Лінкі ўнівэрсальнага доступу

Арганізатары імпрэз падчас перапахаваньня паўстанцаў Каліноўскага абвясьцілі збор сродкаў


Падрыхтоўка да пахаваньня Кастуся Каліноўскага ў Вільні

Абвешчаны збор сродкаў на выдаткі, зьвязаныя з ушанаваньнем памяці паўстанцаў 1863-1864 гадоў. Перапахаваньне парэшткаў прызначана на 22 лістапада у пантэоне герояў на віленскіх могілках Росы.

«Ад імя Беларускага грамадзкага камітэту ўшанаваньня памяці паўстанцаў зьвяртаемся да шырокай грамадзкасьці Беларусі, а таксама да супольнасьці беларусаў, якія жывуць па-за межамі краіны, з просьбай падтрымкі ў зборы сродкаў для арганізацыі і правядзеньня імпрэзаў, прысьвечаных пахаваньню Кастуся Каліноўскага і ягоных паплечнікаў у Вільні», — гаворыцца ў звароце.

Могілкі Росы ў Вільні
Могілкі Росы ў Вільні

Як паведамляюць ініцыятары краўдфандынгу, неабходна сабраць сродкі на арэнду памяшканьняў і апаратуры, а таксама атрыбутыку для шэсьцяў і урачыстасьцяў — сьцягі, дрэўкі, кветкі, стужкі, зьнічы, лямпады). Акрамя таго, грошы патрэбны на арганізацыйна-лягістычныя і інфармацыйныя выдаткі.

Сабраць трэба каля 3000 эўра. Зрабіць перавод на PayPal з можна з уласнага акаўнта ў гэтай сыстэме альбо банкаўскай карткай па спасылцы http://bit.ly/2p2emGR.
Беларускі грамадзкі камітэт ушанаваньня памяці паўстанцаў звяртаецца таксама да прыватных фундатараў, гатовых ахвяраваць сродкі.

Што важна ведаць пра перапахаваньне Кастуся Каліноўскага

Цырымонія перапахаваньня парэшткаў удзельнікаў антырасейскага паўстаньня 1863-64 гадоў 22 лістапада на віленскіх могілках Росы. Што вядома на гэты момант.

Раскопкі на Замкавай гары, дзе знайшлі парэшткі паўстанцаў
Раскопкі на Замкавай гары, дзе знайшлі парэшткі паўстанцаў

  • Цягам 2016 году на гары Гедзіміна ў Вільні двойчы здарыліся апоўзьні, паўстала пагроза славутай вежы.
  • У 2017 годзе падчас раскопак на гары Гедзіміна ў Вільні літоўскія археолягі выявілі парэшткі 21 паўстанца, у тым ліку іхніх лідэраў Кастуся Каліноўскага і Зыгмунта Серакоўскага.
  • У сакавіку 2019 году літоўскія дасьледнікі пацьвердзілі ідэнтыфікацыю парэшткаў Каліноўскага мэтадам выключэньня астатніх, а таксама праз супастаўленьне ўзросту, мэтаду сьмяротнага пакараньня і параўнаньня чэрапу з фатаздымкам.
Парэшткі Кастуся Каліноўскага
Парэшткі Кастуся Каліноўскага

  • У ліпені 2019 году для параўнаньня ДНК эксгумавалі магілу брата Кастуся Каліноўскага Віктара ў Сьвіслачы на Горадзеншчыне (у лідэра паўстаньня не засталося нашчадкаў па мужчынскай лініі). Але вынікі экспэртызы дагэтуль не апублікаваныя.
  • Дзяржаўную камісію ў справе перапахаваньня ўзначаліў прэм’ер-міністар Літвы Саўлюс Сквярняліс. Польскія ўлады актыўна супрацоўнічалі ў перамовах пра мэмарыялізацыю, а вось афіцыйны Менск асаблівага зацікаўленьня ня выявіў.
  • Беларуская грамадзкасьць дамаглася таго, каб на кожным надмагільлі апроч надпісаў па-літоўску і па-польску была і беларуская мова.
  • У канцы верасьня шэраг беларускіх інтэлектуалаў зьвярнуліся да літоўскіх уладаў з просьбай перадаць парэшткі аднаго з галоўных нацыянальных герояў для перапахаваньня ў Беларусі. Літоўцы не адрэагавалі, бо не атрымалі афіцыйнага звароту ад беларускіх уладаў.
  • У Вільні перапахаваюць парэшткі 20 з 21 знойдзеных паўстанцаў — навукоўцы ня здолелі ідэнтыфікаваць ксяндза Станіслава Ішору. Ёсьць генэтычныя дадзеныя нашчадкаў, якія жывуць у Літве і Польшчы, але аналіз паказаў, што сярод пахаваных яго няма.

Публікацыі на тэму

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG