Лінкі ўнівэрсальнага доступу

У Горадні руіны адной з найстарэйшых у Вялікім Княстве Літоўскім цэркваў перанясуць у іншае месца. ФОТА


Руіны Верхняй царквы каля Старога замка ў Горадні

Над фрагмэнтамі Верхняй царквы ў Горадні зьнялі часовы кансэрвацыйны павільён. На гэтым месцы будуць праводзіць археалягічныя раскопкі.

Працы з рэшткамі Верхняй царквы праводзяцца ў межах рэканструкцыі Старога замку.

Верхнюю царкву пабудавалі побач са Старым замкам у канцы XIII — сярэдзіне XIV стагодзьдзя. Яна стаяла над былой Ніжняй царквой XII стагодзьдзя, якая згарэла ў 1183 годзе.

Верхнюю царкву разабралі ў канцы XVI стагодзьдзя, калі Стары замак перабудоўвалі пры Стэфану Баторыю.

Ейныя руіны знайшлі падчас археалягічных раскопак у 1933 годзе. Каб дакапацца да Ніжняй царквы пад ёй, тады дэмантавалі часткі сьцен Верхняй царквы, перанесьлі іх бліжэй да каралеўскага палаца, змацавалі арматурай і бэтоннай асновай, а зьверху збудавалі драўляны ахоўны павільён. Адкрытага доступу да царквы з таго часу не было.

Так выглядаў каралеўскі палац з боку двара летась улетку
Так выглядаў каралеўскі палац з боку двара летась улетку
Так выглядаў часовы павільён над Верхняй царквой, пабудаваны ў міжваенны час польскімі спэцыялістамі ў двары Старога замка
Так выглядаў часовы павільён над Верхняй царквой, пабудаваны ў міжваенны час польскімі спэцыялістамі ў двары Старога замка
Павільён над Верхняй царквой разабралі
Павільён над Верхняй царквой разабралі
Парэшткі Верхняй царквы перанясуць на іншае месца
Парэшткі Верхняй царквы перанясуць на іншае месца
Пад Верхняй царквой правядуць археалягічныя раскопкі
Пад Верхняй царквой правядуць археалягічныя раскопкі
Пад гэтым павільёнам схаваныя падмуркі Ніжняй царквы ў Горадні, якая датуецца XII стагодзьдзем
Пад гэтым павільёнам схаваныя падмуркі Ніжняй царквы ў Горадні, якая датуецца XII стагодзьдзем

Як расказаў дырэктар Горадзенскага гісторыка-археалягічнага музэю, які месьціцца ў Старым замку, Юры Кітурка, часткі сьцен Верхняй царквы перанясуць бліжэй да Ніжняй царквы, якая цяпер таксама схаваная пад павільёнам, і накрыюць навесам. На месцы, дзе рэшткі Верхняй царквы захоўвалася больш за 80 гадоў, будуць праводзіць археалягічныя раскопкі ў межах рэканструкцыі Старога замка. Больш пільна падмуркамі Верхняй і Ніжняй цэркваў зоймуцца падчас трэцяй чаргі рэканструкцыі Старога замка.

Цяпер заканчваецца першая чарга, неўзабаве пачнецца другая — аднаўленьне каралеўскага палаца.

Гэтая публікацыя падрыхтаваная пры выкарыстаньні інфармацыі БелаПАН.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG