамі Беларусі». Раней адной з прычынаў сыходу з праймэрыз сустаршыня БХД Павал Севярынец называў «масавае галасаваньне выканкамаў» на замову ўладаў.

Чаму зьняўся Севярынец

16 сакавіка пра спыньненьне ўдзелу ў выбары адзінага кандыдата (праймэрыз) ад апазыцыі на прэзыдэнцкіх выбарах 2020 году заявіў сустаршыня Беларускай хрысьціянскай дэмакратыі Павал Севярынец.

Як сказаў Севярынец, прычыны гэтаму дзьве: пандэмія каранавірусу і «масавае галасаваньне райвыканкамаў». Маўляў, дзясяткі людзей у розных гарадах прыходзілі на галасаваньне на замову ўладаў.

Цяпер палітык, які лічыўся фаварытам праймэрыз, не зьбіраецца выстаўляць сваю кандыдатуру на выбары ні ад кааліцыі, ні самастойна.

Як плянавалі праймэрыз

16 сакавіка рада кампаніі народнага галасаваньня (праймэрыз​) вырашыла прыпыніць праз пандэмію каранавірусу рэгіянальныя паездкі кандыдатаў ад 18 сакавіка да 2 красавіка.​

«Прапанова Паўла Севярынца аб адмене працэдуры Народнага галасаваньня (праймэрыз) і абвяшчэньні байкоту не прайшла», — дадалі ў радзе народнага галасаваньня.

Заплянаваную на 17 сакавіка сустрэчу ў Баранавічах не скасавалі. Мяркуецца, што ад 23 сакавіка пачнецца інтэрнэт-галасаваньне за выбар «адзінага кандыдата» ад апазыцыі.

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта адбудуцца ў 2020 годзе. Калі дакладна, пакуль невядома. Cтаршыня Цэнтарвыбаркаму Лідзія Ярмошына называла магчымай датай 30 жніўня.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Пяць чалавек удзельнічалі ў праймэрыз для вызначэньня адзінага кандыдата ад правацэнтрысцкай апазыцыі: Юры Губарэвіч (старшыня руху «За свабоду»), ​Мікалай Казлоў (лідэр Абʼяднанай грамадзянскай партыі), Павал Севярынец (сустаршыня аргкамітэту Беларускай хрысьціянскай дэмакратыі), Аляксей Янукевіч (намесьнік старшыні Партыі БНФ), ​Вольга Кавалькова (сустаршыня аргкамітэту Беларускай хрысьціянскай дэмакратыі). Ды ўдзел у працэдуры спынілі Севярынец (якога лічылі фаварытам пасьля першых галасаваньняў) і Янукевіч.
  • Ганна Канапацкая, экс-дэпутатка Палаты Прадстаўнікоў, падавала заяўку на праймэрыз, але яе не зарэгістравалі.
  • Таксама пра прэзыдэнцкія амбіцыі заяўлялі кіраўнік «Народнай грамады» Мікола Статкевіч, сустаршыня «Гавары праўду» Тацяна Караткевіч, кіраўнік БСДГ Сяргей Чэрачань, старшыня ЛДПБ Алег Гайдукевіч. Не зьбіраецца сыходзіць на пэнсію і дзейны кіраўнік Беларусі Аляксандар Лукашэнка.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG