Лінкі ўнівэрсальнага доступу

Прэмʼер-міністар Латвіі прыедзе ў Менск 16 студзеня


Артурс Крыш'яніс Карыньш, архіўнае фота

Прэм’ер-міністар Латвіі Артурс Крышʼяніс Карыньш мае наведаць Беларусь 16 студзеня, піша сайт латвійскага ўраду. Афіцыйная нагода — нарада наконт арганізацыі Чэмпіянату сьвету ў хакеі 2021 году.

Падчас візыту ён сустрэнецца з Аляксандрам Лукашэнкам і прэм’ерам Беларусі Сяргеем Румасам.

Артурс Крышʼяніс Карыньш пры тым адзначыў, што «Латвія зацікаўленая ў добрасуседзкіх адносінах і больш цеснай эканамічнай супрацы зь Беларусьсю», а чэмпіянат ён разглядае як «магчымасьць умацаваць адносіны між дзьвюма краінамі».

Ці будуць абмяркоўвацца канкрэтныя эканамічныя пытаньні, невядома. Але нядаўна Латвія (і сьледам за ёй Літва) прапанавала Беларусі паслугі ў захоўваньні і транспартаваньні нафты на замену расейскай.

Аляксандра Лукашэнку ў 2018 і 2019 гадах запрашалі ў Латвію, але кіраўнік Беларусі там так і не пабываў за ўсю гісторыю. У Беларусь мінулым летам прыяжджаў міністар замежных справаў Латвіі, два гады таму — папярэдні прэм’ер Латвіі Марыс Кучынскіс.

Латвія — парлямэнцкая рэспубліка, але намінальны кіраўнік дзяржавы ў ёй гэта прэзыдэнт, якога выбіраюць дэпутаты (мае як цырыманіяльныя функцыі, так і некаторую фактычную ўладу). Кіраўнік ураду там завецца прэзыдэнтам міністраў, яго прызначае прэзыдэнт пры падтрымцы Сэйму. Згодна Канстытуцыі, прэм’ер нясе «палітычную адказнасьць» за рашэньні, што прымаюцца кіраўніцтвам дзяржавы.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG