Ва Ўхані, адкуль пачалася ўспышка каранавірусу, аднавіла працу мэтро
З 28 сакавіка аднаўляецца работа шасьці зь дзевяці ліній мэтро. Пасажырам будуць вымяраць тэмпэратуру цеплавізарам, таксама яны павінны адсканаваць свой «код здароўя» — пускаць у мэтро будуць толькі тых, у каго ён зялёны. Акрамя гэтага, пасажыры павінны будуць сядзець праз аднаго і насіць маскі.
З 23 студзеня горад быў фактычна ізаляваны ад зьнешняга сьвету пасьля ўспышкі новагага каранавірусу.
ЗША выдзеляць Беларусі 1,3 мільёна даляраў для барацьбы з каранавірусам
Дзяржаўны дэпартамэнт ЗША вырашыў надаць Беларусі дапамогу ў памеры 1,3 мільёна даляраў. Грошы будуць выдзеленыя на патрэбы аховы здароўя ў сувязі з пандэміяй каранавірусу: падрыхтоўку лябараторый, паляпшэньне дыягностыкі COVID-19 і эпідяміяляягічнага назіраньня, падтрымку тэхнічных экспэртаў, для інфармаваньня пра рызыкі падчас пандэміі і іншыя мерапрыемствы.
Тысячы ўкраінцаў намагаюцца вярнуцца з Польшчы перад закрыцьцём мяжы
На ўкраінска-польскай мяжы 27 сакавіка тысячы ўкраінцаў спрабуюць увайсьці з польскага боку ва Ўкраіну, паведамляе ўкраінская служба Свабоды.
Украіна апоўначы 27 сакавіка цалкам закрые дзяржаўную мяжу на ўезд і выезд з прычыны каранавіруснай пандэміі. Пра гэта ў тэлезвароце заявіў 26 сакавіка прэзыдэнт Украіны Ўладзімір Зяленскі.
У Італіі рэкордная колькасьць сьмерцяў ад каранавірусу за адзін дзень
У Італіі 27 сакавіка зафіксавана рэкордная колькасьць сьмерцяў ад каранавіруснай інфэкцыі за адзін дзень — 919.
Агульная колькасьць сьмяротных зыходаў ад захворваньня COVID-19 у краіне, якая найбольш пацярпела ад пандэміі, складае цяпер 9134, тых, хто захварэў з пачатку эпідэміі — звыш 86 тысяч. Вылечыліся за ўвесь час каля 11 тысяч чалавек. Выпадкаў новых заражэньняў за апошнія суткі — больш за 6 тысяч.
Памежнікі ня будуць «ізаляваць» расейцаў, якія прыедуць у Беларусь на аўто
Беларускія памежнікі ня будуць ні правяраць аўтамабілі, якія ідуць з Расеі, ні фіксаваць, калі яны заяжджаюць у Беларусь, каб пачаць адлік для двухтыднёвай самаізаляцыі, піша «Эўрарадыё».
«Супрацоўнікаў органаў пагранічнай службы Рэспублікі Беларусь, якія ажыцьцяўляюць памежны кантроль, на расейскім кірунку няма», — сказаў афіцыйны прадстаўнік Дзяржаўнага памежнага камітэту Беларусі Антон Бычкоўскі.
Мінздароўя апублікавала сьпіс краін, пасьля наведваньня якіх абавязковая 14-дзённая самаізаляцыя
Міністэрства аховы здароўя апублікавала поўны пералік краін, у якіх рэгіструюцца выпадкі інфэкцыі COVID-19 і па прыезьдзе зь якіх грамадзяне Беларусі абавязаныя цягам 14 дзён знаходзіцца на абавязковай самаізаляцыі, паводле пастановы Савету Міністраў № 171.
Праз 1-2 дні пацыентаў з Парыжу давядзецца вазіць у іншыя рэгіёны Францыі
Прэзыдэнт францускай фэдэрацыі шпіталяў Фрэдэрык Вальту заклікаў дапамагчы Парыжу і яго прымесцям, дзе сьледам сьледам за рэгіёнам Гранд-Эст шпіталі перагружаныя пацыентамі з каранвірусам.
«Мы будзем на мяжы нашых магчымасьцяў праз 24 ці 48 гадзін. Нам трэба будзе праявіць сапраўдную салідарнасьці паміж рэгіёнамі, шпіталямі і павялічыць колькасьць перавозак пацыентаў», — сказаў ён у інтэрвію тэлеканалу BFM.
Як паведамляе Reuters, у Парыжы і яго прымесьцях цяпер больш за чвэрць з 29 тысяч пацьверджаных выпадкаў каранавіруснай інфэкцыі ў Францыі. Амаль 1,300 чалавек такіх пацыентаў знаходзяцца ў рэанімацыі.
Наглядна: чаму так важна захоўваць сацыяльную дыстанцыю
Без захаваньня сацыяльнай дыстанцыі адзін хворы на COVID-19 перадае вірус у сярэднім 2,5 людзям, а кожны з гэтых 2,5 чалавек перадае яшчэ 2,5. І празь месяц інфікаваныя будуць ужо 406 чалавек. Паглядзіце, як выглядае гэтая прагрэсія.
Ярмошына ня лічыць, што каранавірус можа стаць падставай для пераносу прэзыдэнцкіх выбараў
«Толькі калі будзе абвешчанае надзвычайнае становішча, гэта дае падставу для пераносу выбараў, так сказана ў Канстытуцыі. Але калі будзе сытуацыя ў краіне такая ж, як цяпер, то ніякіх падставаў для пераносу няма», — сказала Ярмошына.
«Белавія» працягне лятаць у Маскву, кампаніі зрабілі выключэньне
Беларусь і Расея дамовіліся працягнуць палёты «Белавія» ў Маскву, нягледзячы на рашэньне расейскага боку аб спыненьні авіязносінаў зь іншымі дзяржавамі з прычыны пандэміі каранавірусу COVID-19, паведамілі БелТА ў прэс-службе Міністэрства транспарту і камунікацый Беларусі 27 сакавіка.
Брытанcкі прэм’ер заразіўся COVID-19
Прэм’ер-міністар Вялікай Брытаніі Борыс Джонсан у Twitter расказаў, што атрымаў пазытыўны тэст на COVID-19. Цяпер ён мае нязначныя сымптомы.
Як расказаў Борыс Джонсан, цяпер ён на самаізаляцыі, але працягвае працу ў рэжыме відэаканфэрэнцыяў. Ён падкрэсьліў, што сымптомы нязначныя — тэмпэратура і кашаль. Яны зьявіліся за апошнія 24 гадзіны.
Джонсан заклікаў іншых змагацца з каранавірусам — заставацца дома і сьледаваць рэкамэндацыям мэдыкаў.
Днём раней стала вядома, што COVID-19 выявілі ў прынца Ўэльскага Чарльза — сына брытанскай каралевы.
Як паскараецца распаўсюд каранавірусу
Сусьветная арганізацыя здароўя адзначыла ў Twitter, што ў распаўсюдзе COVID-19:
першыя 100 000 выпадкаў выявілі праз 67 дзён пасьля пачатку эпідэміі;
другія 100 000 — праз 11 дзён пасьля таго;
трэція 100 000 — праз 4 дні;
чацьвёртыя 100 000 — праз 2 дні.
Цяпер у сьвеце зафіксаваныя ўжо каля 548 800 выпадкаў COVID-19. Памерлі каля 24,9 тысячы пацыентаў, выпісаныя здаровымі каля 128,6 тысячы, у цяжкім або крытычным стане застаецца 21 тысяча пацыентаў.
Што акрамя колькасьці выпадкаў расказалі на прэс-канфэрэнцыі Мінздароўя:
- У жанчыны з Жыткавічаў канчатковы вынік тэстаў на COVID-19 адмоўны, хоць першы тэст даў станоўчы вынік.
- Мінздароўя сьвядома выбрала тактыку «нештодзённага інфармаваньня» пра COVID-19, бо, як сказала намесьніца міністра Алена Богдан, «нічога экстраардынарнага ў краіне не адбываецца». Як бачна са статыстыкі Сусьветнай арганізацыі здароўя, практычна ўсе іншыя краіны Эўропы даюць статыстыку штодзень.
- Пацыентаў на штучнай вэнтыляцыі лёгкіх цяпер няма. Пацыентка, якая была пад інтэнсіўным назіраньнем, мае станоўчую дынаміку.
- Захворвальнасьць каранавірусам у Мінздароўя называюць «спарадычнай» — «у некаторых рэгіёнах адзінкавай».
- Мэдыкаў, якія кантактуюць з інфікаванымі SARS-CoV-2, назіраюць штодзень, апытваюць, тройчы на дзень мераюць тэмпэратуру, тэстуюць на першы і трынаццаты дзень працы.
- На дабрачынны рахунак Мінздароўя на 9 раніцы паступіла 551 949 рублеў і 37 капеек, 16 122 эўра і 47 эўрацэнты. Грошы перадусім накіруюць на абарончае адзеньне мэдыкаў, стварэньне запасаў тэставых сыстэмаў і лекаў.
- Сытуацыя з мэдычнымі маскамі, антысэптыкамі і іншымі сродкамі «пад кантролем». Ужо наладжаная вытворчасьць рэсьпіратараў на прадпрыемстве, якое прастойвала з 2015 году, нарошчваюць вытворчасьць антысэптыкаў.
- Каля РНПЦ «Маці і дзіця» будуюць не часовы шпіталь для інфікаваных, а анастэзіёляга-рэанімацыйнага корпусу і корпусу для неданошаных дзяцей.
- У лекавых установах вольнае 2221 месца для шпіталізацыі кантактных асобаў з інфікаванымі каранавірусам, «перапаўненьня» няма, а служба «хуткай дапамогі» працуе ў звычайным рэжыме.
- Прыцягваньне сілавых структураў для прымусу да загадаў Мінздароўя пакуль не разглядаюць — іх прыцягваюць толькі ў кантролі самаізаляцыі тых, хто прыбыў з краінаў зь «неспрыяльнай эпідэміялягічнай абстаноўкай». З-пад карантыну яшчэ ніхто не ўцякаў.
- Тэсты на COVID-19 на мяжы не здаюць усе, хто перасякае мяжу, бо «перадусім, незалежна ад вынікаў дасьледаваньня», любы мусіць быць 14 дзён у рэжыме самаізаляцыі. Чальцы іх сем’яў — не абавязаныя, але ім «някепска назіраць за ўласным здароўем».
- На пытаньне аб тым, як хутка пацыенты мусяць атрымаць вынікі тэстаў на COVID-19, на прэс-канфэрэнцыі не адказалі. Раней сьцьвярджалася, што вынікі мусяць быць гатовыя цягам 4–24 гадзінаў, ды шэраг пацыентаў заяўляў, што не атрымлівае вынікі па тры дні і дольш.
- У месцах пазбаўленьня волі «няма каранавіруснай інфэкцыі».
- «Самы небясьпечны прадмет — гэта нашыя рукі», іх ва ўмовах пандэміі трэба часта і правільна мыць.
«Бяз шуму і пылу». Лукашэнка лічыць, што Беларусь эфэктыўна супрацьстаіць каранавірусу
Аляксандар Лукашэнка запэўніў, што ў Беларусі робяцца ўсе неабходныя захады для прафіляктыкі і прадухіленьня распаўсюду каранавірусу, што кожная служба ў краіне — ад мэдыкаў да праваахоўных органаў — займаецца сваёй справай. І ён катэгарычна супраць «псыхозу і панікі вакол гэтай тэмы».
«Мы ўсім гэтым займаемся. Але толькі бяз шуму і пылу», — цытуе Лукашэнку ягоная прэс-служба. Што яшчэ сказаў Лукашэнка, чытайце тут
Лукашэнка заявіў, што Дзень Перамогі ў Беларусі адзначаць, як задумвалі, нягледзячы на каранавірус
Работнікі прадпрыемства ААТ «Белгіпс», якое наведвае Аляксандар Лукашэнка, пацікавіліся ў яго, ці не зьбіраюцца ўлады адмяніць падрыхтоўку да 75-годзьдзя Перамогі 9 траўня. Лукашэнка запэўніў, што «тэма сьвяткаваньня юбілею Вялікай Перамогі ня згубіцца ў нэгатыўным інфармацыйным патоку».
«Не, ня згубіцца. Падрыхтоўка ў краіне працягваецца, і ніякія заплянаваныя мерапрыемствы не адмяняюцца», — зазначыў ён.
У Менску ўжо рыхтуюцца да вайсковага параду. Так, 26 сакавіка быў абмежаваны рух транспарту на МКАД у сувязі з праездам вайсковай мэханізаванай калёны да аэрадрому Ліпкі, дзе адбываюцца асноўныя трэніроўкі.
Ужо 94. У Беларусі выявілі 8 новых выпадкаў COVID-19
Міністэрства аховы здароўя Беларусі 27 сакавіка паведаміла сьвежыя лічбы пра колькасьць выпадкаў COVID-19: 32 пацыенты «выпісаныя або рыхтуюцца да выпіскі», яшчэ 62 «знаходзяцца пад кантролем мэдыкаў і на лячэньні». Днём раней Мінздароўя не публікавала актуальную статыстыку. Два дні таму Мінздароўя паведамляла пра 86 выпадкаў — за два дні выявілі 8 новых выпадкаў.
Ва Ўкраіне за дзень выявілі 62 выпадкі каранавірусу. Агулам там ужо 218 выпадкаў
Міністар здароўя Ўкраіны Віктар Ляшко абвясьціў 27 сакавіка пра выяўленьне новага каранавірусу ў яшчэ 62 чалавек, перадае УНІАН. Цяпер ва Ўкраіне зафіксавалі 218 выпадкаў — ачунялі 4 чалавекі, памерлі 5.
Цяпер ва Ўкраіне каля 5 выяўленых выпадкаў каранавірусу на мільён чалавек. Гэта самы нізкі паказьнік у Эўропе: у Расеі каля 7 выпадкаў на мільён, у Беларусі каля 9, у Польшчы каля 33.
У Расеі ўжо больш за тысячу інфікаваных
Паводле расейскага Апэратыўнага штабу барацьбы з эпідэміяй, на 27 сакавіка ў Расейскай Фэдэрацыі зафіксавалі 1036 выпадкаў COVID-19. За мінулы дзень выявілі 196 новых выпадкаў, днём раней — 182. З пачатку эпідэміі праз каранавірус у Расеі памерлі тры чалавекі.
Паводле колькасьці інфікаваных Расея набліжаецца да Беларусі: у Расеі каля 7 выпадкаў на мільён жыхароў, у Беларусі каля 9.
Галоўны лекар лякарні ў маскоўскай Камунарцы, куды адпраўляюць пацыентаў з падазрэньнем на каранавирус, лічыць, што пік захворваньня ў Маскве можа наступіць у сярэдзіне або канцы наступнага тыдня, перадае «Дождь».
Да 90% выручкі. Якія галіны эканомікі найбольш пацярпелі ад каранавірусу
Беларускі Бізнэс-саюз прадпрымальнікаў і наймальнікаў імя Куняўскага апытаў сваіх чальцоў пра іхны стан у сакавіку і прагнозы на першае паўгодзьдзе. Паводле апытаньня, найбольшыя страты ад сытуацыі з пандэміяй COVID-19 мелі бізнэсы ў галінах пасажырскіх перавозак і турызму — праз закрыцьцё межаў у іншых краінах іхная выручка скарацілася на 50–90% да сакавіка мінулага году.
Пацярпелі і тыя, хто арыентаваўся на прыбыткі ад паслугаў замежнікам (як то ў галіне стаматалягічных паслугаў), і тыя, хто працаваў на ўнутранае спажываньне (цырульні і аб’екты харчаваньня страцілі 10–25% выручкі).