Макей здаў тэст на каранавірус пасьля кантакту з заражаным
«Сапраўды, былі кантакты з носьбітам вірусу, таму лекарамі было прынятае рашэньне выконваць пэўныя абмежаваньні, што я і рабіў. Тэсты былі адмоўныя, таму ўсе нармальна, сёньня нармальны працоўны рэжым», — распавёў кіраўнік МЗС Беларусі.
Ён падкрэсьліў, што гэты час ня быў у 14-дзённай ізаляцыі, а працаваў і кантактаваў з калегамі.
«Імкнуліся абмежаваць гэтыя кантакты па мінімуму. І калегі, з якімі кантактаваў, таксама здавалі тэсты — усё нармальна», — сказаў міністар.
Новы рэкорд смяротнасьці ў Гішпаніі: 838 ахвяраў за суткі
За суткі ў краіне выявілі 6549 новых выпадкаў заражэньня. Агульная колькасьць выпадкаў дасягнула 78797.
Гішпанія — другая краіна ў Эўропе пасьля Італіі па колькасьці загінулых ад каранавірусу.
Патрыярх Кірыл парэкамэндаваў не хадзіць у храмы праз каранавірус
Праваслаўныя сьвятары пры гэтым працягнуць служыць набажэнствы.
«Царква заклікае сёньня строга выконваць тыя абавязкі, якія прапануюць санітарнымі ўлады Расеі. Я заклікаю вас, мае дарагія, у бліжэйшыя дні, пакуль ня будзе асаблівага патрыяршага бласлаўленьня, ўстрымацца ад наведваньня храмаў», — зьвярнуўся патрыярх да вернікаў.
У каталіцкім касьцёле ад пачатку пандэміі прымаюцца захады засьцярогі. Многія службы і рэлігійныя практыкі перайшлі ў анлайн, зьмяніліся традыцыйныя нормы.
Кітай паставіў у Нідэрлянды няякасныя маскі
600 тысяч масак FFP2 адклікалі пасьля выпрабаваньняў са шпіталёў у Нідэрляндах. Маскі не абараняюць твар альбо маюць няспраўныя фільтры. Нядаўна Нідэрлянды купілі 1,3 мільёну масак у Кітая.
Кітай дасылае мільёны масак і мэдыкамэнтаў у краіны сьвету для барацьбы з пандэміяй COVID-19. Пастаўкі з Кітая атрымалі Сэрбія, Лібэрыя, Францыя, Філіпіны, Чэхія і Ўкраіна.
У Нідэрляндах зафіксавана каля 9700 пацьверджаных выпадкаў COVID-19. 630 чалавек сталі ахвярамі каранавірусу.
Ад каранавірусу памерла гішпанская прынцэса Марыя Тэрэза
Гэта першая ахвяра пандэміі COVID-19 сярод прадстаўнікоў манархавых родаў Эўропы. Ёй было 86 гадоў.
Каранавірусам інфікаваныя яшчэ двое прадстаўнікоў каралеўскіх сем’яў: нашчаднік брытанскага пасаду прынц Чарльз, старэйшы сын каралевы Вялікай Брытаніі Лізаветы II, а таксама князь Манака Альбэр II. У самога гішпанскага караля Філіпа VI тэст нэгатыўны.
МВФ: сусьветная эканоміка ўвайшла ў рэцэсію
Кіраўніца Міжнароднага валютнага фонду (МВФ) Крысталіна Георгіева заявіла, што сусьветная эканоміка ўжо ўвайшла ў рэцэсію з прычыны пандэміі каранавірусу, і заклікала краіны адрэагаваць «вельмі буйнымі» праграмамі выдаткаў каб пазьбегнуць чарады банкруцтваў і дэфолтаў на рынках разьвіцьцёвых краінаў.
Славаччына зьмякчыла карантын, каб уратаваць фірмы ад банкруцтва
Урад Славаччыны, дзе праз каранавірус дзейнічае рэжым надзвычайнай сытуацыі, прыняў рашэньне зьмякчыць жорсткія эканамічныя абмежаваньні, накіраваныя на прадухіленьне распаўсюджваньня інфэкцыі. Пра гэта паведаміла ў суботу Славацкае радыё.
Улады, баючыся масавага банкруцтва ў камэрцыйным сэктары, з будучага тыдня дазволілі працу крамаў оптыкі, садовых прыладаў, будматэрыялаў і інструмэнтаў. Пачнуць працаваць лізінгавыя кампаніі. Зьняцьце забароны на вядзеньне бізнэсу падчас пандэміі тычыцца толькі невялікіх гандлёвых кропак і фірмаў, якія разьвіваюць бізнэс у сфэры лізінгу. Гандлёвыя цэнтры застануцца зачыненымі.
Масавыя пахаваньні ў Італіі. Драматычнае відэа
Італія б'е трагічныя рэкорды па колькасьці ахвяраў каранавірусу. У цэрквах памёрлых адпяваюць дзясяткамі, а труны вывозяць грузавікамі.
Расея ад панядзелка зачыняе межы. І зь Беларусьсю
Прэм'ер-міністар Расеі Міхаіл Мішусьцін даручыў зачыніць межы краіны з 30 сакавіка. Указ апублікаваны на афіцыйным партале прававой інфармацыі Расеі.
Дакумэнт прадугледжвае прыпыненьне руху праз аўтамабільныя, чыгуначныя, пешаходныя, рачныя і зьмешаныя пункты пропуску праз дзяржаўную мяжу Расеі.
Таксама будзе зачынены сухапутны ўчастак расейска-беларускай мяжы.
Ухвалены пяціхвілінны тэст на каранавірус
Амэрыканская кампанія Abbott Laboratories заявіла, што атрымала адабрэньне фэдэральных рэгулятараў ЗША, якое дазваляе пачаць масавую вытворчасьць тэсту на
каранавірус, здольнага даваць вынікі на працягу некалькіх хвілін.
Тэсты ў тэрміновым парадку ўхваліла Адміністрацыя ЗША па харчаваньні і мэдыкамэнтах (FDA).
Abbott Laboratories плянуе пачаць разьмеркаваньне тэстаў на наступным тыдні і павялічыць вытворчасьць да 50 тысячаў у дзень. Тэст дазваляе атрымаць пазытыўны вынік за пяць хвілін, нэгатыўны – за 13 хвілін.
Сьвет зачынены ў дамах. Павялічваецца хатні гвалт
Улады замыкаюць жыхароў у дамах, каб абмежаваць распаўсюд каранавірусу. Масавыя захады прывялі да павелічэньня колькасьці выпадкаў гвалту ў сям’і. Актывісты па ўсім сьвеце занепакоеныя трывожным ростам колькасьці выпадкаў хатняга гвалту, піша Rzeczpospolita.
Для параўнаньня, у лютым у кітайскай правінцыі Хубэй было зарэгістравана амаль у чатыры разы больш выпадкаў гвалту, чым у мінулым годзе. У адным з рэгіёнаў паліцыя паведаміла пра162 выпадкі, летась іх было там 47.
«Эпідэмія аказала велізарны ўплыў на гвалт у сямʼі, — сказаў Ван Фэй, адстаўны паліцэйскі, які арганізаваў дабрачынную кампанію супраць насільля. — Па нашай статыстыцы, 90% прычын гвалту (у гэты пэрыяд) зьвязаныя з эпідэміяй», — дадаў ён.
У Польшчы праз каранавірус зьмянілі выбарчы кодэкс і прынялі антыкрызісны плян для бізнэсу
Сэйм Польшчы ў ноч на 28 сакавіка ўнёс папраўкі ў выбарчы кодэкс. Папраўкі, прынятыя Сэймам Польшчы да адмысловага закону аб каранавірусе, дазваляюць галасаваць дыстанцыйна людзям, старэйшым за 60 гадоў, і тым, хто знаходзіцца на карантыне. 222 дэпутаты прагаласавалі «за» гэтыя папраўкі, 214 — «супраць», трое ўстрымаліся.
Да таго ж, 28 сакавіка польскі сэйм прыняў закон, які мае падтрымаць кампаніі ў сувязі з эпідэміяй каранавірусу. Ён павінен абараніць людзей ад страты працоўных месцаў, падтрымаць сыстэму аховы здароўя, забясьпечыць фінансавую сыстэму, падтрымаць прадпрымальнікаў і дзяржаўныя інвэстыцыі. Вядзецца пра сотні мільярдаў злотых (або сотні мільёнаў даляраў) на праграму падтрымкі. Што прадугледжвае гэты закон, чытайце тут.
Трамп падпісаў закон аб выдзяленьні 2,2 трыльёна даляраў эканамічнай дапамогі ЗША
Прэзыдэнт ЗША Дональд Трамп падпісаў закон аб фінансавай падтрымцы эканомікі краіны ў памеры $ 2,2 трыльёна з сувязі з пандэміяй каранавірусу. Гэтая мера мае дапамагчы жыхарам краіны і амэрыканскім кампаніям справіцца з эканамічным спадам, выкліканым эпідэміяй каранавірусу, і тэрмінова забясьпечыць бальніцы неабходнымі мэдыкамэнтамі і апаратамі.
Лукашэнка пра каранавірус: «Я жыву тым жа жыцьцём, што і жыў. З хакеістамі рукі паціскаем, абдымаемся»
Кіраўнік Беларусі Аляксандар Лукашэнка заявіў, што не мяняў свой звыклы лад жыцьця з сувязі з пандэміяй каранавірусу. 28 сакавіка ён выйшаў на лёд, каб узяць удзел у рэспубліканскім турніры па хакеі сярод аматарскіх камандаў.
«Я жыву тым жа жыцьцём, што і жыў. І ўчора была трэніроўка з хакеістамі, сустракаемся, рукі паціскаем, абдымаемся там, калашмацім адзін аднаго і гэтак далей», — кажа Лукашэнка на відэа, якое апублікаваў Тэлеграм канал «Пул Первого».
На ляйнэры ля берагоў Панамы ад каранавірусу загінулі 4 чалавекі. Пасажыры патрабуюць іх эвакуяваць
Чатыры пасажыры загінулі на круізным судне каля ўзьбярэжжа Панамы, больш за 130 чалавек на борце пакутуюць ад сымптомаў грыпу, прынамсі двое зь іх маюць каранавірус. Пасажыры напужаныя пашырэньнем інфэкцыі і патрабуюць тэрмінова эвакуяваць іх зь ляйнэра, паведамляе Reuters.
Карабель Zaandam адправіўся ў Аргентыну 7 сакавіка і меўся скончыць падарожжа ў Чылі 21 сакавіка. Аднак ужо два тыдні ніхто не пакідае судна. На борце знаходзяцца 1243 пасажыры і 586 чальцоў экіпажу, а таксама чатыры доктара і чатыры мэдсястры.
Раналду пагадзіўся зарабляць на 4 мільёны эўра менш праз каранавірус, Суарэс дапамог набыць прадукты і лекі для суайчыньнікаў
Уругвайскі форвард «Барсэлёны» Луіс Суарэс дапамог суайчыньнікам падчас пандэміі каранавірусу, паведамляе Marca. На грошы спартоўца набылі 500 набораў з прадуктаў і мэдыкамэнтаў. Іх раздадуць жыхарам бедных раёнаў Мантэвідэа.
Партугальскі гулец турынскага «Ювэнтусу» Крышціяну Раналду адмовіўся ад часткі заробку праз каранавірус на карысьць супрацоўнікаў клюбу, паведамляе Tuttosport. Футбаліст будзе зарабляць на чатыры мільёны эўра менш. Таксама на паніжэньне заробку пагадзіліся і іншыя лідэры каманды: Джанлуіджы Буфон, Леанарда Банучы і Джорджа Кьяліні.
У Расеі 228 новых выпадкаў заражэньня каранавірусам і першы выпадак сьмерці ад па-за межамі Масквы
За апошнія суткі ў Расеі пацьвердзіліся 228 выпадкаў заражэньня новым каранавірусам у 62 рэгіёнах. Агульная колькасьць хворых — 1264 чалавекі.
28 сакавіка стала вядома пра сьмерць пацыента з каранавірусам у Арэнбурзе. Гэта пяты выпадак сьмерці ў Расеі і першы выпадак па-за межамі Масквы.
Для стрымліваньня эпідэміі прэзыдэнт Расеі Ўладзімір Пуцін абвясьціў непрацоўным тыдні з 28 сакавіка па 5 красавіка. Улады Масквы і Санкт-Пецярбурга ўвялі на гэты час абмежаваньні ў працы крамаў, паркаў, рэстаранаў і кавярняў. Кіраўнік расейскага ўраду Міхаіл Мішусьцін заявіў аб неабходнасьці распаўсюдзіць абмежаваньныя меры па прыкладзем Масквы на ўсе рэгіёны.
Тым часам жыхары Масквы масава скупаюць прэпараты ад малярыі, якія тэстуюць супраць каранавірусу — прэпараты ўжо скончыліся ў апэтках.
Турэччына спыніла міжнародныя авіязносіны з прычыны пандэміі
Улады Турэччыны адмянілі ўсе міжнародныя пералёты на нявызначаны тэрмін, каб прадухіліць распаўсюд каранавірусу, заявіў у тэлезвароце да народу прэзыдэнт краіны Рэджэп Эрдаган. Унутраныя авіярэйсы пакуль застаюцца.
Па стане на 27 сакавіка ад COVID-19 у Турэччыне памерлі 92 чалавекі.
Папа Францішак памаліўся на пустой плошчы сьвятога Пятра, каб сьвет пазбавіўся каранавірусу
Малітва адбылася ў двары ватыканскай базылікі сьвятога Пятра ўвечары 27 сакавіка.
На плошчы не было вернікаў, ахвотныя далучыліся да богаслужэньня праз прамую трансьляцыю па тэлебачаньні і інтэрнэце. Шмат фота глядзіце тут >>